བཙོན་འོག་ལ་ཡོད་པའི་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལ་ཁྲིམས་བཤེར་བྱས་འདུག་ལ་དེའི་རྗེས་ཀྱི་གནས་སྟངས་གསལ་ཆ་མེད་པར་ལྷག་འདུག

ཉེ་ལམ་སྤྱི་ཟླ་༦པའི་ཟླ་མཇུག་ལ་ལྷ་ས་གྲོང་ཁྱེར་ཁྲིན་ཀོན་ཆུས་མི་དམངས་ཁྲིམས་ཁང་དུ་རྒྱ་ནག་གི་བཙོན་འོག་ལ་ཡོད་པའི་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་འབོད་འགུག་གིས་ཁྲིམས་བཤེར་བྱས་ཡོད་ཀྱང་དེའི་རྗེས་ཀྱི་གནས་ཚུལ་ཤེས་རྟོགས་མི་འདུག
དེ་ཡང་ཨེ་ཤེ་ཡ་རང་དབང་རླུང་འཕྲིན་ཁང་ལ་ཡིག་ཆ་དང་བཅས་གནས་ཚུལ་འབྱོར་བ་ལྟར་ན། ཉེ་ལམ་སྤྱི་ཟླ་༦པའི་ཚེས་༢༡ཉིན་ལྷ་ས་གྲོང་ཁྱེར་ཁྲིན་ཀོན་ཆུས་མི་དམངས་ཁྲིམས་ཁང་ཟེར་པས་རྒྱ་ནག་གི་བཙོན་འོག་ལ་ཡོད་པའི་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་སུ་འབོད་འགུག་གི་ཡིག་གེ་བཏང་སྟེ། སྤྱི་ཟླ་༦པའི་ཚེས་༢༧ཉིན་ལྷ་ས་གྲོང་ཁྱེར་ཁྲིན་ཀོན་ཆུས་མི་དམངས་ཁྲིམས་ཁང་དུ་ཁྲིམས་བཤེར་བྱས་ཡོད་པ་དང་། དེའི་རྗེས་སུ་ཐག་གཅོད་ག་རེ་བྱུང་ཡོད་མེད་སོགས་ཀྱི་གནས་ཚུལ་ཤེས་རྟོགས་ཐུབ་ཀྱི་མི་འདུག འབྲེལ་ཡོད་མི་སྣས་གནས་ཚུལ་ངོ་སྤྲོད་གནང་བ་ལྟར་ན། ཉེ་ལམ་སྤྱི་ཟླ་༣པའི་ནང་མགོན་པོ་སྐྱིད་ལགས་ཀྱིས་ཁོང་མོའི་ཞུ་འབོད་ལས་འགུལ་རིམ་པའི་སྐབས་ལྷ་སའི་ཁྲིན་ཀོན་ཆུས་རྒྱ་ནག་གི་སྤྱི་བདེ་ཉེན་རྟོག་པས་སྤྱི་དམངས་ཀྱི་ཐོབ་ཐང་འཕྲོག་པ་དང་། ཉེས་མེད་བཀག་ཉར་དང་བཅར་རྡུང་བྱས་བའི་བྱ་སྤྱོད་ཁག་ཐེར་འདོན་གྱིས་ལྷ་སའི་ཁྲིན་ཀོན་ཆུས་མི་དམངས་ཁྲིམས་ཁང་ལ་ཁྲིམས་གཏུག་བྱས་ཡོད་པ་རེད་འདུག
མགོན་ཏེའམ། མགོན་པོ་སྐྱིད་ལགས་ཀྱིས་དུས་ཡུན་རིང་པོར་ཡང་ནས་བསྐྱར་དུ་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་ཟེར་བའི་མདུན་དུ། ཁོང་གི་གཅུང་པོ་རྡོ་རྗེ་བཀྲ་ཤིས་ལགས་ཀྱི་ཁྲིམས་ཆད་ལ་བསྐྱར་ཞིབ་བྱེད་དགོས་པའི་དགོས་འདུན་བཏོན་ནས་ཞུ་འབོད་ལས་འགུལ་རབ་དང་རིམ་པར་སྤེལ་ཡོད་ལ། ཕྱི་ཕྱོགས་སུ་འབྱོར་བའི་གནས་ཚུལ་ལྟར་ན། མགོན་པོ་སྐྱིད་ལགས་ཀྱིས་ཞུ་འབོད་ལས་འགུལ་མཐའ་མ་དེ་ཕྱི་ལོ་༢༠༢༤ཟླ་བ་༥ཚེས་༢༨ཉིན་བྱས་འདུག་ལ་དེའི་རྗེས་སུ་སྤྱི་ཟླ་༦པའི་ཚེས་༢༧ཉིན་ཁྲིམས་བཤེར་བྱས་བའི་རྗེས་ནས་ཁོང་མོས་ཞུ་འབོད་ལས་འགུལ་སྤེལ་བའི་གནས་ཚུལ་ཕྱི་ཕྱོགས་སུ་འབྱོར་མེད་པ་མ་ཟད་ཁོང་མོའི་གནས་སྟངས་སོགས་གསལ་ཆ་མེད་པར་གྱུར་འདུག
དེ་སྔ་༢༠༡༠ལོའི་ཕྱི་ཟླ་༦པའི་ཚེས་༢༦ཉིན་ལྷ་སའི་རྒྱ་ནག་གི་འབྲིང་རིམ་མི་དམངས་ཁྲིམས་ཁང་གིས་གསང་བའི་ཁྲིམས་བཤེར་བྱས་པ་བརྒྱུད། ཚོང་པ་རྡོ་རྗེ་བཀྲ་ཤིས་ལགས་སུ་བུ་ལོན་སྔ་གཡར་དང་འབྲེལ་བའི་ངན་ཇུས་བཤམས་པའི་ཉེས་འཛུགས་འོག་ཚེ་བཙོན་གྱི་ཁྲིམས་ཐག་བཅད་ནས་གྲྭ་བཞི་བཙོན་ཁང་དུ་བཀག་སྟེ་ད་ཆ་མི་ལོ་མང་པོ་འགྲོ་བཞིན་པའི་སྐབས་འདིར། རྡོ་རྗེ་བཀྲ་ཤིས་ལགས་ཀྱི་གཅེན་པོ་རྡོ་རྗེ་ཚེ་བརྟན་ལགས་དང་གཅེན་མོ་མགོན་ཏེ་འམ། མགོན་པོ་སྐྱིདལགས། ཁོ་མོའི་ཁྱོ་ག་ཆོས་སྐྱོང་ལགས་གསུམ་གྱིས་ད་བར་ཡང་ནས་བསྐྱར་དུ་རྒྱ་ནག་གི་ཁྲིམས་ཁང་མདུན་སོགས་སུ་དྲང་བདེན་གྱི་ཐག་གཅོད་ཡོང་བའི་ཞུ་འབོད་ལས་འགུལ་རབ་དང་རིམ་པར་སྤེལ་དང་སྤེལ་མུས་ཡིན་ཡང་རྒྱ་ནག་གི་འབྲེལ་ཡོད་ཚན་པས་ད་བར་དུ་ཡ་ལན་བདག་སྤྲོད་བྱས་མེད་པ་རེད།
རྒྱ་ནག་གཞུང་གིས་རྡོ་རྗེ་ཚེ་བརྟན་ལགས་དེ་སྔ་འཛིན་བཟུང་གིས་མི་ལོ་༦བཙོན་འཇུག་ཁྲིམས་ཐག་བཅད་མྱོང་བ་དང་། མགོན་པོ་སྐྱིད་ལགས་ཀྱང་སྔ་རྗེས་སུ་ཐེངས་༥ལ་འཛིན་བཟུང་དང་འདྲི་རྩད་གཅར་རྡུང་ཐེངས་མང་བྱས་བའི་གནས་ཚུལ་ཐོན་ཡོད་པ་རེད།
སྤྱིར་རྒྱ་ནག་གི་རྩ་ཁྲིམས་ནང་བཙོན་མར་ཁྲིམས་ཆད་བཅད་དེ་བཙོན་འཇུག་བྱས་རྗེས་ཟླ་རེར་ནང་མིར་ཐུག་འཕྲད་ཀྱི་དབང་ཆ་ཡོད་པ་བཀོད་ཡོད་ཀྱང་། རྡོ་རྗེ་བཀྲ་ཤིས་ལགས་ཕྱི་ལོ་༢༠༡༨ལོའི་རྗེས་ནས་བཟུང་ནང་མིར་ཐུག་འཕྲད་ཐེངས་གཅིག་ཀྱང་བྱེད་དུ་བཅུག་མེད་པ་རེད།

གསར་འགོད་པ། ཀླུ་འབུམ།
རྩོམ་སྒྲིག་པ། བསྟན་འཛིན་པདྨ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།