གསེར་རྟ་ནས་ཞིང་ཆེན་གཞན་པའི་གྲྭ་བཙུན་ཚོ་ཕྱིར་ཕུད་གཏོང་གི་འདུག


2016-09-19
Share
གསེར་རྟ་བླ་རུང་ཆོས་སྒར་གྱི་གླིང་བར། ༼ཟླ་ཚེས་མི་གསལ། གསེར་རྟ་བླ་རུང་ཆོས་སྒར་གྱི་གླིང་བར། ༼ཟླ་ཚེས་མི་གསལ།
བོད་འབྱོར།

རྒྱ་ནག་གཞུང་གིས་གསེར་རྟ་བླ་རུང་ཆོས་སྒར་ནས་མཚོ་སྔོན་དང་། ཀན་སུའུ། ཡུན་ནན་ཞིང་ཆེན་བཅས་ནས་ཡིན་པའི་གྲྭ་བཙུན་རྣམས་ཕྱིར་འབུད་གཏོང་བཞིན་ཡོད་འདུག
དེ་ཡང་འདི་གའི་བལ་ཡུལ་གྱི་གསར་འགོད་པར་བོད་ནས་འབྲེལ་ཡོད་མི་སྣ་ཞིག་གིས་ངོ་སྤྲོད་གནང་དོན་ལྟར་ན། རྒྱ་ནག་གཞུང་གི་བཀོད་ཁྱབ་འོག་འདི་ལོའི་ཕྱི་ཟླ་བདུན་པའི་ཕྱི་ཚེས་༢༠་ཉིན་ནས་བཟུང་གསེར་རྟ་བླ་རུང་ཆོས་སྒར་གྱི་གྲ་བཙུན་རྣམས་ཀྱི་གྲ་ཤག་གཏོར་བཤིག་གཏོང་བཞིན་པ་མ་ཟད། དེའི་ཁར་གསེར་རྟ་བླ་རུང་ཆོས་སྒར་ནང་དེ་སྔ་ནས་གཏན་སྡོད་གནང་སྟེ་ནང་ཆོས་སློབ་གཉེར་གནང་བཞིན་པ་མཚོ་སྔོན་ཞིང་ཆེན་དང་། ཡུན་ནན་ཞིང་ཆེན། དེ་བཞིན་ཀན་སུའུ་ཞིང་ཆེན་གྱི་ཁོངས་གཏོགས་ནས་ཡིན་པའི་གྲ་བཙུན་རྣམས་ཕྱིར་འབུད་བཏང་དང་གཏོང་བཞིན་ཡོད་ཅིང་། དེ་སྔ་མཚོ་སྔོན་ཞིང་ཆེན་ནས་བླ་རུང་ཆོས་སྒར་ནང་ནང་ཆོས་སློབ་གཉེར་མུ་མཐུད་གནང་ཆོག་པ་རྒྱ་ནག་གཞུང་གི་ཆོག་མཆན་ཐོབ་པའི་གྲ་བཙུན་འགའ་ཤས་མ་གཏོགས་སྡོད་མི་ཆོག་པ་དང་། གྲ་བཙུན་གཞན་རྣམས་རང་རང་སོ་སོའི་ཕ་ཡུལ་ལ་ངེས་པར་དུ་ཕྱིར་ལོག་དགོས་པའི་བཀོད་ཁྱབ་གཏོང་བཞིན་པ་དང་། ཡང་ཀན་སུའུ་ཞིང་ཆེན་དང་ཡུན་ནན་ཞིང་ཆེན་ནས་ཡིན་པའི་གྲ་བཙུན་གཅིག་ཀྱང་བླ་རུང་ཆོས་སྒར་ནང་སྡོད་མི་ཆོག་པའི་བཙན་དཀའ་བཏང་སྟེ་ཕྱིར་འབུད་གཏོང་བཞིན་པ་མ་ཟད། རྒྱ་གཞུང་གིས་གྲྭ་བཙུན་དེ་དག་གི་ཕ་ཡུལ་ལ་འབྲེལ་བ་བྱས་ཏེ་ཡུལ་མི་ཚོའི་ངོས་ནས་གྲ་བཙུན་རྣམས་ལ་ཐད་ཀར་འབྲེལ་བ་བྱེད་དུ་བཅུགས་ནས་ཕ་ཡུལ་ལ་ཕྱིར་ལོག་དགོས་པའི་སྐུལ་མ་གཏོང་བཅུག་པ་དང་། གལ་ཏེ་གྲ་བཙུན་རྣམས་རང་ཡུལ་ལ་ཕྱིར་ལོག་མ་གནང་ཚེ་རྒྱ་གཞུང་གིས་སྤྲད་པའི་རོགས་དངུལ་དང་། ཐོབ་ཐང་སོགས་མེད་པ་བཟོ་རྒྱུའི་སྡིག་ར་སྐུལ་འདུག་ལ་ད་དུང་རང་ཡུལ་ལ་ཕྱིར་ལོག་མ་བྱས་ཚེ་རྒྱ་གཞུང་གི་ལས་བྱེད་པ་བླ་རུང་སྒར་ནང་ཡོང་སྟེ་ཀན་སུའུ་དང་ཡུན་ནན་ཞིང་ཆེན་གྱི་གྲ་བཙུན་རྣམས་ཕྱོགས་གཅིག་ཏུ་བསྡུ་སྐོང་གིས་སློབ་གསོ་རྒྱབ་ནས་ཕྱིར་འབུད་གཏོང་རྒྱུའི་ཉེན་བརྡ་ཡང་བཏང་འདུག
ཡང་བླ་རུང་ཆོས་སྒར་ནང་སློབ་གཉེར་གནང་བཞིན་པ་བོད་ཀྱི་རྒྱལ་ས་ལྷ་ས་དང་། ཆབ་མདོ་སོགས་ནས་ཡིན་པའི་གྲ་བཙུན་ཕལ་ཆེ་བ་ཕྱིར་འབུད་བཏང་ཟིན་པ་དང་། བླ་རུང་སྒར་ནང་སློབ་གཉེར་གནང་བཞིན་པ་དགུང་གྲངས་༦༠་ཡན་ལ་ཕེབས་པ་ཚང་མ་ཕྱིར་འབུད་གཏོང་མི་དགོས་པའི་རེ་འདུན་ཞིག་བཏོན་ཡོད་ན་ཡང་དེ་ལ་ཡང་རྒྱ་གཞུང་གིས་ངོས་ལེན་བྱེད་དཀའ་བའི་གནས་སུ་ལྷུང་ཡོད་འདུག༎       
རྒྱ་ནག་གཞུང་གིས་གསེར་རྟ་བླ་རུང་ཆོས་སྒར་གྱི་གྲྭ་ཤག་མང་པོ་བཙན་གྱིས་གཏོར་བཞིན་པར་བཟོད་དཀའ་བའི་བློ་ཕམ་བྱུང་ནས་ད་བར་སོ་སོར་བཙུན་མ་གསུམ་གྱིས་རང་སྲོག་བཅད་པའི་གནས་ཚུལ་ཡང་བྱུང་ཡོད།

གསར་འགོད་པ་སེང་གེ་རི་བསོད་ནམས་ལྷ་མོ།

མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎

དྲ་གནས་ཆ་ཚང༌།