ད་ལྟའི་འཛམ་གླིང་འདིར་དམག་འཁྲུག་དང་གོ་མཚོན་ལ་དང་དོད་ཤུགས་ཆེ་བྱེད་བཞིན་པའི་སྐབས་འདིར། ང་ཚོས་འཛམ་གླིང་འདི་བྱམས་བརྩེས་འཚོ་ཐུབ་པ་ཞིག་ཡོང་ཐབས་གནང་དགོས་ཞེས། ༧གོང་ས་མཆོག་གིས་ཐེ་ཝན་གྱི་ཆོས་ཞུ་བ་ཚོར་བཀའ་སྩལ་ཡོད་པ།

ཐེ་ཝན་གྱི་རྒྱ་རིགས་དད་ལྡན་ཆོས་ཞུ་བ་ཆིག་སྟོང་སུམ་བརྒྱ་བརྒལ་བ་ནས་གསོལ་འདེབས་ཞུས་དོན་ལྟར། ༧གོང་ས་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ཕྱི་ཟླ་༩པའི་ཚེས་༣༠ནས་ཉི་མ་གཉིས་རིང་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་བཀའ་ཆོས་དབུ་འཛུགས་ཀྱི་སྐབས། དེར་འདུས་ཆེད་དུ་བྱ་བའི་གདུལ་བྱ་ཐེ་ཝན་གྱི་རྒྱ་རིགས་གཙོས་པའི་ཕྱི་ནང་རྒྱལ་ཁབ་འདྲ་མིན་གྱི་ཆོས་ཞུ་བ་བཞི་སྟོང་བརྒལ་བར།“ད་ལྟའི་འཛམ་གླིང་འདིར་དམག་འཁྲུག་དང་འཛམ་གླིང་ཤར་ནུབ་ལྷོ་བྱང་གང་སར་བལྟས་ན་གོ་མཚོན་ལ་དང་དོད་ཤུགས་ཆེར་བྱེད་བཞིན་པའི་གནས་སྐབས་འདིར། ང་ཚོས་འཛམ་གླིང་འདི་བྱམས་བརྩེས་འཚོ་ཐུབ་པ་ཞིག་ཡོང་ཐབས་གནང་དགོས་པ་དང་། ད་ལྟ་ཕན་ཆད་ཀྱི་ཉམས་མྱོང་ལ་གོ་མཚོན་ཐོགས་ནས་རྩོད་པ་བྱས་པ་དེས། མི་མང་པོ་ཤི་རྨས་འགྲོ་བའི་སྡུག་བསྔལ་མྱོང་བ་མ་གཏོགས་གྲུབ་འབྲས་ཅི་ཡང་མེད་པ་”བཀའ་སྩལ་གནང་གི་འདུག

ཡང་མགོན་པོ་མཆོག་ནས་བོད་ལ་ཡོད་པའི་ཆོས་ནི་ཁ་ཙམ་ཚིག་ཙམ་ཞིག་རྩ་བ་ནས་མ་རེད། དོན་དངོས་ཀྱི་ཐོག་བསམ་བློ་གཏོང་ས་གཏིང་ཟབ་ཡོད་པ་དང་། ཆོས་ཕྱོགས་ནས་གསུང་བ་དེ་དེང་སང་ཚན་རིག་དང་ཡང་སྦྲེལ་ཏེ་བོད་ཀྱི་ནང་པའི་ཆོས་ཀྱི་འགྲོ་སྟངས་ཐོག ཚན་རིག་པ་དེ་འདྲས་ཀྱང་དོ་སྣང་ཆེན་པོ་གནང་གི་ཡོད་པ་དང་ཁ་ཡོད་ལག་ཡོད་ཀྱིས་ཕན་ཐོགས་ཡོད་པ་སོགས་བཀའ་གནང་གི་འདུག་ཅིང་། ད་ལན་བཀའ་ཆོས་བསྩལ་གཞི་ལམ་གཙོ་རྣམ་གསུམ་གྱི་མཛད་པ་བོ་རྗེ་ཙོང་ཁ་པ་ཆེན་པོ་ནི། སྤྱིར་སངས་རྒྱས་པའི་ཆོས་དང་ཡང་སྒོས་ལྷག་པར་ཅན་དུ་བོད་གངས་ཅན་ལྗོངས་ཀྱི་བསྟན་དོན་དུ་བསམ་བཞིན་དུ་སྲིད་པ་བཟུང་བ་ཧ་ཅང་གསལ་བོ་ཡིན་པས། ངོས་ཀྱང་རྗེ་རིན་པོ་ཆེའི་རྣམ་ཐར་ནང་བཞིན་བསམ་བཞིན་དུ་སྲིད་པ་བཟུང་བ་ཞིག་ཕལ་ཆེར་ཡིན་པའི་ཁུལ་རེད། གང་ལྟར་ངོས་རང་གིས་ཉམས་ལེན་བྱ་རྒྱུ་གཙོ་བོ་དེ་རྗེ་རིན་པོ་ཆེའི་གསུང་འབུམ་པོ་ཏི་བཅོ་བརྒྱད་ལ་ཡང་ཡང་བལྟ་ཡི་ཡོད་པར་བརྟེན། བསམ་བློའི་ནང་དུའང་ཆོས་རྗེ་བློ་བཟང་གྲགས་པ་ཞེས་གཞན་དང་མི་འདྲ་བའི་ཚོར་བ་ཞིག་ཡོང་བསྡད་ཀྱི་འདུག་ཅེས་བཀའ་ཕེབས་གནང་སོང་།

བོད་ཀྱི་བླ་ན་མེད་པའི་དབུ་ཁྲིད་༧གོང་ས་༧སྐྱབས་མགོན་ཆེན་པོ་མཆོག་གིས་ཐེ་ཝན་གཙོས་པའི་ཡུལ་ལུང་འདྲ་མིན་གྱི་ཆོས་ཞུ་བ་ཚོར། ལམ་གཙོ་རྣམ་གསུམ་གྱི་ཆོས་འབྲེལ་གྲུབ་རྗེས་སེམས་བསྐྱེད་ཀྱི་ཆོས་འབྲེལ་ཞིག་ཀྱང་སྩལ་གནང་ཡོད་པ་དང་། ཕྱི་ཟླ་༡༠པའི་ཚེས་༡ཉིན་ཐེ་ཝན་གྱི་རྒྱ་རིགས་ཚོས་མགོན་པོ་གང་ཉིད་ལ་བརྟན་བཞུགས་བསྟར་འབུལ་ཞིག་གནང་འཆར་ཡོད་པ་རེད།

གསར་འགོད་པ། བློ་བྷེ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།