ཁེ་ཎ་ཌའིར་བོད་མི་ཁག་ཅིག་གཞི་སྤོས་སྐོར་བཀའ་བསྡུར།

༄༅༎བཙན་བྱོལ་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེངྒེ་མཆོག་གིས་རྒྱ་གར་བྱང་ཤར་ཨ་རུ་ཎ་ཅལ་པཱར་རྡེཤི་ཁུལ་གནས་སྡོད་བོད་མི་ཁག་ཅིག་ཁེ་ན་ཌའི་ནང་གནས་སྤོས་གཞིས་ཆགས་བྱ་ཕྱོགས་སྐོར་བཀའ་མོལ་གནང་ཆེད་ཁེ་ན་ཌའི་མི་སེར་དང་ཕྱི་མི་གཞིས་སྤོས་ལས་དོན་བློན་ཆེན་སྐུ་ཞབས་ཇེ་སེན་ཀེ་ནི་དང་མཇལ་འཕྲད་གནང་འདུག།
བཀའ་བློན་ཁྲི་པ་མཆོག་གིས་བློན་ཆེན་ཇེ་སེན་ཀེ་ནི་མཆོག་ཨེལ་གིན་གསོལ་མགྲོན་ཁང་དུ་ དུས་ཡུན་སྐར་མ་༥༠རིང་མཇལ་འཕྲད་གནང་འདུག། སྐབས་དེར་ཁོང་རྣམ་གཉིས་དབར་ཁེ་ན་ཌའི་ཁུལ་རྒྱ་གར་ནས་བོད་མི་ཁག་ཅིག་གནས་སྤོས་གཞིས་ཆགས་བྱ་རྒྱུའི་ལས་འཆར་སྐོར་བཀའ་བསྡུར་ལྷུག་པོ་གནང་ཡོད་ཅིང༌། ཁེ་ན་ཌའི་མི་སེར་དང་ཕྱི་མི་གཞིས་ཆགས་ལས་དོན་བློན་ཆེན་མཆོག་ལ་ བཀའ་ཁྲི་བློ་བཟང་སེངྒེ་མཆོག་གིས་ བོད་མི་གཞིས་ཆགས་གནས་སྤོས་བྱ་རྒྱུའི་ལས་འཆར་གྱི་གོ་རིམ་སྐོར་འགྲེལ་བཤད་ཞིབ་ཕྲ་གནང་བ་མ་ཟད། བོད་མི་ཚོའི་མངོན་འདོད་རེ་བ་ཇི་ཡིན་གསལ་བཤད་ཞུས་གནང་ཡོད་པའི་སྐོར་བཙན་བྱོལ་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་སྤེལ་གནང་བཞག།
ཁེ་ན་ཌའི་སྲིད་བློན་མཆོག་དང་ དུས་ཡུན་རིང་པོ་ནས་བོད་པའི་གྲོགས་པོ་ཡིན་པ་ཁེ་ན་ཌའི་མི་སེར་དང་ཕྱི་མི་གཞིས་ཆགས་ལས་དོན་བློན་ཆེན་རྣམ་གཉིས་ལ་བཀའ་ཁྲི་མཆོག་གིས་ཐུགས་རྗེ་ཆེ་ཞུས་གནང་ཡོད་པ་དང༌། བློན་ཆེན་ཇེ་སེན་ཀེ་ནི་ངོས་ནས་ཀྱང་ཀེ་ཎེ་ཌའི་ནང་བོད་མི་གཞིས་སྤོས་བྱ་རྒྱུའི་ལས་འཆར་དེར་ལམ་ལྷོང་ཡོང་བ་དང་ཆབས་ཅིག། མ་འོངས་པར་ལས་འཆར་དེའི་རིགས་ཡང་ཀྱར་དབུ་འཛུགས་གནང་ཐུབ་པའི་ཐུགས་རེ་གནང་འདུག། ཡང་ཁོང་གིས་བཀའ་ཁྲི་མཆོག་ལ། མ་འོངས་པར་རྒྱལ་ཁབ་གཞན་ནས་གནས་སྤོས་གཞིས་ཆགས་ཀྱི་ལས་འཆར་དེའི་རིགས་དབུ་འཛུགས་གནང་རྒྱུའི་བཀའ་མོལ་སྲིད་བློན་མཆོག་ལ་ཞུ་སྲིད་པའི་སྐོར་གསུངས་བཞག།