ནང་སྲིད་བཀའ་བློན་མཆོག་མངའ་སྡེའི་བློན་ཆེན་དང་མཇལ་བ།

དེ་ཡང་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་བཀོད་དོན་ལྟར་ན། ཉེ་ལམ་ཕྱི་ཚེས་ ༢༧་ཉིན། བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་རྒྱ་གར་བྱང་ཕྱོགས་ཇ་མུ་ཀ་ཤི་མིར་མངའ་སྡེའི་སྤྱི་ཁྱབ་བློན་ཆེན་ལྕམ་Mehbooba Mufti་མཆོག་གཙོས་པའི་སྤྱི་ཁྱབ་བློན་ཆེན་གཞོན་པ་དང་། མངའ་སྡེའི་མཉམ་འབྲེལ་བློན་ཆེན་ཚེ་རིང་རྡོ་རྗེ་མཆོག་བཅས་དང་མཇལ་འཕྲད་གནང་ཡོད་པ་རེད།
མཇལ་འཕྲད་དེའི་ཐོག་ནང་སྲིད་བཀའ་བློན་མཆོག་ནས། རྒྱ་གར་དབུས་གཞུང་གིས་གཏན་འབེབས་གནང་པའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་ཇུས་ཕྱི་ལོ་ ༢༠༡༤་ཞེས་པ་དེ་ལག་བསྟར་གང་མགྱོགས་འབྱུང་ཐབས་དང་། མངའ་སྡེའི་ནང་གནས་སྡོད་བཙན་བྱོལ་བོད་མི་རྣམས་ལ་མཐུན་འགྱུར་རོགས་རམ་རྒྱ་གང་ཆེ་གནང་སྐྱོང་ཡོང་བའི་འབོད་སྐུལ་ཞུས་ཡོད་པ་མ་ཟད། ཁུལ་དེའི་བོད་མི་རྣམས་ལ་བཟའ་འབྲུའི་ལག་དེབ་ration card་ཀྱི་མཐུན་འགྱུར་གནང་སྐྱོང་ཡོང་བའི་རེ་སྐུལ། དེ་བཞིན་ལ་དྭགས་ལྷོ་བྱང་གཉིས་ཀྱི་བོད་མི་ཚོར་ མཐུན་འགྱུར་རོགས་རམ་མུ་མཐུད་གནང་སྐྱོང་ཡོང་བའི་འབོད་སྐུལ་གྱི་ཞུ་སྙན་ཞིག་ཀྱང་ཕུལ་གནང་འདུག
ཕྱི་ཚེས་༢༨་ཉིན་ནང་སྲིད་བཀའ་བློན་མཆོག་གིས། མངའ་སྡེའི་སྤྱི་ཁྱབ་བློན་ཆེན་གཞོན་པ་སྐུ་ཞབས་Nirmal Kumar Singh་མཆོག་དང་མཇལ་འཕྲད་ཀྱིས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས། ༢༠༡༤་ཞེས་པ་དེ་ལག་བསྟར་གནང་ཐབས་གནང་སྐྱོང་ཡོང་བའི་འབོད་སྐུལ་ཡང་ཞུས་འདུག།
ཐེངས་འདིར་ནང་སྲིད་བཀའ་བློན་མཆོག་དང་ལྷན་ནང་སྲིད་དྲུང་འཕར་དཔལ་ལྡན་དོན་གྲུབ་ལགས་དང་། ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་ ཚེ་བརྟན་དབང་ཕྱུག་ལགས། ནང་སྲིད་དྲུང་ལས་དངོས་གྲུབ་འོད་ཟེར་བཅས་ལྷན་བཅར་ཞུས་ཡོད་འདུག།

གསར་འགོད་པ་དོན་གྲུབ་རྣམ་རྒྱལ།