བོད་ཀྱི་བུད་མེད་ལྷན་ཚོགས་གཙོས་ཚོགས་སྡེ་ཁག་ཅིག་གིས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་རེད།

ཟླ་བ་འདིའི་ཚེས་༡༨ཉིན་གྱི་སྔ་དྲོར་བོད་ཀྱི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ཁང་དུ། བོད་ཀྱི་བུད་མེད་ལྷན་ཚོགས་དང་། ལྷ་སའི་མཐུན་གྲོགས་རྫོང་ཁག ཌལ་ཧོར་སློབ་ཟུར་བཅས་ཐུན་མོང་གིས་སྐུ་ཚེ་བརྟན་པའི་བརྟན་བཞུགས་བསྟར་འབུལ་ཞུ་འཆར་ཡོད་པ་དང་། ཕྱི་ཚེས་༡༦ཉིན་གྱི་སྔ་དྲོར་བཞུགས་སྒར་ཐེག་ཆེན་གཙུག་ལག་ཁང་དུ་བརྟན་བཞུགས་བསྟར་འབུལ་ཆེད་བཅར་མཁན་ཁག་ཅིག་ལ་༧གོང་ས་མཆོག་གིས་མཇལ་ཁ་སྩལ་ཡོད་པ་རེད་འདུག

འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གིས་བརྟན་བཞུགས་བསྟར་འབུལ་ཞུ་མཁན་གྱི་ཚོགས་པ་ཁག་གི་གོ་སྒྲིག་ཚོགས་ཆུང་གི་ཚོགས་གཙོ་རྣམས་ལ་བརྟན་བཞུགས་གྲ་སྒྲིག་ཞུ་ཕྱོགས་དང་འབྲེལ་བའི་ཐོག་བཀའ་འདྲི་ཞུས་པར། བོད་ཀྱི་བུད་མེད་ལྷན་ཚོགས་ཀྱི་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་ཚེ་རིང་སྒྲོལ་མ་ལགས་ཀྱིས་ཐེངས་འདིའི་བོད་ཀྱི་བུད་མེད་ལྷན་ཚོགས་ཀྱིས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་འཆར་ཡོད་པ་དེའི་ཐོག་ས་གནས་ཡན་ལག་༤༢ ནས་ད་བར་མིང་ཐོ་བྱུང་བའི་ཚོགས་མི་༢༠༥ ལྷག་མཉམ་ཞུགས་གནང་ཡོད་པ་དང་། ད་ལྟའི་ཆར་བརྟན་བཞུགས་ཀྱི་གྲ་སྒྲིས་བྱེད་མུས་ཡིན་པ་གསུངས་བྱུང་།
ལྷ་སའི་མཐུན་གྲོགས་རྫོང་ཁག་གི་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཞོན་བསྟན་འཛིན་ཀུན་གསལ་ལགས་གིས་༧གོང་ས་སྐྱབས་མགོན་ཆེན་པོ་མཆོག་བོད་ལུགས་ལྟར་དགུང་གྲངས་༩༠ཕེབས་ཀྱི་ཡོད་པ་དང་བསྟུན། ལྷ་ས་དང་། སྟོད་ལུང་། འདམ་གཞུང་། སྙེ་མོ། ཆུ་ཤུར། མལ་གྲོ་གུང་དཀར། འཕན་པོ། སྟག་རྩེ་རྫོང་བཅས་ལྷ་སའི་རྫོང་ཁག་བརྒྱད་ལས་གྲུབ་པའི་ལྷ་སའི་མཐུན་ཚོགས་རྫོང་ཁག་ཁྱོན་མི་༦༠༠བརྒལ་བས་མ་གྲོས་བསམ་པ་གཅིག་མཐུན་ཀྱི་སྒོ་ནས་བརྟན་བཞུགས་བསྟར་འབུལ་ཞུ་འཆར་ཡོད་པ་དང་། ད་ལྟའི་ཆར་བཞུགས་སྒར་ཐེག་ཆེན་ཆོས་གླིང་གི་ཆོས་རྭའི་ནང་དུ་བརྟན་བཞུགས་ཀྱི་གྲ་སྒྲིག་ཚགས་ཚུད་བྱེད་མུས་ཡིན་པ་གསུངས་བྱུང་།
ཚེས་༡༨ཉིན་བོད་ཀྱི་བུད་མེད་ལྷན་ཚོགས་དང་། ཌལ་ཧོར་སློབ་ཟུར་ཚོགས་པ། ལྷ་སའི་མཐུན་གྲོགས་རྫོང་ཁག་བཅས་ཐུན་མོང་གིས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་འཆར་ཡོད་པ་ནི་༧གོང་ས་མཆོག་གིས་ཨ་མི་རི་ཀ་ནས་ཞབས་པུས་སྨན་བཅོས་རྗེས་ཕྱིར་བཞུགས་སྒར་དུ་ཞབས་སོར་འཁོད་རྗེས་དད་ལྡན་མང་ཚོགས་ཀྱིས་བརྟན་བཞུགས་བསྟར་འབུལ་གནང་བ་ཐེངས་གཉིས་པ་དེ་ཆགས་ཀྱི་ཡོད་པ་རེད།
ཌལ་ཧོར་སློབ་ཟུར་ཚོགས་པས་ཚེས་༡༩ཉིན་བོད་ཀྱི་ཟློས་གར་ཚོགས་པའི་ཚོགས་ཁང་དུ་སྐྱབས་རྗེ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་མཛད་སྒོ་ཞིག་འཚོགས་འཆར་འདུག

གསར་འགོད་པ། བདེ་ཆེན་དབང་མོ།
རྩོམ་སྒྲིག་པ། བསྟན་འཛིན་བདེ་སྐྱིད།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།