ལྷ་ས་ཁུལ་དུ་ལོ་སར་སྐབས་མི་མང་འདུ་འཛོམས་ཐད་དོགས་ཟོན་དང་འགྲོ་ལམ་བཀག་འགོག་སོགས་བྱེད་བཞིན་ཡོད་འདུག

2024.02.09
ལྷ་ས་ཁུལ་དུ་ལོ་སར་སྐབས་མི་མང་འདུ་འཛོམས་ཐད་དོགས་ཟོན་དང་འགྲོ་ལམ་བཀག་འགོག་སོགས་བྱེད་བཞིན་ཡོད་འདུག ལྷ་ས་གྲོང་ཁྱེར་སྤྱི་བདེ་ཉེན་རྟོག་ལས་ཁུངས་དང་གཙུག་ལག་ཁང་དོ་དམ་ཁང་གི་བརྡ་ཁྱབ།
མི་སེར་གསར་འགོད་པ།

ཕྱི་ལོ་ ༢༠༢༤ ལོའི་ཕྱི་ཟླ་ ༢ ཚེས་ ༡༠ དང་བོད་ཟླ་ ༡ ཚེས་ ༡ ཉིན་དེ་བོད་ཀྱི་ལོ་སར་ལ་འཁེལ་ཡོད་པ་བཞིན། བོད་ཀྱི་ལོ་སར་དང་བསྟུན་བོད་ཀྱི་མདོ་སྨད་གཉིས་གཙོས་བོད་ཀྱི་ས་ཁུལ་ས་ཁུལ་གང་ས་ནས། བོད་ཀྱི་རྒྱལ་ས་ལྷ་སར་མི་མང་ཕོན་ཆེན་འདུ་འཛོམས་བྱེད་བཞིན་པ་དང་བསྟུན། རྒྱ་ནག་གཞུང་ངོས་ནས་ལོ་སར་ཚེས་གཅིག་ཉིན་ལྷ་སའི་གཞུང་ལམ་ཁག་ཅིག་བཀག་འགོག་བྱེད་བཞིན་པའི་བརྡ་ཁྱབ་བཏང་ཡོད་པ་དང་། ལོ་སར་དང་བསྟུན་ལོ་བསྟུན་མར་མི་མང་འདུ་འཛོམས་ལ་དོགས་ཟོན་ཡོད་པ་བཞིན། འདི་ལོ་ཡང་མཆོད་མཇལ་བྱེད་ཡུལ་ཁག་ཏུ་ཞིབ་བཤེར་ས་ཚིགས་ཆེད་འཛུགས་བྱས་ཏེ། མི་མང་འདུ་འཛོམས་ཐད་དོགས་ཟོན་བྱེད་བཞིན་ཡོད་པ། བོད་ནང་གི་འབྲེལ་ཡོད་བོད་མི་གཉིས་ནས་འགྲེལ་བརྗོད་གནང་བྱུང་།

དེ་བཞིན་རྒྱ་ནག་གཞུང་འབྲེལ་གཙུག་ལག་ཁང་དོ་དམ་ལས་ཁུངས་ངོས་ནས། ཚེས་གཅིག་མ་གཏོགས་ཕྱི་ཟླ་ ༢ཚེས་ ༡༦ བར་གཙུག་ལག་ཁང་དད་ལྡན་མི་མང་ལ་མཆོད་མཇལ་ཆེད་སྒོ་ཕྱེ་རྒྱུ་མིན་པའི་བརྡ་ཁྱབ་སྤེལ་འདུག་ལ། ཡང་ལྷ་ས་སྤྱི་བདེ་ཉེན་རྟོག་ཁང་གི་བརྡ་ཁྱབ་ནང་། ལོ་སར་ཚེས་གཅིག་ཉིན་གྱི་བོད་ནང་གི་སྔ་དྲོའི་ཆུ་ཚོད་ ༡༡ ནས་བཟུང་། གནས་ཆུང་ལྷ་གསོལ་སྐབས་ཉེན་རྟོག་པས་གཞུང་ལམ་ཁག་ཅིག་བཀག་འགོག་གིས། སྐབས་དེར་མི་མང་ནས་ཆོས་ལུགས་བྱེད་སྒོ་སྤེལ་ཡུལ་དུ་ཐོབ་ཐང་ལག་འཁྱེར་འཁྱེར་ནས་ཡོང་དགོས་སྐོར་སོགས་བསྒྲགས་འདུག

e5600d51-36f1-4157-bb69-7a1e08e8811b.jpeg

ཕྱི་ལོ་ ༢༠༢༣ ལོའི་བོད་ཀྱི་ལོ་སར་བསླེབ་ལ་ཉེ་བ་དང་བསྟུན། རྒྱ་ནག་གཞུང་ངོས་ནས་ལྷ་ས་ཡོངས་སུ་དམག་མི་དང་ཉེན་རྟོག་པ་ཕོན་ཆེན་འགྲེམས་འཇོག་དང་། ཞིབ་བཤེར་ས་ཚུགས་གསར་སྐྲུན་གྱིས་མི་མང་གི་འགྲོ་སྐྱོད་ལ་ལྟ་བཤེར་ཤུགས་ཆེར་བྱས་ཡོད་པ་རེད་ལ། རྒྱ་ནག་གཞུང་གིས་ངོས་ནས་བོད་ནང་དམག་མི་དང་ཉེན་རྟོགས་པ་འགྲེམས་འཇོག་བྱེད་བཞིན་པ་དེ་རིགས་སྤྱི་ཚོགས་བདེ་འཇགས་དང་། མི་མང་གི་བདེ་འཇགས་ཆེད་ཡིན་སྐོར་བརྗོད་ནས་དམ་དྲགས་ཤུགས་ཆེར་བྱེད་བཞིན་ཡོད་པ་རེད།

སྤྱིར་རྒྱ་ནག་གཞུང་འབྲེལ་ངོས་ནས་ནམ་རྒྱུན་ལྷ་ས་ཁུལ་དུ་མི་མང་འདུ་འཛོམས་དང་དུས་དྲན་སོགས་ཀྱི་སྐབས་ཉེན་རྟོག་པ་འགྲེམས་འཇོག་ཤུགས་ཆེར་བྱེད་བཞིན་ཡོད་པ་རེད་ལ། སྔར་ལོའི་ལོ་སར་དང་བོད་ནང་གི་དགོན་སྡེ་ཁག་གི་སྨོན་ལམ་ཆོས་ལུགས་བྱེད་སྒོ་སྤེལ་ཡུལ་དུ། རྒྱ་ནག་གཞུང་ངོས་ནས་ལྷ་སའི་དགོན་སྡེ་ཁག་དང་མདོ་སྟོད་སྨད་ཀྱི་དགོན་པ་ཁག་ཏུ་དམག་མི་འགྲེམས་འཇོག་གིས་དམ་དྲགས་ཤུགས་ཆེར་བྱས་ཡོད་པ་རེད། 

གསར་འགོད་པ། དཔལ་འབར། ཨེ་ཤེ་ཡ་རང་དབང་རླུང་འཕྲིན་ཁང་།     
རྩོམ་སྒྲིག་པ།  ཡེ་ཤེས་ཟླ་བ།
དྲྭ་ཐོག་སྤེལ་མཁན། ཡེ་ཤེས་ཟླ་བ།

བལྟ་བཤེར་མང་ཤོས་བྱས་པའི་གནས་ཚུལ།
RFA
༸གོང་ས་མཆོག་མཇལ་ནས་ཝི་ཏི་ནམ་གྱི་གཞོན་སྐྱེས་ཚོས་ནང་ཆོས་བརྒྱུད་སེམས་ཀྱི་བདེ་སྐྱིད་ཡོང་བར་ཕན་ཐོགས་ཆེན་པོ་ཡོད་པ་འགྲེལ་བརྗོད་གནང་བྱུང་།
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
བོད་ཤར་ཕྱོགས་ཁམས་སྡེ་དགེ་རྫོང་གི་དབོན་པོ་སྟོད་ཁུལ་དུ་བོད་མི་མང་པོ་འཛིན་བཟུང་བྱས་འདུག
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎