རྒྱ་ནག་གཞུང་གིས་དམ་དྲག་ཁྲོད་ལི་ཐང་རྟ་རྒྱུག་གོ་སྒྲིག་བྱས་འདུག

ཁམས་ལི་ཐང་རྫོང་དུ་རྟ་རྒྱུག་ཚོགས་མ་བཅུག་པར་ལོ་ངོ་བཅུ་ལྷག་ཕྱིན་རྗེས་ད་ལོ་ལི་ཐང་རྫོང་དུ་རྟ་རྒྱུགས་ཐེངས་དང་པོ་དམ་དྲག་འོག་སྐོང་འདུག
དེ་ཡང་ཁམས་དཀར་མཛེས་ལི་ཐང་རྫོང་དུ་སྤྱི་ལོ་༢༠༠༧་ལོའི་ཟླ་༨་ཚེས་༡་ཉིན་ལི་ཐང་རྟ་རྒྱུགས་ཆེན་མོའི་སྐབས་རུང་རྒྱས་ཨ་གྲགས་ལགས་ཀྱིས་མི་དམངས་འདུ་འཛོམས་ཡོད་སར་ཡོངས་གྲགས་ཀྱིས་བོད་ནང་གི་བོད་མི་ཚོའི་མངོན་འདོད་ཀྱི་གཏམ་བཤད་སྤེལ་བར་བརྟེན། དེ་ནས་རྒྱ་ནག་གཞུང་གིས་ལི་ཐང་རྟ་རྒྱུག་ཚོགས་མ་བཅུག་པར་ལོ་ངོ་བཅུ་ལྷག་ཕྱིན་རྗེས། ད་ལོའི་སྤྱི་ཟླ་༨་པའི་ཚེས་༡་ནས་ཉིན་གསུམ་གཅིག་རིང་ས་གནས་སྲིད་གཞུང་གིས་གོ་སྒྲིག་འོག་རྟ་རྒྱུག་ཐེངས་དང་པོ་ཚོགས་ཡོད་པ་རྒྱ་གར་དུ་བཞུགས་བཞིན་པའི་དགེ་བཤེས་ལྷ་རམས་པ་འཇམ་དབྱངས་ཉི་མ་ལགས་ཀྱིས་འདི་གར་གསུངས་བྱུང་།
ཡང་ཁོང་གིས་གསུངས་ན། རྟ་རྒྱུག་དེ་བཞིན་རྒྱ་ནག་གཞུང་གིས་གོ་སྒྲིག་བྱས་དོན་གཙོ་བོ་ནི་ལི་ཐང་ནང་མི་དམངས་ཀྱི་འཚོ་བ་ཡག་པོ་ཡོད་པ་སོགས་ཀྱི་དྲིལ་བསྒྲགས་ཆེད་དུ་ཡིན་ཞིང་། སྔོན་མར་རྟ་རྒྱུག་དེའི་ནང་བོད་མི་ཚོས་དང་བླངས་ཀྱིས་འཛུལ་བཞུགས་བྱས་སྲོལ་ཡོད་ན་ཡང་།  ད་ལོར་སྲིད་གཞུང་གིས་གོ་སྒྲིག་བྱས་པར་མ་ཟད་དེའི་ནང་འཛུལ་ཞུགས་བྱེད་མཁན་ཚོར་མི་རེར་ཉི་མ་རེར་རྒྱ་སྒོར་༢༠༠ རེ་ཡང་སྤྲད་ཡོད་འདུག
དེ་བཞིན་ལི་ཐང་དུ་རྟ་རྒྱུག་ཉིན་གསུམ་གྱི་རིང་དམག་མི་དང་ཉེན་རྟོག་པ་མི་དམངས་ཀྱི་མདུན་དུ་ལངས་ཏེ་མཐའ་བསྐོར་ནས་དམ་དྲག་ལྟ་སྲུང་ནན་པོ་བྱས་ཡོད་པ་དང་། དེའི་སྔོན་གྱི་སྤྱི་ཟླ་གསུམ་པའི་གསུམ་བཅུའི་དུས་དྲན་དང་། དེ་བཞིན་༧གོང་ས་མཆོག་གི་སྐུའི་འཁྲུངས་སྐར་སྐབས་སུའམ་དམ་དྲག་ཧ་ཅང་ཆེན་པོ་ཡོད་འདུག
གོང་ཞུས་ལི་ཐང་རྟ་རྒྱུགས་འདི་དང་བསྟུན་ནས་ལི་ཐང་དུ་༧ཚངས་དབྱངས་རྒྱ་མཚོ་གླུ་གཞས་སྤྲོ་ཚོགས་ཆེན་མོ་ཞེས་པ་ཞིག་ཀྱང་ཚོགས་ཡོད་འདུག
ལི་ཐང་ལ་དེ་སྔ་༢༠༠༧་ལོའི་རྟ་རྒྱུགས་སྐབས་རུང་རྒྱས་ཨ་གྲགས་ལགས་ཀྱིས་༧གོང་ས་མཆོག་བོད་ལ་ཕེབས་དགོས། བོད་ལ་རང་དབང་དགོས། ཀུན་གཟིགས་པན་ཆེན་རིན་པོ་མཆོག་དང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྣམ་གཉིས་གློད་བཀྲོལ་གཏོང་དགོས་ཞེས་སོགས་གཏམ་བཤད་གནང་བར་བརྟེན་རྒྱ་གཞུང་ཉེན་རྟོག་པས་ཁོང་འཛིན་བཟུང་གིས་མི་ལོ་བརྒྱད་ཀྱི་དུས་བཀག་བཙོན་འཇུག་ཁྲིམས་ཐག་བཅད་ནས་སྤྱི་ལོ་༢༠༡༥་ལོའི་ཟླ་བདུན་པའི་ཚེས་༣༡་ཉིན་ལོ་བརྒྱད་ཀྱི་ཁྲིམས་ཆད་ཀྱི་དུས་ཡུན་ཟིན་ནས་གློད་གྲོལ་ཐོབ་ཡོད་པ་རེད།

གསར་འགོད་པ་གུ་རུ་ཆོས་སྐྱིད།