༧གོང་ས་མཆོག་གི་མ་འོངས་སྐུའི་ཡང་སྲིད་ངེས་པར་དུ་ཕེབས་དགོས་པ་བོད་ཀྱི་མ་འོངས་བའི་མདུན་ལམ་འཚོལ་ཞིབ་ཀྱི་ཚོགས་ཞུགས་པ་ཚོས་གསོལ་འདེབས་ཞུས་འདུག

བཞུགས་སྒར་དུ་བོད་ཀྱི་མ་འོངས་བའི་མདུན་ལམ་འཚོལ་ཞིབ་སྐོར་ལ་གྲོས་བསྡུར་ལྷན་ཚོགས་ཤིག སྤྱི་ཟླ་༡༡པའི་ཚེས་༥ནས་༡༠བར་གནང་ཡོད་པའི་ཐོག་འཛམ་གླིང་ཡུལ་གྲུ་ཁག་༧ནས་བོད་མི་གཞོན་སྐྱེས་༩༠ལྷག་བཅར་ཡོད་པ་ཚོར། སྤྱི་ཚེས་༡༠ཉིན་བོད་མིའི་དབུ་ཁྲིད་༧གོང་ས་མཆོག་གིས་བཞུགས་སྒར་ཕོ་བྲང་དུ་མཇལ་ཁ་སྩལ་སྐབས། ཉིན་གྲངས་ལྔ་རིང་གི་ལྷན་ཚོགས་ཐོག་གྲོས་བསྡུར་གྱི་སྙིང་པོ་དོན་ཚན་བདུན་གཏན་འབེབས་བྱས་པ་སྙན་སྒྲོན་གནང་ཡོད་པ་མ་ཟད། དོན་ཚན་གཅིག་ནི། ༧གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུའི་ཡང་སྲིད་ངེས་པར་དུ་ཕེབས་དགོས་པ་འཁོད་ཡོད་པའི་ཐད། མགོན་པོ་གང་ཉིད་ཀྱིས་ཁོང་ད་དུང་ལོ་ངོ་ཉི་ཤུ་ཙམ་རིང་སྐུ་འཚོ་བཞུགས་གནང་རྒྱུ་དང་། དེའི་རིང་རྒྱ་ནག་ནང་འགྱུར་བ་འགྲོ་ངེས་ཡིན་པར་བརྟེན། ཁོང་གི་སྐུའི་ཡང་སྲིད་ཐད་སེམས་ཁྲལ་གནང་མི་དགོས་པའི་སྐོར་བཀའ་ཕེབས་ཡོད་པ། ལྷན་ཚོགས་གོ་སྒྲིག་པ་བཀྲ་ཤིས་ལམ་བཟང་ལགས་ཀྱིས་འགྲེལ་བརྗོད་གནང་བྱུང་།
བཀྲ་ཤིས་ལམ་བཟང་ལགས་ཀྱིས་གསུངས་ན། བོད་ཀྱི་མ་འོངས་མདུན་ལམ་འཚོལ་ཞིབ་དང་འབྲེལ་བའི་ལྷན་ཚོགས་ཐེངས་བཞི་པའི་སྟེང་། དོན་ཚན་ཁག་བདུན་གཏན་འབེབས་ཡོངས་གྲགས་གནང་ཡོད་པའི་ནང་། བོད་ནི་གནའ་སྔ་མོ་ནས་བཟུང་ཆོས་ལྡན་གྱི་ཞིང་ཁམས་ཞི་བདེའི་རྒྱལ་ཁབ་ཞིག་ཡིན་པ་དང་། བཙན་བྱོལ་ནང་༧གོང་ས་མཆོག་གིས་དབུ་ཁྲིད་དེ་བོད་མི་ཚོས་རྒྱལ་སྤྱིའི་ཁྱོན་དུ་བོད་དོན་འཐབ་རྩོད་རྒྱུན་འཁྱོངས་བྱས་པ། རྒྱ་ནག་གཞུང་གིས་བོད་ཀྱི་སྐད་ཡིག་རིག་གཞུང་དང་བོད་མིའི་ངོ་བོ་རྩ་མེད་དུ་གཏོང་བཞིན་པ། ༧གོང་ས་མཆོག་གི་ཡང་སྲིད་ངེས་པར་དུ་ཕེབས་དགོས་པ་དང་། རྒྱལ་སྤྱི་དང་རྒྱ་དཀར་ནག་གི་གནས་བབས་འགྱུར་འགྲོས་ལ་ཞིབ་ཚགས་པོས་དབྱེ་ཞིབ་དང་། རྒྱ་དམར་གྱི་བཙན་དབང་འོག་ཡོད་པའི་ཤར་ཏུར་ཀི་སི་ཐན་དང་ལྷོ་སོག་པོ། ཧོང་ཀོང་དང་ཐེ་ཝན་སོགས་དང་ལྷན་ནུས་པ་མཉམ་སྤུངས་ཀྱིས་རང་དབང་འཐབ་རྩོད་གནང་རྒྱུ་བཅས་འཁོད་ཡོད་པ་མ་ཟད། བོད་མི་ཚོའི་བར་ལྟ་བ་ལངས་ཕྱོགས་མི་འདྲ་བ་ཇི་ཙམ་ཡོད་མིན་ལ་མ་ལྟོས་པར། ཚང་མའི་དམིགས་ཡུལ་དེ་བོད་ཀྱི་བདེ་སྐྱིད་དང་རང་དབང་ཡིན་པས། ཚང་མ་འཆམ་མཐུན་གྱིས་གནས་རྒྱུ་ཡིན་པར་དམ་བཅའ་བཞག་སྟེ་བོད་ཕྱི་ནང་གཉིས་ཀ་དེ་ལྟར་ཡོང་རྒྱུའི་རེ་སྐུལ་གནང་ཡོད་པ་རེད།

རྒྱ་གར་ལ་དྭགས་ནས་ཚོགས་བཅར་གནང་མཁན་བསྟན་འཛིན་དཔལ་ལྡན་ལགས་ནས། ད་ལྟ་ནང་བཞིན་མུ་མཐུད་སེམས་ཤུགས་མ་ཆག་པར་ལས་ཀ་བྱེད་དགོས་པ་དང་། བཙན་བྱོལ་དང་བོད་ནང་ཚང་མ་མཉམ་རུབ་དང་རྡོག་རྩ་གཅིག་སྒྲིལ་བྱེད་དགོས་པའི་དམ་བཅའ་ཕུལ་བ་བཞིན། ༧གོང་ས་མཆོག་ལ་མཇལ་བ་དང་ལྷན་སོ་སོས་གང་ཐུབ་ཅི་ཐུབ་ཀྱིས་རྡོག་རྩ་ཆིག་སྒྲིལ་གྱི་ཐོག་ཆོད་སེམས་བཟུང་ཡོད་པ་འགྲེལ་བརྗོད་གནང་གི་འདུག
རྒྱ་གར་གྱི་རྒྱལ་ས་ལྡི་ལི་ནས་ཚོགས་ཞུགས་པ་མཐར་ཕྱིན་ལགས་ནས། ཡང་སྲིད་སྐོར་བཀའ་སློབ་ཕེབས་པ་དེ་བསྐལ་བ་བཟང་པོ་གཅིག་དང་། ཉེ་ཆར་བོད་ནས་ཕེབས་མཁན་ཁ་ཤས་ཤིག་གིས་བོད་ནང་རང་ལུས་མེར་བསྲེགས་གནང་མཁན་ཁག་ཅིག་གི་སྐུ་ལུས་ད་དུང་སོས་མ་ཐུབ་པར་སྡུག་བསྔལ་མྱང་བཞིན་པར་ཐུགས་སྨོན་གནང་རོགས་ཞུས་པར་ཐུགས་སྨོན་དང་། རྒྱ་ནག་ནང་འགྱུར་བ་ཡོང་ངེས་ཡིན་པ་དང་༧སྐུ་མདུན་ཁོང་ཉིད་ཀྱང་རྒྱ་ནག་དང་བོད་ནང་ཕེབས་འདུན་ཡོད་པར་བཀའ་ཕེབས་པར་བརྟེན། སེམས་ནང་འདོད་པ་ཁེངས་པ་ཞིག་བྱུང་ཟེར།
བོད་མི་དང་བླངས་པ་སྐོར་ཅིག་ནས་གོ་སྒྲིག་གནང་བ་བོད་ཀྱི་མ་འོངས་མདུན་ལམ་སྐོར་གྱི་ལྷན་ཚོགས་ལས་འགུལ་དེ། སྤྱི་ལོ་༢༠༢༢ལོ་ནས་འགོ་བཙུགས་པ་དང་ལྷན་ཚོགས་དེ་ཨ་རིའི་རྒྱལ་ས་ཝ་ཤིན་ཊོན་དང་། ཧྥ་རན་སིའི་རྒྱལ་ས་ཕ་རི་སི། ཨ་རིའི་གྲོང་ཁྱེར་ནིའུ་ཡོག རྒྱ་གར་རྒྱལ་ས་ལྡི་ལི་བཅས་སུ་ལྷན་ཚོགས་ཐེངས་བཞི་གནང་སྟེ། བོད་ཀྱི་མ་འོངས་མདུན་ལམ་ཆེད་ཆབ་སྲིད་དང་དཔལ་འབྱོར། རིག་གནས་འཕྲུལ་རིག མི་འབོར། ཁོར་ཡུག སྤྱི་ཚོགས་བཅས་དང་འབྲེལ་ཏེ་གྲོས་བསྡུར་བགྲོ་གླེང་གནང་གི་ཡོད་པ་རེད།

གསར་འགོད་པ། བློ་བྷེ།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་སྤེལ་མཁན། ཀླུ་འབུམ།