ནུབ་རའི་མང་ཚོགས་ཀྱིས་༧གོང་ས་མཆོག་ལ་བརྟན་བཞུགས་འབུལ་འདུག

སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་ལ་དྭགས་ནུབ་ར་ཁུལ་གྱི་མང་ཚོགས་དང་བདེ་དགོན་དགའ་ལྡན་བཀྲིས་ཆོས་གླིང་འདུས་མང་ཡོངས་ནས་བརྟན་བཞུགས་འདེགས་འབུལ་ཞུས་ཡོད་འདུག
དེ་ཡང་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་དྭགས་ཀྱི་ནུབ་ར་ཁུལ་ཆིབས་བསྒྱུར་གྱིས། འདི་ཚེས་༡༡་ནས་ཆོས་འབྲེལ་དབུ་ཚུགས་མཛད་ཡོད་པ་ནས། ཚེས་༡༢་ཉིན་སྔ་ཐོག་བདེ་དགོན་དགའ་ལྡན་བཀྲིས་ཆོས་གླིང་གི་འདུས་མང་ཡོངས་དང་མང་ཚོགས་ལ་ལག་ལེན་སོ་བདུན་པའི་བཀའ་འཁྲིད་གནང་བའི་སྐབས་སུ་ནང་པ་སངས་རྒྱས་པའི་ཆོས་ཉམས་ལེན་བྱེད་མཁན་ཡིན་ཟེར་ཆོ་ག་ཕྱག་ལེན་དང་གཟུངས་བསྔགས་བགྲངས་པ་གཅིག་པུ་མ་ཡིན་པར་གཙོ་བོ་སངས་རྒྱས་བཅོམ་ལྡན་གྱི་བཀའ་གནང་བའི་ཆོས་ཀྱི་ནང་དོན་གོ་རྟོག་ཐུབ་པ་བྱེད་རྒྱུ་གལ་ཆེན་པོ་ཡིན་ལུགས་བཀའ་སློབ་སྩལ་གནང་འདུག
ཡང་ཚེས་༡༢་ཉིན་གཉིས་པའི་ཆོས་འབྲེལ་མ་གནང་བའི་གོང་བདེ་དགོན་དགའ་ལྡན་བཀྲིས་གླིང་དང་ནུབ་ར་མི་མང་ཐུན་མོང་ནས་༧གོང་ས་སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བརྟན་པའི་བརྟན་བཞུགས་འདེགས་འབུལ་ཞུས་གནང་ཡོད་འདུག སྔ་ཐོག་བརྟན་བཞུགས་འདེགས་འབུལ་ཞུས་པའི་མཚམས་སུ་༧གོང་ས་སྐྱབས་མགོན་ཆེན་པོ་མཆོག་གིས་མང་ཚོགས་ལ་སྤྱན་རས་གཟིགས་ཀྱི་བཀའ་དབང་སྩལ་གནང་ཡོད་པ་རེད།
བཀའ་དབང་སྩལ་གནང་བའི་སྐབས་སུ་༧གོང་ས་མཆོག་གིས། མང་ཚོིགས་ལ་ཆང་རག་དང་ཐ་མག་འཐུང་རྒྱུ་མེད་པའི་སྐོར་བཀའ་སློབ་སྩལ་བའི་ནང་། ཆང་རག་དང་ཐ་མག་ལ་ལོངས་སུ་སྤྱོད་རྒྱུ་དེ་ནི་ཆོས་ཕྱོགས་ནས་མ་འགྲིག་པ་གཅིག་པུ་མ་ཡིན་པར་དེས་སྤྱི་ཚོགས་དང་རང་ཉིད་ཀྱི་འཕྲོད་བསྟེན་གཉིས་ཀར་གནོད་སྐྱོན་གཏོང་གཞི་ཞིག་རེད་ལ། སྨན་པ་ཚོས་ཀྱང་ཐ་མག་དང་ཆང་རག་འཐུང་བ་ཡིན་ན་རང་གི་ལུས་པོར་དཀའ་ངལ་འཕྲད་ཀྱི་ཡོད་པའི་འགྲེལ་བརྗོད་གནང་གི་ཡོད་སྟབས་ཚང་མས་དེ་དག་ལ་ལོངས་སུ་སྤྱོད་རྒྱུ་མེད་ལུགས་བཀའ་གནང་འདུག
དགའ་ལྡན་ཕོ་བྲང་ཡིག་ཚང་གི་མཛད་འཆར་གཞིར་བཟུང་ལྟར་ན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནུབ་རར་འདི་ཚེས་བཅོ་ལྔ་བར་བཞུགས་རྒྱུ་དང་། ཚེས་༡༧་དང་༡༨་ཉིན་གྲངས་གཉིས་རིང་ལ་དྭགས་ཟངས་དཀར་གྱི་པ་ལྡམ་ཁུལ་ཆོས་འབྲེལ་གནང་རྒྱུ། དེ་ནས་སླར་ཡང་ལ་དྭགས་སླེ་རུ་ཕྱིར་ཕེབས་ཀྱིས་ཚེས་ཉི་ཤུ་བརྒྱད་ནས་སུམ་ཅུ་བར་ཆོས་འབྲེལ་སྩལ་རྒྱུ་བཅས་ཀྱི་མཛད་འཆར་ཡོད་འདུག

གསར་འགོད་པ་རིག་འཛིན་ཆོས་སྒྲོན།