༧གོང་ས་མཆོག་གིས་ཤར་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་མཆོག་ལ་དགའ་ལྡན་ཁྲི་ཐོག་ ༡༠༥ པར་བསྐོ་བཞག་ཕྱག་རྟགས་བསྩལ་གནང་མཛད་པ།

ཉེ་ལམ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ཁྲི་པའི་ལས་དུས་ཟིན་རྗེས། ༧གོང་ས་༧སྐྱབས་མགོན་ཆེན་པོ་མཆོག་མཇལ་བཅར་གྱིས་དགོངས་འཁྲོལ་ཡོང་བའི་སྙན་གསན་སྒྲོན་འབུལ་ཞུས་་རྗེས།  སྔར་གྱི་ཕྱག་སྲོལ་ལྟར་༧གོང་ས་༧སྐྱབས་མགོན་ཆེན་པོ་མཆོག་ནས་ཉེ་བའི་རིགས་བདག་ཤར་པ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་མཆོག་ལ་དགའ་ལྡན་ཁྲི་ཐོག་ ༡༠༥ པར་བསྐོ་བཞག་ཕྱག་རྟགས་བསྩལ་གནང་མཛད་ཡོད་པ་དགའ་ལྡན་ཁྲི་ཐོག་ཁང་དང་འབྲས་སྤུངས་བློ་གསལ་གླིང་གྲྭ་ཚང་སོ་སོ་ནས་གསལ་བསྒྲགས་གནང་འདུག 

༧གོང་ས་༧སྐྱབས་མགོན་ཆེན་པོ་མཆོག་གིས་ཡེ་ཤེས་དབྱིངས་དཔྱད་ཀྱིས་བསྩལ་བའི་ཕྱག་རྟགས་རིན་པོ་དེ་བཞིན་ཟླ་ ༡༡ པའི་ཚེས་ ༩ གཟའ་སྐར་འཕྲོད་སྦྱོར་དགེ་བའི་ཉིན་མཚུངས་མེད་ཤར་པ་ཆོས་རྗེ་རིན་པོ་ཆེ་མཆོག་ལ་འབུལ་གཏན་འཁེལ་བ་དགའ་ལྡན་ཁྲི་ཐོག་ཁང་གི་དྲུང་ཆེ་སྒོ་མང་མཁན་ཟུར་བློ་བཟང་རྒྱལ་མཚན་ལགས་ཀྱིས་འདི་ག་རླུང་འཕྲིན་ཁང་ལ་འགྲེལ་བརྗོད་གནང་བྱུང་། 

བོད་ལ་དུས་འགྱུར་སྣ་ཚོགས་ཤིག་བྱུང་མིན་མིན་ལ་བལྟོས་པར་དགའ་ལྡན་ཁྲིར་ཕེབས་ཕྱོགས་ཀྱི་རིམ་པ་ཁག་སྔར་སྲོལ་ཕྱག་ལེན་མ་ཉམས་པར་གནས་ཡོད་པ་རེད།  དེ་ནི་བླ་སྤྲུལ་གྲྭ་རྐྱང་སུ་ཞིག་ཡིན་རུང་ཐོག་མར་གདན་སེ་འབྲས་དགའ་གསུམ་གང་རུང་ནང་ཆོས་ཞུགས་སློབ་གཉེར་ཚུལ་བཞིན་དུ་བྱས་ཏེ།དགེ་ལུགས་རྒྱུགས་སྤྲོད་དུ་ཕེབས་ནས་དགེ་བཤེས་ལྷ་རམས་པའི་མཚན་རྟགས་བཞེས་དགོས་པ་དང་། དེ་རྗེས་།རྒྱུད་གྲྭ་སྟོད་སྨད་དུ་སྔགས་ལ་སློབ་གཉེར་གྲུབ་པ་དང་རྒྱུད་གྲྭ་སྟོད་སྨད་གཉིས་གང་རུང་གི་དགེ་བསྐོས་དང་བླ་མ་དབུ་མཛད། དེ་རྗེས་མཁན་པོའང་གནང་གྲུབ་རྗེས།  ཤར་བྱང་ཆོས་རྗེ་ལ་ཕེབས་པའི་རྗེས་དགའ་ལྡན་ཁྲི་པར་ཕེབས་ཀྱི་ཡོད་པ་རེད། 

དགའ་ལྡན་ཁྲི་ཐོག་ ༡༠༥ པ་ལ་ཕེབས་གཏན་ཁེལ་ཡོད་པ་ཤར་པ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེའམ་འཇམ་དཔལ་མཁས་བཙུན་དཔལ་བཟང་པོ་མཆོག་ནི། ༡༩༣༧ ལོར་མདོ་སྟོད་སྨར་ཁམས་ཚ་ལྷོ་ས་ཆར་འཁྲུངས་ཏེ་བོད་ནང་འབྲས་སྤུངས་བློ་གསལ་གླིང་གྲྭ་ཚང་དུ་ཆོས་ཞུགས་ཀྱིས།བསྡུས་གྲ་བློ་རྟགས་ནས་བཟུང་ཕར་ཕྱིན་གྱི་བར་གསན་སྦྱངས་མཛད་པ་དང་། རྒྱ་གར་དུ་ཕེབས་ནས་བཀའ་རམས་དང་སློབ་དཔོན། ལྷ་རམས་བཅས་རྒྱུགས་སྤྲོད་ཀྱིས་རེ་རེ་བཞིན་ཨང་རིམ་དང་པོའི་ཕྱག་ཁྱེར་བཞེས་ཏེ། རྒྱུད་སྟོད་གྲྭ་ཚང་དུ་སྔགས་ལ་བསླབ་པ་མཐར་སོན་གྱིས་དགེ་བསྐོས་དང་བླ་མ་དབུ་མཛད།མཁན་པོ་བཅས་རིམ་པར་གནང་སྟེ་ཤར་རྩེ་ཆོས་རྗེ་ལ་ཕེབས་ཡོད་པས།རིང་མིན་དགའ་ལྡན་ཁྲི་ཐོག་ ༡༠༥ པའི་ཐུགས་འགན་དངོས་སུ་བཞེས་གཏན་ཁེལ་ཡོད་པ་རེད།

གསར་འགོད་པ། བློ་བྷེ།
རྩོམ་སྒྲིག་པ། སྐལ་ལྡན་བློ་གྲོས།
དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།