རྒྱལ་དབང་ཀརྨ་པ་མཆོག་གིས་༧གོང་ས་༧སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་རྗེས་དགའ་སྐྱོ་ཟུང་སྦྲེལ་གྱི་ཐུགས་ཚོར་ཧ་ཅང་ཆེན་པོ་ཞིག་བྱུང་པ་གསུངས་འདུག

༸དཔལ་རྒྱལ་དབང་ཀརྨ་པ་རིན་པོ་ཆེ་ཨོ་རྒྱན་འཕྲིན་ལས་རྡོ་རྗེ་མཆོག་གིས་ཕྱི་ཟླ་ ༨ ཚེས་ ༢༥ ཉིན་སུད་སི་ཛུ་རིག་གྲོང་ཁྱེར་གྱི་ཧིལ་ཊོན་གསོལ་མགྲོན་ཁང་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁ་ཞུས་སྐབས། ཡིད་ལ་དུང་བ་དང་བཀའ་དྲིན་དྲན་པའི་ཐུགས་བསམ་འཁོར་གནང་བྱུང་པ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་རིན་པོ་ཆེ་མཆོག་གི་ངོ་དེབ་སྤྱི་ཚོགས་དྲྭ་རྒྱའི་ཐོག་ལ་མཇལ་ཞུའི་སྐུ་པར་དང་བཅས་ཕྱི་ཟླ་ ༨ ཚེས་ ༢༨ ཉིན་ཐུགས་དགའ་སྐྱོ་ཟུང་སྦྲེལ་གྱི་ཐུགས་ཚོར་གསུངས་འདུག

དེ་ཡང་ཀརྨ་པ་རིན་པོ་ཆེ་མཆོག་གིས་ངོ་དེབ་ཐོག་ལ་བཀོད་དོན་དུ། “ད་ལམ་སུད་སིའི་གྲོང་ཁྱེར་ཛུ་རིག་ཏུ་༧སྐྱབས་མགོན་དོན་གྱི་བདག་པོའི་དགྱེས་ཞལ་སླར་ཡང་མཇལ་ནས། གསུང་གི་བདུད་རྩི་མཉན་པའི་སྐལ་བཟང་མངོན་དུ་གྱུར་པས་ཡིད་ལ་དགའ་སྐྱོ་ཟུང་འབྲེལ་གྱི་ཉམས་ཤིག་སྐྱེས། ནམ་རྒྱུན་བརྙན་འཕྲིན་སོགས་ནས་མཇལ་བ་དང་མི་འདྲ་བར་ད་རེས་ཞལ་གྱི་དཀྱིལ་འཁོར་དངོས་སུ་མཇལ་སྐབས་སྐུ་བགྲེས་ཉམས་ཆེ་ཞིང་། ཐ་ན་ཞལ་འཕྲོས་མཛད་དུས་ཀྱང་གསུང་ཤུགས་ཞན་པ་སོགས་སྔར་དང་གཏན་ནས་མི་འདྲ་བས་བློས་མི་བཟོད་པ་ཆེན་པོ་བྱུང་ཞིང་། ༧མགོན་པོ་གང་གིས་སྐུ་གསུང་ཐུགས་ཀྱི་ཟུངས་སྟོབས་ཡོད་ཚད་ངེད་ཅག་གི་དོན་དུ་བཏང་ནས། ད་ལྟ་སྐུ་ལུས་ཉམ་ཆུང་བ་འདི་ལྟ་བུ་ཞིག་ཏུ་གྱུར་པ་དེས་ཡིད་ལ་གདུང་བ་དང་། བཀའ་དྲིན་དྲན་པའི་བསམ་པ་གཉིས་ཕན་ཚུན་འགྲན་པ་བཞིན་དུ་སྐྱེ་བ་ཞིག་བྱུང་” ཞེས་དང་། “སྐུ་གཟུགས་ཀྱི་གནས་སྟངས་དང་། སྐུ་ཐང་ཆད་པའི་ཉམས་འགྱུར་དེས་གཞན་མང་པོ་ཞིག་ངག་ནས་མ་ཐོན་ཀྱང་། བསྟན་དང་འགྲོ་བའི་དོན་དུ་སྐུ་ཚེ་ཞབས་པད་བརྟན་རྒྱུ་ལས་ལྷག་པའི་དོན་ཞིག་མེད་ལུགས་ཞུས་ཤིང་། གཞན་ཞུ་བའི་རིགས་ཐམས་ཅད་ཡིག་ཐོག་ཏུ་བྲིས་ནས་ཕུལ་བ་ལ་སྐར་མ་བཅུ་ཙམ་རིང་གཟིགས་རྟོག་ཞིབ་མོ་མཛད་ནས། ༧མགོན་པོ་གང་ཉིད་དགུང་ལོ་བརྒྱ་དང་བཅུ་གྲངས་བཞུགས་རྒྱུའི་ལུང་བསྟན་ཡོད་ཚུལ་དང་། ཐུགས་བཞེད་གཙོ་བོ་རྒྱ་ནག་རི་བོ་རྩེ་ལྔར་གནས་སྐོར་ལ་ཕེབས་རྒྱུ་དང་། ཐེག་པ་ཆེ་ཆུང་སྔགས་དང་བཅས་པའི་བསྟན་པ་ཆ་ཚང་བ་འདི་འདྲ་བོད་གངས་ཅན་ལྗོངས་ལས་གཞན་ལ་མེད་པའི་ཁྱད་ནོར་ཡིན་པས། དེ་ཉིད་འཛིན་སྐྱོང་སྤེལ་གསུམ་བྱ་རྒྱུ་གལ་ཆེར་མཛད་ལུགས་ཀྱི་བཀའ་ཕེབས་” ཞེས་བཀོད་འདུག
རྒྱལ་དབང་ཀརྨ་པ་མཆོག་ལ་ད་རེས་༧གོང་ས་༧སྐྱབས་མགོན་ཆེན་པོ་མཆོག་གི་ཞལ་མཇལ་བ་དང་། གསུང་ཐོས་པ་དེས་སེམས་ལ་དཀོན་པའི་འདུ་ཤེས་སྔར་དང་མི་འདྲ་བ་ཞིག་སྐྱེས་པར་མ་ཟད། ༧སྐྱབས་མཆོག་གང་གིས་སྐུ་ཚེ་འདིར་ཐུགས་ལ་ཅི་བཞེད་པའི་དགོངས་པ་མཐའ་དག་འཕྲལ་དང་མྱུར་དུ་སྒྲུབ་དགོས་པ་ལས། ཕྱིར་བཤོལ་དང་ལྷོད་གཡེང་བྱེད་པའི་དུས་ཚོད་མེད་པ་ལྟ་བུ་ཞིག་མཇལ་” ཞེས་བཀོད་འདུག་པར་མ་ཟད། “༧མགོན་པོ་གང་གིས་བདག་ཅག་གི་དོན་དུ་སྐུ་ངལ་འོ་བརྒྱལ་བསམ་གྱིས་མི་ཁྱབ་པ་མཛད་ཟིན་ཅིང་། ད་ནི་སྐུ་ནའི་བབས་དང་། སྐུ་གཟུགས་ཀྱི་གནས་སྟངས་སོགས་ལ་གཞིགས་ན་སྐུ་ངལ་གསོ་རྒྱུ་དང་། སྐུའི་འཕྲོད་གཞེས་གནང་རྒྱུ་ལས་ལྷག་པའི་དོན་ཆེན་ཞིག་མེད་པས། དེ་ལ་རང་གཞན་ཚང་མས་བསམ་ཤེས་དང་དོ་ཁུར་ངེས་པར་མཛད་དགོས་པར་འདུག ལྷག་པར་༧མགོན་པོ་གང་ཉིད་སྐུ་འཚོ་ཞིང་གཞེས་པ་འདིའི་རིང་ལ་ཕ་ཡུལ་གངས་ཅན་གྱི་ལྗོངས་སུ་ཆིབས་ཞལ་བསྒྱུར་ནས། ཞབས་སེན་ས་ལ་རེག་པ་ཙམ་གྱིས་ཀྱང་གཞིས་ལུས་བོད་མི་ཤི་གསོན་ཐམས་ཅད་ཀྱི་རེ་བ་རྫོགས་ཤིང་། བླ་མའི་ཐུགས་དགོངས་འགྲུབ་པ་ཞིག་འོང་བར་འདུག་པས། རང་རིགས་ཕུ་ནུ་མིང་སྲིང་ཐམས་ཅད་ནས་མཐུན་ལམ་དཀར་འཇམ་ཡུག་གཅིག་གིས་༧རྒྱལ་བའི་དགོངས་པ་མྱུར་དུ་འགྲུབ་པའི་མཐུན་འགྱུར་གྱི་ཞབས་འདེགས་དང་། ཐ་ན་བསྔོ་བ་སྨོན་ལམ་ཚུན་ཆད་ཉིན་མཚན་ལྟོས་མེད་དུ་འདེབས་དགོས་པའི་དུས་གལ་པོ་ཆེ་ལ་སླེབས་འདུག་”ཅེས་བཀོད་འདུག

རྒྱལ་དབང་ཀརྨ་པ་མཆོག་གིས་བོད་མི་མང་ཚོགས་ལ་བླང་དོར་བཀའ་སློབ་ཀྱི་ཚུལ་དུ་བཀའ་གནང་དོན། ཆོལ་ཁ་ག་གེ་མོ། ཆོས་ལུགས་ཆེ་གེ་མོ། ལྟ་བ་དང་ལངས་ཕྱོགས་ཉོག་གེ་མོ་སོགས་ཅི་ཡིན་ཀྱང་རུང་། བོད་སྤྱི་ཡི་ཕན་བདེའི་དོན་དུ་ཆེ་བཞག་ཆུང་བསྐྱུར་མཛད་དེ། གསེར་དང་ར་གན་མ་ནོར་བ། ཙནྡ་ཐལ་བར་བཟོས་ནས་མ་འཚོང་བ་ཞིག་གལ་ཆེ་བར་འདུག་ཅེས་དང་། གཙོ་བོ་བླ་མ་ཡིད་བཞིན་གྱི་ནོར་བུ་འདི་ལྟ་བུ་ཡོད་པ་ཐུགས་ལ་བཞག་ནས་བསྟན་པའི་སྤྱི་དོན་དང། བོད་མིའི་བདེ་དོན་ལ་གདུང་ཤུགས་ཆེར་བསྐྱེད་མཛད་པར་ཞུ་ཞེས་ངག་ནས་ཐལ་ལོ་” ཞེས་བླང་དོར་གྱི་ལམ་སྟོན་མཛད་འདུག

༧དཔལ་རྒྱལ་དབང་༧ཀརྨ་པ་རིན་པོ་ཆེ་ཨོ་རྒྱན་འཕྲིན་ལས་རྡོ་རྗེ་མཆོག་དགུང་ལོ་བཅུ་བཞིའི་སྟེང་། ཕྱི་ལོ་ ༢༠༠༠ ཟླ་ ༡ པོའི་ནང་བོད་ནས་རྒྱ་གར་ནང་ཆིབས་སྒྱུར་གནང་སྟེ་ལོ་ངོ་བཅོ་བརྒྱད་ཙམ་གྱི་རིང་རྒྱ་གར་དུ་བཞུགས་གདན་འཇགས་ཡོད་པ་དང་། ཕྱི་ལོ་ ༢༠༡༧ ལོ་ནས་༧སྐུའི་འཕྲོད་བཞེས་ཀྱི་ཆེད་ཨ་མི་རི་ཀའི་ནང་ཆིབས་བསྒྱུར་དང་སྦྲགས། གཙོ་ཆེར་ནུབ་ཕྱོགས་ཡུལ་གྲུ་ཁག་གི་ནང་འགྲོ་དོན་རྒྱ་ཆེ་བསྐྱངས་ཏེ་བཞུགས་མུས་སུ་ཡིན་པ་རེད།།

གསར་འགོད་པ། བདེ་སྐྱིད་ཀུན་སྒྲོལ།
རྩོམ་སྒྲིག་པ། བསྟན་འཛིན་པདྨ། བཀྲིས་དབང་ཕྱུག
དྲྭ་ཐོག་རྩོམ་སྒྲིག་པ། བཀྲིས་དབང་ཕྱུག
དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།