ཡོ་རོབ་བོད་བརྒྱུད་ནང་བསྟན་ཆོས་ཚོགས་ཁག་གི་ཚོགས་ཆེན་སྟེང་༧གོང་ས་མཆོག་གི་མ་འོངས་སྐུའི་ཡང་སྲིད་ཀྱི་སྐུ་དབང་ཡོངས་རྫོགས་མགོན་པོ་མཆོག་ཁོ་ནར་ཡོད་པའི་སྤྱི་མོས་གྲོས་ཆོད་བཞག་འདུག

དེ་ཡང་ཡོ་རོབ་ཀྱི་རྒྱལ་ཁབ་དགུའི་ནང་ཡོད་པའི་བོད་བརྒྱུད་ནང་བསྟན་ལྟེ་གནས་ཁག་༢༨ ཀྱི་སྐུ་ཚབ་མི་གྲངས་༤༤ཙམ་མཉམ་ཞུགས་ཀྱིས་བྷེལ་ཇམ་ཡུལ་གྱི་ཧུའུ་གྲོང་ཁྱེར་དུ་རྟེན་གཞི་བྱས་བའི་ཡོན་ཏན་གླིང་ནང་ཆོས་ལྟེ་གནས་ཁང་དུ། ཡོ་རོབ་བོད་ཀྱི་ནང་ཆོས་ཚོགས་ཆེན་ཐེངས་བཞི་པ་དེ་ཟླ་༩ཚེས་༡༣ནས་༡༤བར་འཚོགས་ཡོད་ཅིང་། ཚོགས་འདུའི་དབུ་འབྱེད་ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ཀྱིས་བརྙན་འཕྲིན་བརྒྱུད་གསུངས་བཤད་གནང་བ་དང་། ཚོགས་འདུའི་རིང་ཚོགས་བཞུགས་སྐུ་ཚབ་རྣམས་པས་གནད་དོན་མང་པོའི་ཐོག་གྲོས་བསྡུར་གནང་བའི་རྗེས། ཚོགས་འདུའི་མཇུག་སྡོམ་ཏུ་གྲོས་ཆོད་དོན་ཚན་དྲུག་བཞག་ཡོད་པ་དང་། གྲོས་ཆོད་ནང་། དང་པོ། སྤྱི་ནོར་༧གོང་ས་༧སྐྱབས་མགོན་ཆེན་པོ་སྐུ་ཕྲེང་བཅུ་བཞི་པ་མཆོག་གི་འཛམ་གླིང་ཞི་བདེ་དང་། ཆོས་ལུགས་མཐུན་སྒྲིལ་གྱི་མཛད་རྗེས་ལ་ངོས་འཛིན་ཞུ་རྒྱུ་དང་། གཉིས་པ། འགྲོ་བའི་ཕན་བདེར་དམིགས་ཏེ་དགའ་ལྡན་ཕོ་བྲང་གི་སྒྲིག་འཛུགས་མུ་མཐུད་གནས་དགོས་རྒྱུ། གསུམ་པ། ཕྱི་ལོ་༢༠༡༡ ཟླ་བ་༠༩ ཚེས་༢༤ ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཡང་སྲིད་སྐོར་ཡོངས་ཁྱབ་གསལ་བསྒྲགས་ཇི་བསྐྱངས་ལ་ངོས་འཛིན་རྒྱབ་སྐྱོར་དང་། མགོན་པོ་མཆོག་གི་མ་འོངས་ཡང་སྲིད་ཀྱི་སྐུ་དབང་ཡོངས་རྫོགས་མགོན་པོ་གང་ཉིད་མཆོག་དང་དགའ་ལྡན་ཕོ་བྲང་ཁོ་ནར་ཡོད་པར་ངོས་འཛིན་ཞུ་རྒྱུ། བཞི་བ། རྒྱ་ནག་གཞུང་གིས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དབུས་པའི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་ཞི་དྲག་ཐེ་བྱུས་སྣ་ཚོགས་བྱེད་བཞིན་པར་སྐྱོན་བརྗོད་དང་། ཆོས་ལ་དད་པ་མེད་པའི་རྒྱ་ནག་གཞུང་ལ་བོད་ཀྱི་བླ་སྤྲུལ་གྱི་ཡང་སྲིད་ངོས་འཛིན་ཞུ་རྒྱུའི་ཐོབ་ཐང་དབང་ཚད་མེད་པ་གསལ་སྟོན་བྱ་རྒྱུ། ལྔ་བ། རྒྱལ་སྤྱིའི་སྤྱི་ཚོགས་ནས་འབྱུང་འགྱུར་རྒྱ་ནག་གཞུང་གིས་བསྐོ་འཛུགས་བྱས་པའི་༧གོང་ས་མཆོག་གི་ཡང་སྲིད་ཡིན་ཟེར་བར་ངོས་འཛིན་གནང་སྐྱོང་མི་ཡོང་བའི་འབོད་སྐུལ་ཞུ་རྒྱུ། དྲུག་པ། རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་རྩ་མེད་གཏོང་བཞིན་པར་སྐྱོན་བརྗོད་དང་། དེ་ལྟ་བུའི་བྱ་སྤྱོད་རྣམས་འཕྲལ་དུ་མཚམས་འཇོག་དགོས་པའི་རེ་སྐུལ་བྱ་རྒྱུ། བཅས་འཁོད་འདུག

ཚོགས་ཆེན་སྟེང་དབྱིན་ཡུལ་བོད་ཀྱི་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་། ཧྥ་རན་སཱའི་འབྲེལ་མཐུད་པ་ཐུབ་བསྟན་ཚེ་རིང་ལགས། སུད་སི་སྐུ་ཚབ་དོན་ཁང་གི་རྒྱལ་ཚོགས་འབྲེལ་མཐུད་པ་ཕུན་ཚོགས་སྟོབས་རྒྱལ་ལགས་བཅས་མཉམ་ཞུགས་གནང་ཡོད། དེ་སྔའི་ཡོ་རོབ་བོད་བརྒྱུད་ནང་བསྟན་ཚོས་ཚོགས་ཁག་གི་ཚོགས་ཆེན་དང་པོ་དེ་ཕྱི་ལོ་༢༠༠༥ ལོར་སུད་སིའི་ཛུ་རིག་དང་། ཐེངས་གཉིས་པ་ཕྱི་ལོ་༢༠༡༣ ལོར་སུད་སི་ཧྤེ་རེ་བུག ཐེངས་གསུམ་པ་ཕྱི་ལོ་༢༠༡༩ སྦེལ་ཇམ་དུ་འཚོགས་ཡོད་པ་རེད།

གསར་འགོད་པ། འཆི་མེད།
རྩོམ་སྒྲིག་པ། བསྟན་འཛིན་བདེ་སྐྱིད།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།