མིའི་ལྷན་སྐྱེས་ཀྱི་རང་བཞིན་དེ་བྱམས་དང་སྙིང་རྗེ་ཡིན། ༸གོང་ས་མཆོག

གདན་ས་གྲྭ་ཚང་ཁག་ནི་འཛམ་གླིང་ཞི་བདེ་སྒྲུབ་ཐབས་ཀྱི་ས་བོན་ལྟ་བུ་ཞིག་ཡིན་དུས་ད་བར་ཤུགས་བརྒྱབ་ཡོད་པ་དང་ད་དུང་མུ་མཐུད་ནས་ཤུགས་སྣོན་རྒྱག་དགོས་ཞེས་གོང་ས་མཆོག་གིས་བཀའ་སློབ་སྩལ་གནང་མཛད་ཡོད་པ་རེད། དེ་ཡང་ཕྱི་ཚེས་༡༩ཉིན་༸གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་ལྷོ་ཕྱོགས་མོན་གྷོ་འདོད་དགུ་གླིང་དགའ་ལྡན་ཤར་རྩེ་ཐོས་བསམ་ནོར་གླིང་གྲྭ་ཚང་དུ་སྐྱབས་རྗེ་དགའ་ལྡན་ཁྲི་རིན་པོ་ཆེ་དབུས་པའི་སེར་སྐྱ་མང་ཚོགས་ལ་ལམ་སྟོན་བཀའ་སློབ་གནང་སྐབས།    སྤྱིར་སངས་རྒྱས་ཀྱི་ཆོས་དང་། ཡང་སྒོས་སུ་དཔལ་ན་ལཎ་ཌ་ནས་བརྒྱུད་པའི་ལེགས་བཤད་དེ་དག་ཧ་ལས་པ་ཞིག་རེད་ལ། ཆོས་ལ་དད་པ་མེད་མཁན་ཚོར་ཡང་ཕན་ཐོགས་ཡོད་ན། འཛམ་གླིང་འདི་བཞིན་བདེ་སྐྱིད་དང་ལྡན་པ་ཞིག་བསྐྲུན་པར་རེ་བ་ཡོད་ཅེས་དང་།

ཡང་གོང་ས་མཆོག་གིས།   འཛམ་གླིང་འདིའི་ཐོག་གི་དཀའ་ངལ་ཚང་མ་རང་གཅེས་འཛིན་ནས་བྱུང་བ་ཞིག་ཡིན་པ་དང་།  མིའི་ལྷན་སྐྱེས་ཀྱི་རང་བཞིན་དེ་བྱམས་དང་སྙིང་རྗེ་ཡིན་པས། ཤེས་རབ་ཀྱི་ཐོག་ནས་རང་གཅེས་འཛིན་ལ་སྐྱོན་དུ་བལྟས་ནས་གཞན་གཅེས་འཛིན་གྱི་ཡོན་ཏན་ལ་སློབ་སྦྱོང་བྱས་པ་ཡིན་ན། འཛམ་གླིང་འདི་ཞི་བདེ་ཡོང་གི་རེད་ཅེས་་གསུངས་ཡོད་པ་རེད།  ཡང་ཕྱི་ཚེས་༢༠ཉིན་འཇམ་མགོན་བླ་མ་ཙོང་ཁ་པ་ཆེན་པོ་དགོངས་པ་རྫོགས་ནས་ལོ་ངོ་༦༠༠འཁོར་བའི་རྗེས་དྲན་དང་འབྲེལ། རྒྱལ་སྤྱིའི་མཁས་པའི་བགྲོ་གླེང་གི་ཚོགས་མགོན་དུ་དབུ་བཞུགས་གནང་རྒྱུ་ཡིན་པ་རེད་འདུག།