རྒྱ་གར་ཨ་རུ་ན་ཅལ་མངའ་སྡེའི་བློན་ཆེན་པདྨ་མཁའ་འགྲོ་ལགས་བཞུགས་སྒར་དུ་ཆེད་བཅར་གྱིས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུ་འཆར་ཡོད་པ།

རྒྱ་གར་གྱི་ཨ་རུ་ན་ཅལ་མངའ་སྡེའི་མོན་ཡུལ་གྱི་དད་ལྡན་མང་ཚོགས་ནས་ཇི་ལྟར་གསོལ་འདེབས་ཞུས་པར་ཞལ་བཞེས་གནང་བ་ལྟར། མོན་གྱི་དད་ལྡན་སེར་སྐྱ་མི་མང་སྤྱི་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་རིང་མིན་ཕྱི་ཟླ་༩ པའི་ཚེས་ ༧ ཉིན་བོད་མིའི་དབུ་ཁྲིད་༸གོང་ས་མཆོག་ལ་བརྟན་བཞུགས་བསྟར་འབུལ་རྒྱས་པ་ཞིག་གནང་འཆར་ཡོད་པ་དེར། རྒྱ་གར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་བཞུགས་སྒར་དུ་ཆེད་ཕེབས་ཀྱིས་བརྟན་བཞུགས་དེའི་ཐོག་བཅར་འཆར་ཡོད་པ་རེད་ཅེས་མོན་ཡུལ་གྱི་བརྟན་བཞུགས་གོ་སྒྲིག་ཚོགས་པའི་ཚོགས་གཙོ་བླ་མ་པདྨ་ནོར་བུ་ལགས་ཀྱིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

གཞན་ཡང་བོད་མིའི་དབུ་ཁྲིད་༸གོང་ས་མཆོག་གི་སྐུ་སྒེར་དྲ་ཚིགས་ནང་གསར་དུ་འཁོད་པ་གཞིར་བཟུང་ན། བརྟན་བཞུགས་ཀྱི་སྔར་ཉིན་ཕྱི་ཟླ་ ༩ པའི་ཚེས་ ༦ ཉིན་མོར། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མོན་གྱི་དད་ལྡན་པ་ཚོར་༸གོང་ས་མཆོག་གིས་གསུང་ཆོས་གནང་འཆར་ཡོད་པ་དེར་འགྱུར་བ་བཏང་སྟེ། ཉིན་དེར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མོན་པ་དད་ལྡན་ཆོས་ཞུ་བ་ཚོར་སྐྱབས་རྗེ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས། སྤྱན་རས་གཟིགས་བླ་མའི་རྣལ་འབྱོར་གྱི་བཀའ་ཆོས་བསྩལ་གཏན་ཁེལ་ཡོད་པ་འཁོད་ཡོད་པ་དང་ཆབས་ཅིག ཕྱི་ཟླ་༩ པའི་ཚེས་ ༧ ཉིན་༸གོང་ས་༸སྐྱབས་མགོན་ཆེན་པོ་མཆོག་དངོས་སུ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་གྱིས། མགོན་པོ་གང་ཉིད་ལ་མོན་ཡུལ་གྱི་དད་ལྡན་མི་མང་གིས་གསོལ་འདེབས་ཞུས་པ་ལྟར་བརྟན་བཞུགས་བསྟར་འབུལ་གནང་འཆར་ཡོད་པའི་གསལ་བསྒྲགས་བསྐྱངས་ཡོད་པ་རེད།

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་མི་རི་ཀའི་ནང་༸སྐུའི་ཞབས་པུས་སྨན་བཅོས་ཆེད་ཆིབས་སྒྱུར་གྱིས། སྨན་བཅོས་ལེགས་པར་གྲུབ་པའི་རྗེས་སུ་ཨ་མི་རི་ཀའི་ནང་བོད་མི་དང་སོག་རིགས། ཧི་མ་ལ་ཡའི་རི་རྒྱུད་ཀྱི་མི་རིགས་སོགས་ནས་བརྟན་བཞུགས་བསྟར་འབུར་ཞུས་ཡོད་པ་མ་ཟད། ཡོ་རོབ་སུད་སི་རྒྱལ་ཁབ་ཀྱི་ནང་དུའང་བརྟན་བཞུགས་དང་མི་མང་ལ་ཆོས་འབྲེལ་བཅས་མཛད་འཕྲིན་རྒྱ་ཆེར་བསྐྱངས་ཡོད་པ་དང་མཚུངས་སུ། རྒྱ་གར་ནང་དུ་ཡོང་རྒྱུ་བསྡད་པའི་རྒྱ་གར་ཨ་རུ་ན་ཅལ་མངའ་སྡེའི་མོན་ཡུལ་མི་མང་གི་བརྟན་བཞུགས་འདི་ནི། མགོན་པོ་གང་ཉིད་༸སྐུའི་ཞབས་པུས་སྨན་བཅོས་གྲུབ་ནས་རྒྱ་གར་ནང་ཕེབས་འབྱོར་རྗེས་ཀྱི་ཆོས་ཕྱོགས་དང་འབྲེལ་བའི་མཛད་འཕྲིན་ཐོག་མ་དེ་ཆགས་ཀྱི་ཡོད་པ་རེད།

གསར་འགོད་པ། བློ་བྷེ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།