བོད་སྨན་རྫུན་མ་བོད་ནང་ཚོང་བསྒྱུར་བྱེད་བཞིན་པས་དོ་སྣང་བྱེད་དགོས།

རྡ་ས་བོད་ཀྱི་སྨན་རྩིས་ཁང་གི་མིང་ཐོག་ནས་བོད་སྨན་རྫུན་མ་བོད་ནང་ཚོང་བསྒྱུར་བྱེད་བཞིན་པ་དེར་དོ་སྣང་བྱེད་དགོས་པའི་གསལ་བསྒྲགས་སྤེལ་འདུག
བོད་ཀྱི་སྨན་རྩིས་ཁང་གི་མིང་ཐོག་ནས་བོད་སྨན་རྫུན་མ་རྣ་ཐོས་ལ་བརྒྱུད་བོད་ནང་ཚོང་འགྲེམས་བྱེད་བཞིན་པའི་གནས་ཚུལ་ཐོན་བཞིན་པར་སྨན་རྩིས་ཁང་གིས་རྩད་ཞིབ་བྱེད་བཞིན་ཡོད་འདུག་པ་དང་། སྨན་རྩིས་ཁང་གིས་གསལ་བསྒྲགས་ཞིག་སྤེལ་འདུག་པ་དེའི་ནང་། སྨན་རྩིས་ཁང་གི་སྨན་ཡིན་ཞེས་རྫུན་བཟོས་ཚོང་སྒྱུར་ཤེས་རྟོགས་འབྱུང་ཚེ་སྨན་རྩིས་ཁང་ལ་བརྡ་ལན་ཡོང་བ་ཞེས་འཁོད་འདུག་ཅིང་།  བོད་སྨན་ཐོག་དོ་སྣང་དང་བོད་སྨན་བསྟེན་གཏུག་བྱ་མཁན་ཇེ་མང་དུ་འགྲོ་བཞིན་ཡོད་སྟབས། རྡ་ས་བོད་ཀྱི་སྨན་རྩིས་ཁང་གི་སྨན་དང་། གསོ་རིག་ཐོན་དངོས་གཞན་རྣམས་དེ་སྔ་ལས་འགྲོ་རྒྱུགས་ཆེ་བ་ཡོད་འདུག་ན་ཡང་། བོད་སྨན་གཞན་ལ་ཚོང་བསྒྱུར་བྱ་རྒྱུར་འདེང་ངེས་མེད་པ་སྨན་རྩིས་ཁང་གིས་གསལ་བསྒྲགས་དེའི་ནང་བཀོད་འདུག   ནམ་རྒྱུན་སྤྱི་ཚོགས་ནང་བཤད་དོན་ལྟར་ན། བོད་ནང་གི་བོད་མི་ཚོས་བཞུགས་སྒར་རྡ་རམ་ས་ལ་ནས་བཟོས་པའི་བོད་སྨན་རིན་ཆེན་རིལ་བུ་ལ་སོགས་པའི་བོད་སྨན་དེ་དག་བཟོ་བསྐྲུན་ཚད་ལྡན་ཡིན་པར་མ་ཟད། བྱིན་རླབས་ཅན་ཡིན་པར་ངོས་འཛིན་བྱེད་སྲོལ་ཡོད་འདུག
རྡ་ས་བོད་ཀྱི་སྨན་རྩིས་ཁང་གིས་བོད་ཕྱི་ནང་གཉིས་ཀྱི་བོད་རིགས་རྒྱ་ཆེའི་མང་ཚོགས་ནས་དུས་རྒྱུན་དུ་སྨན་རྩིས་ཁང་གི་སྨན་ཡིན་ཁུལ་གྱི་ཚོང་སྒྱུར་བྱེད་མཁན་རྣམས་ལ་དེ་མ་ཐག་ཡིད་ཆེས་མ་གནང་བར་རྩད་ཞིབ་བརྟག་དཔྱད་ངེས་པར་གནང་དགོས་པའི་འབོད་སྐུལ་ཡང་ཞུས་འདུག

གསར་འགོད་པ་ལྕགས་མོ་མཚོ།