བོད་མི་བཙོན་འགྲོལ་ཆེད་ཡོ་རོབ་སྒྲིག་འཛུགས་ནས་འབོད་སྐུལ་ཞུས་པ།

༄༅༎འདི་ལོ་ཕྱི་ཟླ་གསུམ་པའི་ཚེས་བཅུ་ནས་བཟུང་བོད་ཆོལ་ཁ་གསུམ་གྱི་ནང་ཞི་བའི་གྱེན་ལངས་བྱུང་སྐབས་ རྒྱ་ནག་གཞུང་གིས་དྲག་གནོན་ཚབས་ཆེ་དང་ དམ་བསྒྲགས་ཤིན་ཏུ་ཆེན་པོ་བྱས་ཡོད་པ་མ་ཟད་ བོད་མི་ཆེས་མང་པོ་འཛིན་བཟུང་བཙོན་འཇུག་བྱས་ཏེ་ རྒྱལ་སྤྱིའི་ཡོངས་གྲགས་མང་གཙོའི་ལམ་ལུགས་ལས་ཡོངས་སུ་བརྒལ་བའི་གདུག་རྩུབ་གཏོང་བཞིན་པར་ཡོ་རོབ་མཉམ་འབྲེལ་སྒྲིག་འཛུགས་ཀྱིས་ཐུགས་འཚབ་གནང་གི་ཡོད་ལུགས་གསུངས་གནང་འདུག་

ཉེ་ལམ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ རྒྱ་ནག་གཞུང་གི་འབྲེལ་ཡོད་དབུ་ཁྲིད་དབར་མཇལ་འཕྲད་གནང་ཡོད་པར་ཡོ་རོབ་མཉམ་འབྲེལ་སྒྲིག་འཛུགས་ཀྱིས་དགའ་བསུ་ཞུས་གནང་ཡོད་ཅིང་ བོད་རྒྱའི་བར་གྲོས་མོལ་དོན་དང་ལྡན་པ་གནང་སྟེ་ བོད་མིའི་ཆོས་དང་རིག་གཞུང་ མི་རིགས་ཀྱི་ངོ་བོ་བཅས་སྲུང་སྐྱོབ་ཐུབ་པའི་གནིས་མོས་ཀྱི་རྒྱུན་གནས་ཐབས་ལམ་འཚོལ་དགོས་པ་གལ་ཆེ་བའི་སྐོར་ཡོ་རོབ་མཉམ་འབྲེལ་སྒྲིག་འཛུགས་ཀྱིས་གསུངས་གནང་འདུག ཡང་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ལྷན་ཚོགས་སུད་སི་གྲོང་ཁྱེར་འཇི་ནི་ཝ་རུ་ཚོགས་སྐབས་ ལྷན་ཚོགས་ཀྱི་སྤྱི་ཁྱབ་པ་ཐེ་བའི་མི་སྣ་ཁག་བོད་ནང་གཟིགས་བསྐོར་གཏང་དགོས་སྐོར་གསུངས་ཡོད་ཀྱང་རྒྱ་ནག་གཞུང་གིས་ཁས་ལེན་གནང་མེད་པ་རེད་ འོན་ཀྱང་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ལྷན་ཚོགས་ཀྱི་སྤྱི་ཁྱབ་པ་བོད་ནང་གཟིགས་སྐོར་ཕེབས་ཐུབ་ན་ བོད་རྒྱ་ཞི་མོལ་ལ་ཕན་ཐོག་ངེས་ཅན་ཡོང་རྒྱུ་ཡིན་པར་ཡོ་རོབ་མཉམ་འབྲེལ་སྒྲིག་འཛུགས་ཀྱིས་ཡིད་ཆེས་གནང་གི་ཡོད་པས་དེ་ལུགས་རྒྱ་ནག་གཞུང་གིས་བསམ་ཞིབ་གནང་སྟེ་མཐུན་རྐྱེན་བསྐྲུན་དགོས་པ་ཡོ་རོབ་མཉམ་འབྲེལ་སྒྲིག་འཛུགས་ཀྱིས་སྐུལ་གནང་འདུག་