༧གོང་ས་མཆོག་བཞུགས་སྒར་ཕོ་བྲང་དུ་ཞབས་སོར་བདེ་བར་འཁོད་པ།

2016-11-28
གློག་འཕྲིན།
མཆན།
Share
པར་བཀོད།
༧གོང་ས་མཆོག་གིས་ཉི་ཧོང་དང་སོག་ཡུལ་ནང་གི་མཛད་འཕྲིན་ཁག་ལེགས་གྲུབ་ཟིན་ནས་ཕྱིར་བཞུགས་སྒར་དུ་ཞབས་སོར་བདེ་བར་འཁོད་སྐབས། ༢༠༡༦།༡༡།༢༨
༧གོང་ས་མཆོག་གིས་ཉི་ཧོང་དང་སོག་ཡུལ་ནང་གི་མཛད་འཕྲིན་ཁག་ལེགས་གྲུབ་ཟིན་ནས་ཕྱིར་བཞུགས་སྒར་དུ་ཞབས་སོར་བདེ་བར་འཁོད་སྐབས། ༢༠༡༦།༡༡།༢༨
ཨྱོན་བསྟན་འཛིན། /RFA

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཉི་ཧོང་དང་སོག་ཡུལ་ནང་ཆིབས་བསྒྱུར་མཛད་འཕྲིན་རླབས་ཆེན་ཁག་ལེགས་གྲུབ་ཟིན་ནས་ཕྱིར་བཞུགས་སྒར་རྡ་རམ་ས་ལར་ཞབས་སོར་བདེ་བར་འཁོད་གནང་མཛད་འདུག
དེ་ཡང་འདི་ཚེས་༢༨་ཉིན་༧གོང་ས་མཆོག་གྷལ་གྷལ་གནམ་ཐང་ལ་ཞབས་སོར་བདེ་བར་འཁོད་གནང་མཛད་སྐབས་སྲིད་སྐྱོང་བློ་བཟང་སེང་གེ་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དབུས་པའི་བོད་མིའི་སྒྲིག་འཛུགས་ཀྱི་མཛད་གཙོ་རྣམས་ཕེབས་བསུར་བཅར་འདུག
༧གོང་ས་མཆོག་འདི་ཟླའི་ཚེས་༧་ཉིན་གྱི་སྔ་དྲོར་བཞུགས་སྒར་ཕོ་བྲང་ནས་ཉི་ཧོང་ཕྱོགས་སུ་ཆིབས་གཞལ་བསྒྱུར་གནང་གིས། ཉི་ཧོང་གིས་གྲོང་ཁྱེར་Kyoto་དང་། Koyasan, Saitama, Yokohama་བཅས་ཀྱི་ནང་མང་ཚོགས་ལ་བཀའ་སློབ་བསྩལ་གནང་བ་དང་། ཉི་ཧོང་གི་བླ་ཆེན་རྣམས་དང་ཀོ་རི་ཡའི་ནང་པ། ཉི་ཧོང་གི་སློབ་ཕྲུག་བཅས་ལ་བཀའ་སློབ་གནང་འདུག
༧གོང་ས་མཆོག་གིས་ཕྱི་ཚེས་༡༦་ཉིན་ཉི་ཧོང་གི་གྲོས་ཚོགས་འཐུས་མི་༢༠༠་ལྷག་ལ་ཉི་ཧོང་གྲོས་ཚོགས་ཀྱི་ཚོགས་ཁང་ཆེན་མོའི་ནང་བཀའ་སློབ་བསྩལ་འདུག་ལ་༧གོང་ས་མཆོག་གིས་ཉི་ཧོང་ནང་ཕྱི་ཚེས་༨་ནས་༢༧་བར་སྤྱོད་འཇུག་ཆེན་མོའི་བཀའ་ཆོས་དང་སྒྲོལ་དཀར་དབང་ མི་གཡོ་བའི་རྗེས་གནང་གནང་། སློབ་གྲ་དང་གཙུག་ལག་སློབ་གྲ་ཁག་ལ་དུས་རབས་༢༡་པའི་ནང་པ་ཚོར་འཁྲིད་པའི་ལས་འགན་ཞེས་པ་དང་། བྱམས་བརྩེ་ནི་བདེ་སྐྱིད་ཀྱི་རྩ་བ་ཡིན་ཞེས་པའི་བརྗོད་གཞིའི་ཐོག་བཀའ་སློབ་སྩལ་གནང་འདུག
དེའི་རྗེས་སུ་༧གོང་ས་མཆོག་སོག་ཡུལ་ནང་ཆིབས་བསྒྱུར་བསྐྱངས་སྐབས་ཡུལ་དེའི་ནང་བཅའ་ཞུགས་རྒྱ་གར་གྱི་གཞུང་ཚབས་ཆེན་མོ་Dr. T Suresh Babu་མཆོག་དང་། སོག་པོའི་མཁན་པོ་བླ་མ་ཆོས་རྒྱམ་མཚོ་དབུས་པའི་སོག་པའི་བླ་ཆེན་རྣམས་ཀྱིས་གུས་བསུའི་སྣེ་ལེན་གཟབ་རྒྱས་ཞུས་པ་དང་། ༧གོང་ས་མཆོག་གིས་སོག་པོའི་རྒྱལ་ས་ཨུ་ལན་བྷ་ཀྲོར་ནང་གི་དགའ་ལྡན་ཐེག་ཆེན་གླིང་དགོན་པ་དང་། ཡིད་དགའ་ཆོས་གླིང་གྲ་ཚང་ནང་པཎ་གྲུབ་བཅུ་བདུན་པའི་ལྗགས་ལུང་དང་རྟེན་འབྲེལ་བསྟོད་པ། ལམ་གཙོ་རྣམ་གསུམ། རྗེ་རིགས་གསུམ་སྤྱི་གྲུབ་ཀྱི་རྗེ་གནང་སོགས་སྩལ་གནང་འདུག་ལ་ནང་པའི་ཚན་རིག་དང་དེང་དུས་ཀྱི་ཚན་རིག་གཉིས་ཀྱི་བགྲོ་གླེང་གི་ཚོགས་མགོན་དུ་དབུ་ཞུགས་མཛད་པ་དང་། ཕྱི་ཚེས་༢༢་ཉིན་སོག་པོའི་གཞོན་སྐྱེས་རྣམས་ལ་ཀུན་ཁྱབ་འགན་འཁུར་དང་། དུས་རབས་༢༡་པའི་ནང་ཆོས་སྐོར་བཀའ་སློབ་སྩལ་གནང་བཅས་སོག་ཡུལ་ནང་ཞུགས་བཞག་ཉིན་གྲངས་དྲུག་རིང་ཆིབས་བསྒྱུར་མཛད་འཕྲིན་རླབས་ཆེན་བསྐྱངས་གནང་ཁག་ལེགས་གྲུབ་ཟིན་པའི་རྗེས་སུ་ཡང་བསྐྱར་ཉི་ཧོང་ནང་ཕྱི་ཚེས་༢༤་ཉིན་ཆིབས་བསྒྱུར་མཛད་པ་དང་། ཉིན་མཐའ་མར་ཉི་ཧོང་གི་གྲོང་ཁྱེར་Saitama་ནང་གི་Saitama་མཐོ་སློབ་དང་སྨན་ཁང་ནང་མང་ཚོགས་ལ་བཀའ་སློབ་བསྩལ་གནང་སོགས་བསྟན་འགྲོའི་བདེ་ཐབས་ལ་སྨན་པའི་རླབས་ཆེན་མཛད་འཕྲིན་ཁག་ལེགས་གྲུབ་ཟིན་པའི་རྗེས་སུ་ཕྱི་ཚེས་༢༨་ཉིན་རྒྱ་གར་གྱི་རྒྱལ་ས་ལྡི་ལི་བརྒྱུད་བཞུགས་སྒར་ལ་ཞབས་སོར་བདེ་བར་འཁོད་གནང་མཛད་འདུག།

གསར་འགོད་པ་སེང་གེ་རི་བསོད་ནམས་ལྷ་མོ།

མཆན། (0)
Share
དྲ་གནས་ཆ་ཚང༌།