རྒྱ་བོད་ཧོར་གསུམ་དུ་སངས་རྒྱས་ཀྱི་བསྟན་པ་ཉམས་པ་སོར་ཆུད་དང་མི་ཉམས་གོང་འཕེལ་གྱི་སྨོན་ལམ་དང་འབད་བརྩོན་གནང་གི་ཡིན་ཞེས། ༸གོང་ས་མཆོག་གིས་ཐེ་ཝན་གྱི་རྒྱ་རིགས་ཆོས་ཞུ་བ་ཚོར་བཀའ་སྩལ་ཡོད་པ།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ཕྱི་ཟླ་ ༩ པའི་ཚེས་ ༣༠ ཉིན་ལམ་གཙོ་རྣམ་གསུམ་དང་སེམས་བསྐྱེད་ཀྱི་ཆོས་འབྲེལ་བཅས་གནང་གྲུབ་སྟེ། ཕྱི་ཟླ་ ༡༠ པའི་ཚེས་ ༡ ཉིན་ཐེ་ཝན་གྱི་རྒྱ་རིགས་དད་ལྡན་ཚོས་མགོན་པོ་གང་ཉིད་ལ་བརྟན་བཞུགས་བསྟར་འབུལ་གནང་ཡོད་ཅིང་། སྐབས་དེར་༸གོང་ས་མཆོག་གིས་“ངས་དུས་གཏན་དུ་རྒྱ་བོད་ཧོར་གསུམ་ལ་སངས་རྒྱས་ཀྱི་བསྟན་པ་ཉམས་པ་སོར་ཆུད་དང་མི་ཉམས་གོང་འཕེལ་ཞིག་ཡོང་བའི་སྨོན་ལམ་བརྒྱབ་བསྡད་ཡོད་ཅིང་། དེང་སང་རྒྱ་ནག་གི་ས་ཁུལ་དུ་རྒྱ་རིགས་མི་མང་ནང་ནང་ཆོས་ལ་དོ་སྣང་ཤུགས་ཆེན་པོ་འགྲོ་བསྡད་པ་ཞིག་དངོས་སུ་ཡོད་བསྡད་པ་དང་། མ་འོངས་པར་ངའི་ངོས་ནས་རྒྱ་ཧོར་བོད་གསུམ་ལ་ཐེག་པ་ཆེ་ཆུང་སྔགས་དང་བཅས་པ་ཆ་ཚང་བ་ཡག་པོ་ཞིག་ཡོང་ཐུབ་པར་འབད་བརྩོན་དང་སྨོན་ལམ་ཡོད་”པ་བཀའ་གནང་གི་འདུག

ཡང་བརྟན་བཞུགས་ཕུལ་མི་ཚོར་མགོན་པོ་གང་ཉིད་ཀྱི་མཚན་ལམ་ལ་བརྟགས་ན་དགུང་ལོ་བརྒྱ་དང་བཅུ་གྲངས་ཤིག་བཞུགས་རྒྱུའི་རྟགས་མཚན་ཡོད་པ་སོགས་བཀའ་ཕེབས་པ་དང་མཚུངས་སུ།“ང་ཚོ་བོད་ལ་དེ་སྔ་ཐེག་པ་ཆེ་ཆུང་སྔགས་དང་བཅས་པ་ཆ་ཚང་བ་ཞིག་ཡོད་པ་རེད་དེ། སྐབས་རེར་ཆོ་ག་ཕྱག་ལེན་གྱི་ཟོལ་མ་གཏོགས་དོན་དག་ངོ་མའི་ཐོག་ལ་བསམ་བློ་བཏང་སྟེ་འགྲེལ་བཤད་བརྒྱབ། སྒོམ་ཉམས་ལེན་བཅས་ཉུང་ཉུང་གིས་ཆོ་ག་ཕྱག་ལེན་གྱི་སྟེང་འགྲོ་བསྡད་པ་ནི་རྗེས་ལུས་ཀྱི་རྣམ་པ་རེད། ང་ཚོས་མ་འོངས་པར་རྒྱུ་མཚན་ཡག་པོ་ཤེས་པའི་ཐོག་ནས་ཆོས་ཉམས་ལེན་བྱས་ན་སྤུས་དག་པོ་ཡོང་གི་རེད་”ཅེས་བཀའ་གནང་གི་འདུག

ཐེ་ཝན་གྱི་རྒྱ་རིགས་ཚོས་བརྟན་བཞུགས་ཕུལ་བ་དང་གསུང་ཆོས་ཞུ་ཐུབ་པར། མིག་ཆུ་བཏོན་ཏེ་སེམས་ཚོར་ཧ་ཅང་ཆེན་པོས་དགའ་སྤྲོ་གནང་གི་འདུག་པས། ཐེ་ཝན་གྱི་ཆོས་ཞུ་བ་ཁྲིན་ཐེའེ་རུའུ་ལགས་ནས་འགྲེལ་བརྗོད་གནང་དོན་ལ། ང་ཚོ་རྒྱ་གར་རྡ་རམ་ས་ལར་ཡོང་སྟེ་༸གོང་ས་མཆོག་དགུང་ལོ་དགུ་བཅུར་ཕེབས་པའི་བརྟན་བཞུགས་ལ་བཅར་རྒྱུ་བྱུང་བར་ཧ་ཅང་དགའ་སྤྲོ་བྱུང་བ་དང་། ང་ཚོའི་རེ་བར་འཛམ་གླིང་ཡོངས་ལ་༸གོང་ས་མཆོག་གི་རླབས་ཆེན་གྱི་དགོངས་པས་ཁྱབ་པ་དང་། ༸གོང་ས་མཆོག་གི་སྐུ་གཟུགས་བདེ་ཐང་དང་ཐུགས་སེམས་སྤྲོ་བོ་ཡོང་བའི་སྨོན་འདུན་ཡོད། ཡང་ཐེ་ཝན་གྱི་ནང་ཆོས་སློབ་གཉེར་བ་ཐེའོ་མེ་ལིན་ལགས་ནས་རྒྱ་རིགས་གཞོན་སྐྱེས་མང་པོས་ནང་ཆོས་ལ་དོན་གཉེར་གནང་བཞིན་པར། མོ་རང་སེམས་འགུལ་ཆེན་པོ་ཐེབས་པ་འགྲེལ་བརྗོད་གནང་དོན་ལ། ང་རང་ལ་ད་རེས་སེམས་འགུལ་ཤུགས་ཆེ་ཐེབས་པའི་ཚོར་བ་བྱུང་། ད་ལན་ང་ཚོའི་རུ་ཁག་ནང་ཆོས་ཞུ་བ་གསུམ་ཆ་གཅིག་ཙམ་གཞོན་སྐྱེས་ཞེ་གཅིག་ཡིན་པ་མ་ཟད། ཁོང་ཚོས་ནང་ཆོས་ལ་དོན་གཉེར་ཆེན་པོ་དང་ཁ་ཤས་ཐོག་དང་པོར་བཅར་བའི་གྲས་ཡིན་ལ། ངོ་དེབ་སྟེང་གཞོན་སྐྱེས་མང་པོ་ཞིག་གསུང་ཆོས་འདི་ལ་ཡོང་འདོད་ཧ་ཅང་ཤུགས་ཆེ་བསྟན་གྱི་འདུག་པས་སེམས་འགུལ་ཆེན་པོ་ཐེབས་བྱུང་ལ། གཞོན་རབས་ཚོས་གསུང་ཆོས་ཅི་མང་མཇལ་ཐུབ་པའི་རེ་བ་ཡོད་ཅེས་དང་།ཡང་ཐེ་ཝན་གྱི་རྒྱ་རིགས་ཡཱང་ཅའ་ཤན་ལགས་འགྲེལ་བརྗོད་གནང་དོན་ལ། ང་ཚོ་དེ་རིང་འདིར་༸གོང་ས་མཆོག་ལ་བརྟན་བཞུགས་བསྟར་འབུལ་དུ་ཞུགས་ཐུབ་པར་ཧ་ཅང་དགའ་སྤྲོ་བྱུང་བ་དང་། ད་རེས་ང་ཚོའི་རུ་ཁག་ལ་ཁྱོན་བསྡོམས་པའི་མི་གྲངས་ ༥༠ ལྷག་ཡོད་པ་ཚོས།མགོན་པོ་གང་ཉིད་སྐུ་ཚེ་ཡུན་རིང་བརྟན་པའི་སྨོན་ལམ་འདེབས་ཀྱི་ཡོད། གཞན་ཐེ་ཝན་གྱི་རྒྱ་རིགས་ཟི་ཞོ་མེ་ལགས་ནས་སེམས་འགུལ་ཚད་མེད་དང་བཅས་ཏེ་འགྲེལ་བརྗོད་གནང་དོན་ལ། ལོ་བཅུ་གྲངས་ཤིག་གི་སྔོན་ང་རང་བོད་བརྒྱུད་ནང་བསྟན་ལ་ཞུགས་ཏེ་༸གོང་ས་མཆོག་ངོ་ཤེས་པ་ནས་བཟུང་། ༸གོང་ས་མཆོག་གི་རྗེས་སུ་ཞུགས་ནས་དུས་ཚོད་ནམ་ཡོད་ལ་མགོན་པོ་གང་ཉིད་ཀྱི་གསུང་ཆོས་ལ་ཡོང་གི་ཡོད་པས།ཧ་ཅང་བསྐལ་བ་བཟང་པོ་དང་སེམས་འགུལ་ཤུགས་ཆེ་ཐེབས་ཀྱི་འདུག་ཅེས་དང་། གསུང་ཆོས་འདི་ལ་ཐེ་ཝན་གྱི་རྒྱ་རིགས་ཆིག་སྟོང་སུམ་བརྒྱ་ལྷག་ཆེད་བཅར་གནང་བའི་མུར། ཡོ་རོབ་དང་ཨ་མི་རི་ཀ ཨུ་རུ་སུ་དང་དཀྱིལ་ཤར་ཡུལ་གྲུ་ཁག ཨེ་ཤེ་ཡ་སོགས་ནས་ཕྱི་ནང་གི་མི་མང་ལྔ་སྟོང་བརྒལ་ཙམ་ཆེད་དུ་བཅར་ཡོད་པ་རེད།

གསར་འགོད་པ། བློ་བྷེ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།