༧གོང་ས་མཆོག་གི་འཁྲུངས་སྐར་ཆེད་བོད་ཀྱི་རྒྱལ་དར་བསྒྲེངས་འཛུགས་དང་སྤྱི་སྤྱོད་རླངས་འཁོར་ཐོག་འཚམས་འདྲིའི་སྦྱར་བྱང་སྤེལ་འདུག

ཨོསི་ཊརེ་ལི་ཡའི་(Australia)་གྲོང་ཁྱེར་སིཌ་ནི་ནས་དུས་ཡུན་ཚོུད་གཉིས་ཙམ་གྱི་ལམ་དུ་ཆགས་པའི་རི་བོ་སྔོན་པོ་(Blue Mountains)་ཁུལ་གྱི་(Leura)་ཞེས་བའི་གྲོང་ཁྱེར་དེ་ནི་ཧ་ཅང་གི་གྲགས་ཆེ་བའི་གྲོང་ཁྱེར་ཞིག་ཡིན་པ་དང། གྲོང་ཁྱེར་དེར་ཉིན་ལྟར་ཡུལ་སྐོར་སྤྲོ་འཆམ་པ་ཉིས་ཁྲི་ལྔ་སྟོང་ལྷག་ཡོང་གི་ཡོད་པ་རེད། འདི་ལོ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་ཆེད་གྲོང་ཁྱེར་དེའི་ནང་བོད་ཀྱི་རྒྱལ་དར་དངོས་སུ་བསྒྲེངས་འཛུགས་གནང་ཡོད་པ་དང་། བོད་ཀྱི་རྒྱལ་དར་དེ་ཟླ་བ་འདིའི་ཟླ་མཇུག་བར་བསྒྲེངས་འཛུགས་གནང་རྒྱུ་ཡིན་པ་རེད་འདུག
དེའི་ཐད་རི་སྔོན་པོ་བོད་རིགས་མཐུན་ཚོགས་ཀྱི་ཚོགས་གཞོན་ཤེལ་དགེ་འདུན་ཚེ་རིང་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ། (Leara)་གྲོང་ཁྱེར་དུ་སྐུའི་འཁྲུངས་སྐར་ཉིན་མོར་བོད་ཀྱི་རྒྱལ་དར་བསྒྲེངས་འཛུགས་གནང་བ་དེ་ནི་སྤྱི་ལོ་༢༠༡༩ལོ་ནས་དབུ་བཙུགས་ཀྱིས་ད་བར་ལོ་ལྔ་ལྷག་ཙམ་རིང་སྐུའི་འཁྲུངས་སྐར་ནམ་ཡིན་ལ་བོད་ཀྱི་རྒྱལ་དར་བསྒྲེངས་འཛུགས་གནང་ཡོད་པ་དང་། མ་ཟད་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་གྱི་ཉིན་མོར་ཡང་གྲོང་ཁྱེར་དེའི་ནང་བོད་ཀྱི་རྒྱལ་དར་བསྒྲེངས་འཛུགས་གནང་ཆོག་པ་གཞུང་འབྲེལ་ཆོག་མཆན་ཐོབ་ཡོད་པ་ངོ་སྤྲོད་གནང་བྱུང།

གཞན་ཨ་རིའི་མི་ནི་སོ་ཊ་(Minnesota)་མངའ་སྡེའི་ནང་གི་སྤྱི་སྤྱོད་རླངས་འཁོར་ཁག་ཅིག་གི་ཐོག་སྤྱི་ནོར་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་༨༩ལ་ཕེབས་པའི་སྐུའི་འཁྲུངས་སྐར་ལ་འཚམས་འདྲིའི་དྲིལ་བསྒྲགས་གི་སྐུ་པར་ཆེན་པོ་སྦྱར་བའི་ལས་འགུལ་སྤེལ་བཞིན་པ་དང་། དེའི་ཐད་ས་གནས་ནས་འཆི་མེད་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ངོ་སྤྲོད་གནང་བ་ལྟར་ན། ལས་འགུལ་དེ་ནི་ཨ་རིའི་མི་ནི་སོ་ཊ་མངའ་སྡེའི་ནང་གི་(Park Nicollet Methodist Hospital)་སྨན་ཁང་དུ་ཕྱག་ལས་གནང་བཞིན་པའི་བོད་མི་བརྒྱ་སྐོར་ཞིག་ཡོད་པ་ཚོས། རིང་མིན་སྤྱི་ཟླ་༧ ཚེས་༦ཉིན་༧གོང་ས་༧སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་༨༩ལ་ཕེབས་པའི་སྐུའི་འཁྲུངས་སྐར་ཉིན་མོ་ཡིན་པ་དང་། ༧གོང་ས་མཆོག་ད་སྐབས་ཨ་རིར་བཞུགས་ཡོད་པར་བརྟེན། ཁོ་ཚོས་དང་བླངས་ཐོག་ནས་ཨ་སྒོར་ཁྲི་གཅིག་ལྷག་གི་ཞལ་འདེབས་བསྡུས་ནས། ས་གནས་ཀྱི་སྤྱི་སྤྱོད་རླངས་འཁོར་ཆེན་པོ་གཅིག་དང་ཆུང་བ་༡༢་ཀྱི་ཐོག་༧གོང་ས་མཆོག་གི་སྐུའི་འཁྲུངས་སྐར་ལ་འཚམས་འདྲི་ཞུ་བའི་སྐུ་པར་དང་སྦྱར་ཡིག་ཆེན་པོ་འདི་སྦྱར་ནས་མི་མང་ལ་དོ་སྣང་ཡོང་ཐབས་བྱས་བ་ཡིན་པ་གསུངས་བྱུང་།

སྤྱི་སྤྱོད་རླངས་འཁོར་ཆེན་པོ་དེའི་ཐོག་ཕོ་བྲང་པོ་ཏཱ་ལའི་མདུན་སྤྱི་ནོར་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཆེན་པོ་ཞིག་ཡོད་པའི་ཐོག ༧གོང་ས་མཆོག་དགུང་གྲངས་༨༩ལ་ཕེབས་པའི་སྐུའི་འཁྲུངས་སྐར་ལ་བཀྲིས་བདེ་ལེགས་གྲངས་མེད་ཞུ། སྐུ་ཉིད་ནས་མུ་མཐུད་དུ་འཛམ་བུ་གླིང་ལ་བདེ་སྐྱིད་དང་། སྤྲོ་བ། ཞི་བདེ་བཅས་བསྐྲུན་གནང་རོགས། ཞེས་བྲིས་འདུག

གསར་འགོད་པ། དབྱངས་སྒྲོན། ཀླུ་འབུམ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།