༧གོང་ས་མཆོག་གིས་ཁེ་ཎ་ཌའི་ནང་གི་མཛད་འཕྲིན།

༄༅༎ཕྱི་ཟླ་ ༤ ཚེས་ ༢༧ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཁེ་ན་ཌའི་གྲོང་ཁྱེར་ཨོ་ཊ་ཝའི་ནང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་དྲུག་པའི་དབུ་འབྱེད་མཛད་སྒོའི་ཐོག་བཀའ་སློབ་སྩལ་གནང་མཛད་ཡོད་པ་དང༌། ཡང་ཉིན་དེར་མགོན་པོ་གང་ཉིད་མཆོག་གིས་ཁེ་ན་ཌའི་བརྙན་འཕྲིན་ CTV Ottawa ཞེས་པའི་ལས་རིམ་གཙོ་སྐྱོང་བ་གེརེ་ཧེམ་རི་ཆདྲ་སེན་གྱིས་བཀའ་འདྲི་དགོངས་སྐོར་ཞུས་པ་ཁག་ལ་བཀའ་ལན་བསྩལ། དེ་རྗེས་༸གོང་ས་མཆོག་གིས་ཨོ་ཊ་ཝ་གཙུག་ལག་སློབ་གྲྭ་ཆེན་མོར་ཆིབས་སྒྱུར་བསྐྱངས་ཏེ་དགེ་ལས་སློབ་ཕྲུག་ཚོར་ནང་གཤིས་རྒྱུད་དང་འབྲེལ་བའི་སློབ་སྦྱོང། ཞེས་པའི་བརྗོད་གཞིའི་ཐོག་བཀའ་སློབ་བསྩལ་རྗེས་སློབ་ཕྲུག་ཁག་ཅིག་གི་དྲི་བར་བཀའ་ལན་མཛད། ཉིན་གུང་ལྗགས་སྨིན་གྲུབ་བསྟུན་མགོན་པོ་གང་ཉིད་མཆོག་གིས་ཁེ་ན་ཌའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་དང་མཇལ་འཕྲད་མཛད་དེ་མགོན་པོ་གང་ཉིད་མཆོག་སྤྱིར་བཏང་བོད་མིའི་ཆབ་སྲིད་དབུ་ཁྲིད་ཀྱི་ཐུགས་འགན་ནས་བགྲེས་ཡོལ་ཞུས་ཟིན་ནའང་། གོ་སྐབས་དེ་བསྟུན་ནས་ཁོང་རྣམ་པས་བོད་དོན་ཆེད་ལྷག་བསམ་ཆེ་བསྐྱེད་ཐོག་རྒྱབ་སྐྱོར་གནང་བར་བོད་མི་ས་ཡ་དྲུག་གི་ཚབ་ཞུས་ཏེ་ཐུགས་རྗེ་ཆེ་ཞུས་གནང་འདུག། དེ་རྗེས་༸གོང་ས་མཆོག་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེང་ཐེངས་དྲུག་པ་ཚུགས་ཡུལ་གྱི་ཚོགས་ཁང་དུ་ཆིབས་སྒྱུར་བསྐྱངས་ཏེ།ཐོག་མར་ཁེ་ན་ཌ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཀོན་སིག་ལིཡོ་ཌི་ནི་ནོ་མཆོག་གིས་ཚོགས་འདུར་ཕེབས་པའི་སྐུ་མགྲོན་རྣམ་ལ་འཚམས་འདྲི་ཞུས་གནང་བ་དང༌།  དེ་རྗེས་ཁེ་ན་ཌའི་མི་སེར་དང་ཕྱི་མི་གཞིས་སྤོས་ལས་ཁུངས་ཀྱི་བློན་ཆེན་སྐུ་ཞབས་ཇེ་སེན་ཀྲི་ཀེ་ནི་ཌི་ཡིས་༸གོང་ས་མཆོག་ལ་འཚམས་འདྲི་ཞུས་ཡོད་ཅིང༌། ཁོང་གིས་ ཁེ་ན་ཌའི་མི་སེར་ཡིན་པའི་བོད་རིགས་ཚོས་ཁེ་ན་ཌའི་སྤྱི་ཚོགས་ལ་ཞབས་འདེགས་གྲུབ་པར་ཡུལ་དེའི་གཞུང་ལ་བློ་སྤོབས་ཡོད་སྐོར་སྙན་སྒྲོན་ཞུས་པ་མ་ཟད། ཆོས་ལུགས་རང་དབང་སྲུང་སྐྱོབ་ཆེད་ཁེ་ན་ཌའི་གཞུང་འབྲེལ་ལས་ཁུངས་གསར་པ་ཞིག་འགོ་འཛུགས་བྱ་རྒྱུ་ཡིན་སྐོར་དང་བོད་ཀྱི་གནད་དོན་སེལ་ཆེད་ཁེ་ན་ཌ་སྲིད་གཞུང་གིས་བོད་རྒྱ་གྲོས་མོལ་ཡོང་རྒྱུར་རྒྱབ་སྐྱོར་མུ་མཐུད་ཞུ་རྒྱུ་ཡིན་སྐོར་སོགས་སྙན་སྒྲོན་ཞུས་འདུག།
གོང་ཞུས་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་སར་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་ཆེན་དང་འབྲེལ་བའི་གནད་དོན་གཙོ་བོ་གཉིས་ཀྱི་ཐོགས་བཀའ་སློབ་བསྩལ་གནང་མཛད་ཡོད་ཅིང༌། ༧གོང་ས་མཆོག་ནས་གནད་དོན་དང་པོ་ བོད་ཀྱི་ཁོར་ཡུག་གནད་དོན་དེ་བཞིན་བོད་ཀྱི་ཆབ་སྲིད་ཀྱི་གནད་དོན་ལས་ཛ་དྲག་པ་ཆགས་ཡོད་སྐོར་བཀའ་གནང་སྟེ། ཆབ་སྲིད་ཀྱི་གནད་དོན་དེ་བཞིན་ཆབ་སྲིད་འགོ་ཁྲིད་ཚོས་མོས་མཐུན་བྱུང་མཚམས་སེལ་ཐུབ་རྒྱུ་ཞིག་ཡིན་ནའང་ཁོར་ཡུག་ལ་གོད་ཆག་ཕོག་པ་རྣམས་ཉམ་གསོ་ཐུབ་རྒྱུ་མིན་སྐོར་བཀའ་གནང་ཡོད་པ་མ་ཟད། གནད་དོན་གཉིས་པ་ ནང་པ་སངས་རྒྱས་པའི་ཆོས་དང་འབྲེལ་བའི་བོད་མིའི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་བྱ་རྒྱུ་དེ་ཡིན་པ་དང༌། བོད་བརྒྱུད་ནང་བསྟན་དེ་བོད་མི་ཙམ་མ་ཟད། འཛམ་གླིང་མི་མང་སྤྱི་ལ་ཕན་ཐོགས་ཡོད་པ་གཅིག་དང། ནང་པ་མིན་པ་ཞིག་ལའང་ཕན་ཐོགས་ཡོད་སྐོར་བཀའ་སློབ་སྩལ་གནང་མཛད་ཡོད་པ་རེད།