སྤྱོད་འཇུག་ཆེན་མོའི་ཆོས་འབྲེལ་མཇུག་བསྒྲིལ་བ།

2016-08-21
གློག་འཕྲིན།
མཆན།
Share
པར་བཀོད།
༸གོང་ས་མཆོག་ནས་ད་ང་ཚོ་དུས་རབས་༢༡ནང་སླེབས་ཡོད།དེ་དང་མཐུན་པ་ཞིག་བྱ་དགོས་པའི་བཀའ་གནང་བ།
༸གོང་ས་མཆོག་ནས་ད་ང་ཚོ་དུས་རབས་༢༡ནང་སླེབས་ཡོད།དེ་དང་མཐུན་པ་ཞིག་བྱ་དགོས་པའི་བཀའ་གནང་བ།
དགའ་ལྡན་ཕོ་བྲང་གི་དྲ་གནས།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཁུལ་ཉིན་བཞིའི་སྤྱོད་འཇུག་ཆེན་མོའི་ཆོས་འབྲེལ་ཁག་ཅིག་མཇུག་བསྒྲིལ་གནང་ཡོད་པ་དང་འཕྲོས་རྣམས་ལོ་རྗེས་མར་གནང་རྒྱུའི་བཀའ་གནང་ཡོད་པ་དང་ཚེས་༢༡ཉིན་བྱམས་སྙིང་གཏེར་ཆེན་གྱི་དགོན་པོ་སྤྱན་རས་གཟིགས་ཐུགས་རྗེ་ཆེན་པོའི་བཀའ་དབང་བཀྲིན་སྩལ་གནང་ཡོད་པ་རེད།
༸གོང་ས་མཆོག་གིས་ཤེས་རབ་སྙིང་པོ་དང་སྤྱོད་འཇུག་སོགས་ཀྱི་ཆོས་བྱེད་སྟངས་སོགས་ཀྱི་སྐོར་བཀའ་སྩལ་དོན། ཆོས་ལ་དད་པ་ཡོད་མཁན་ཚོས་སངས་རྒྱས་པའི་ཆོས་དེ་གང་འདྲ་ཡིན་པ་ཤེས་དགོས་རྒྱུ་ཧ་ཅང་གལ་ཆེན་པོ་རེད། གཞན་ཆོས་ལ་དད་པ་ཡོད་ཀྱང་སངས་རྒྱས་པའི་ཆོས་ཀྱི་ངོ་བོ་དང་ཁྱད་པར་གང་འདྲ་ཡིན་པ་མ་ཤེས་ན། དད་པ་དེ་ཡང་ལམ་དང་ལུགས་སྲོལ་ལྟ་བུ་ཆགས་འགྲོ་བཞིན་ཡོད། ང་ཚོའི་ཕ་མེས་དང་སྤྱི་ཚོགས་ནང་པ་ཡིན་ཟེར་རྒྱུ་ཙམ་མ་གཏོགས་སངས་རྒྱས་པའི་ཆོས་ཀྱི་ངོ་བོ་དང་ཁྱད་པར་ཤེས་དགོས་རྒྱུ་ཧ་ཅང་གལ་ཆེན་པོ་རེད། ཁ་རི་ཁ་ཐུག་ཟོལ་མེད་བྱས་ཏེ་བཤད་ན། དེ་སྔ་བོད་ལ་ཡིན་ནའང་མང་ཚོགས་ཀྱིས་ཆོས་དེ་ཙམ་ཤེས་ཀྱི་མེད། དད་པ་ཡོད་ཀྱང་འདི་ལྟར་བྱས་ནས་འགྲོ་ཡི་ཡོད། ད་ང་ཚོ་དུས་རབས་ ༢༡ ནང་སླེབས་ཡོད། དེ་དང་མཐུན་པ་ཞིག་བྱ་དགོས་པའི་བཀའ་གནང་ཡོད་པ་རེད།
ཆོས་འཆད་ཉན་བྱེད་རྒྱུ་དེ་བློ་བཅོས་ཐབས་ཆེད་ཡིན། དེར་བརྟེན་ཐོག་མར་ཆོས་འཆད་ཉན་བྱེད་སྐབས་ཀུན་སློང་རྣམ་པར་དག་པ་དགོས། ངོས་རང་ཆོས་འཆད་པ་པོ་རེད། ཆོས་འཆད་པ་པོའི་ངོས་ནས་ཚེ་འདིའི་བསྙེན་བཀུར་དང་སྙན་གྲགས་ཀྱི་ཐོག་ནས་ཆོས་བཤད་ན་ཁྲི་འདིའི་སྒང་ནས་སྡིག་པ་བསགས་ཀྱི་ཡོད། ཆོས་འཚོང་གི་ཡོད། དེར་བརྟེན་འཆད་པ་པོའི་ངོས་ནས་བསམ་པ་རྣམ་དག་སྒོ་ནས་བཤད་རྒྱུ་དང་། ཉན་པ་པོའི་ངོས་ནས་ཀྱང་། དཔེར་ན། ༸རྒྱལ་བ་རིན་པོ་ཆེའི་མདུན་ནས་སྤྱོད་འཇུག་གི་ཁྲིད་ཐོབ་སོང་ཞེས་མི་གཞན་ལ་ངའི་ཆོས་བརྒྱུད་དེ་༸རྒྱལ་བ་རིན་པོ་ཆེ་ནས་རྒྱུད་པ་ཞིག་ཡིན་ཞེས་སོ་སོའི་མིང་བཟོ་ཆེད་བསྙེན་བཀུར་དང་སྙན་གྲགས་ཀྱི་བསམ་བློ་བཏང་ནས་ཕྱིན་ན་སྡིག་པ་གསོག་གི་ཡོད། ངོས་ཀྱི་ངོས་ནས་སེམས་པ་རྣམ་དག་ཅིག་གི་སྒོ་ནས་འཇིག་རྟེན་ཆོས་བརྒྱད་ཀྱི་རེ་དོགས་ཀྱི་བསམ་བློ་མེད་པར་བཤད་རྒྱུ་དང་། ཁྱེད་རང་ཚོའི་ངོས་ནས་འཇིག་རྟེན་ཆོས་བརྒྱད་ཀྱི་རེ་དོགས་ཀྱི་བསམ་བློ་མེད་པ་བྱས་ན། ཆོས་ཆོས་སུ་སོང་བ། སྐབས་འདིར་ཆོས་དེ་ཡང་བྱང་ཆུབ་སེམས་པའི་སྡེ་སྣོད་ཀྱི་ཆོས་ཆགས་བསྡད་ཡོད། བྱང་ཆུབ་སེམས་པའི་ཆོས་དེ་བྱང་ཆུབ་སེམས་པའི་ཆོས་སུ་སོང་རྒྱུར་ཀུན་སློང་ལ་རགས་ལས་ཡོད།བླ་མ་དང་སློབ་མ་གཉིས་ཀས་ཀུན་སློང་ཡག་པོ་ཞིག་བཅོས། སངས་རྒྱས་ཆོས་ཚོགས་ཀྱི་ངོ་བོ་ཡག་པོ་ཞིག་ཤེས་པའི་སྒོ་ནས་ཆོས་འཆད་ཉན་དགོས་ལུགས་བཀའ་གནང་ཡོད་པ་སོགས་ཀྱི་གནས་ཚུལ་ཐོན་བཞག།
གསར་འགོད་པ་ཕྲེང་རིན་བསྟན་ནོར།

མཆན། (0)
Share
དྲ་གནས་ཆ་ཚང༌།