སྤྱི་ནོར་༧གོང་ས་མཆོག་གིས་ཝེཌ་ནམ་གྱི་ཆོས་ཞུ་བ་རྣམས་ལ་དམིགས་བསལ་མཇལ་ཁ་དང་བཀའ་སློབ་བསྩལ་འདུག

2023.09.07
སྤྱི་ནོར་༧གོང་ས་མཆོག་གིས་ཝེཌ་ནམ་གྱི་ཆོས་ཞུ་བ་རྣམས་ལ་དམིགས་བསལ་མཇལ་ཁ་དང་བཀའ་སློབ་བསྩལ་འདུག
Photo: RFA

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ལྷོ་ཤར་ཨེ་ཤེ་ཡའི་དད་ལྡན་ཆོས་ཞུ་བ་ཚོས་ཇི་ལྟར་གསོལ་འདེབས་ཞུས་པ་བཞིན་ཕྱི་ཟླ་༩པའི་ཚེས་༥ ནས་ཉིན་གྲངས་གཉིས་རིང་། བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་དབུ་མ་འཇུག་པའི་རང་འགྲེལ་གྱི་ཐོག་ནས་བཀའ་ཆོས་བསྩལ་ཡོད་པ་དང་། འདི་ཚེས་༧ཉིན་༧གོང་ས་སྐྱབས་མགོན་ཆེན་པོ་མཆོག་གིས་གསུངས་ཆོས་ཞུ་བར་ཕེབས་པའི་ཝེཌ་ནམ་(Vietnam)་དད་ལྡན་ཆོས་ཞུ་བ་རྣམས་ལ་དམིགས་བསལ་མཇལ་ཁའི་སྐབས་བཀའ་སློབ་བསྩལ་བའི་ནང་། སངས་རྒྱས་ཀྱི་ལུང་རྟོགས་ཀྱི་ཆོས་གཉིས་པོ་དེ་བཤད་སྒྲུབ་ཁོ་ནའི་ཐོག་འཛིན་སྐྱོང་སྤེལ་གསུམ་བྱ་རྒྱུ་ལས་གཞན་མེད་པ་དང་། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བཅས་ལ་ཐོས་བྱུང་དང་བསམ་བྱུང་དེ་བཞིན་སྒོམ་བྱུང་ཀྱི་ཤེས་རབ་སྐྱེས་ཏེ་རིམ་པའི་རྟོགས་པ་རྒྱུད་ལ་སྐྱེས་ཐབས་འབད་བརྩོན་གནང་དགོས་སྐོར་ལམ་སྟོན་གནང་འདུག

༧གོང་ས་མཆོག་གིས་མུ་མཐུད་དུ། ང་ཚོ་ཚང་མའི་སེམས་རྒྱུད་ལ་བདེ་གཤེགས་པའི་སྙིང་པོ་དེ་ཡོད་དུས། རིམ་པས་སེམས་ཀྱི་སྐྱོན་རྣམས་ཇེ་ཆུང་ཇེ་ཆུང་དུ་གཏོང་བ་དང་ཡོན་ཏན་གྱི་རིགས་རྣམས་རིམ་པས་ཇེ་ཆེར་བཏང་བ་ཡིན་ན་རིམ་པས་སེམས་ལ་འགྱུར་བ་འགྲོ་ངེས་པ་༧གོང་ས་མཆོག་གི་ཐུགས་མྱོང་དང་འབྲེལ་ཏེ་བཀའ་བསྩལ་འདུག
དེ་བཞིན་མགོན་པོ་གང་ཉིད་ནས་མངོན་རྟོགས་རྒྱན་དང་དབུ་མ་འཇུག་པ་གཉིས་སྐུ་ན་ཆུང་དུས་ནས་ཐུགས་འཛིན་གནང་ཡོད་པ་དང་། མངོན་རྟོགས་རྒྱན་གྱི་ནང་ས་ལམ་འགྲོ་སྟངས་ཆ་ཚང་ཡོད་པ་དང་། དབུ་མ་འཇུག་པའི་ནང་སྟོང་ཉིད་ཀྱི་ལྟ་བ་གཙོ་བོ་གསུངས་ཡོད་དུས། དཔེ་ཆ་ལྟ་རྒྱུ་དེ་ལས་སླ་བོ་ཞིག་མིན་ཡང་ཨུ་ཚུགས་རྒྱབ་སྟེ་བལྟས་པ་ཡིན་པས་རིམ་པས་ལས་སླ་པོ་ཆགས་རྒྱུ་ཡིན་པ་སོགས་བཀའ་སློབ་གནང་འདུག
དགའ་ལྡན་ཕོ་བྲང་ནས་མཛད་འཆར་ཕྱི་བསྒྲགས་གནང་བ་ལྟར་ན། སྤྱི་ཟླ་བཅུ་བའི་ཚེས་༢ནས་༤་བར་ཉིན་གྲངས་གསུམ་རིང་། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་སོགས་ཀྱིས་ཇི་ལྟར་གསོལ་བ་བཏབ་པ་ལྟར། རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་ལམ་རིམ་བསྡུས་དོན་དང་། བློ་སྦྱོང་དོན་བདུན་མ། སྤྱན་རས་གཟིགས་ཀྱི་བཀའ་དབང་བཅས་ཀྱི་ཆོས་འབྲེལ་སྩལ་རྒྱུ་ཡིན་འདུག།


གསར་འགོད་པ། པདྨ་དངོས་གྲུབ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།

བལྟ་བཤེར་མང་ཤོས་བྱས་པའི་གནས་ཚུལ།
RFA
༸གོང་ས་མཆོག་གིས་དགེ་འདུན་པ་ ༦༠ ལྷག་ལ་དགེ་སློང་གི་སྡོམ་པ་འབོགས་འཇོག་མཛད་པ།
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
དབོན་པོ་སྟོད་ཁུལ་གྱི་དགེ་འདུན་པ་དང་མང་ཚོགས་འཛིན་བཟུང་བྱས་པ་ཁག་ལ་འདྲི་རྩད་བྱེད་འགོ་བཙུགས་ཡོད་པ།
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎