བལ་ཡུལ་སྲིད་བློན་དང་ཨ་རིའི་སྲིད་འཛིན་མཇལ་འཕྲད་གནང་རྒྱུ།

མའོ་ཚོགས་པའི་བལ་ཡུལ་གྱི་སྲིད་བློན་གསར་པ་པར་ཅན་རྡ་ཨ་མི་རི་ཀའི་ནང་གཞུང་དོན་ཕྱོགས་སྐྱོད་ཆེད་ཁ་ས་བལ་ཡུལ་ནས་ཕེབས་ཐོན་གནང་འདུག

2008.09.20

༄༅༎མའོ་ཚོགས་པའི་བལ་ཡུལ་གྱི་སྲིད་བློན་གསར་པ་པར་ཅན་རྡ་ཨ་མི་རི་ཀའི་ནང་གཞུང་དོན་ཕྱོགས་སྐྱོད་ཆེད་ཁ་ས་བལ་ཡུལ་ནས་ཕེབས་ཐོན་གནང་འདུག

ཁོང་ད་རེས་ཨ་རིའི་ནང་ཕེབས་བཞུགས་རིང་ཨ་རིའི་སྲིད་འཛིན་སྦུཤེ་མཆོག་དང་མཇལ་འཕྲད་ཞུས་གནང་རྒྱུ་ཡིན་པ་མ་ཟད། གྲོང་ཁྱེར་ནིའུ་ཡོག་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་གསུངས་བཤད་ཀྱང་གནང་རྒྱུ་ཡིན་པ་རེད།

བལ་ཡུལ་གྱི་ཕྱི་འབྲེལ་ལྷན་ཁང་གི་དཔོན་རིགས་ཤིག་གིས་གསུངས་ན། སྲིད་འཛིན་སྦུཤེ་མཆོག་གིས་མགྲོན་བདག་གནང་བའི་གསོལ་སྟོན་ཐོག་ སྲིད་བློན་པར་ཅན་རྡ་ལ་གཞུང་འབྲེལ་གདན་ཞུ་འབྱོར་ཡོད་པ་དང་།

སྲིད་བློན་མཆོག་ཨ་རིའི་གྲོང་ཁྱེར་ནིའུ་ཡོག་ལ་རེས་གཟའ་ཟླ་བའི་ཉིན་ཕེབས་འབྱོར་གནང་གི་ཡོད་པ་རེད།

བལ་ཡུལ་གྱི་སྲིད་བློན་གསར་པ་པར་ཅན་རྡ་ཡིས་རང་ཡུལ་ནས་ཨ་རིའི་ཕྱོགས་སུ་ཕེབས་ཐོན་མ་གནང་གོང་གསུངས་དོན་ལ། བལ་ཡུལ་མི་དམངས་དབང་གཙོའི་རྒྱལ་ཁབ་གསར་པའི་བརྡ་ལན་དེ་ངོས་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་འཁྱོལ་བ་བྱ་རྒྱུ་ཡིན་ཞེས་གསུངས་བཞག

རྒྱལ་ཁབ་ཀྱི་སྲིད་བློན་གྱི་འགན་འཁུར་བཞེས་པའི་ཟླ་བ་ད་གའི་ནང༌། པར་ཅན་རྡ་ཡིས་དང་པོ་རྒྱ་ནག་ལ་གཞུང་དོན་ཕྱོགས་སྐྱོད་གནང་བ་དང༌། བདུན་སྔོན་མ་རྒྱ་གར་ལ་ཕེབས་ནས་བལ་ཡུལ་གྱི་ཕྱི་འབྲེལ་གཞུང་ཚབ་ཀྱི་འབྲེལ་བ་གོང་འཕེལ་གཏོང་ཐབས་གནང་ཡོད་པ་རེད། སྤྱིར་སྟངས་བྱས་ན་བལ་ཡུལ་གྱི་མའོ་ཤོག་ཁག་དང་ཨ་མི་རི་ཀའི་སྲིད་གཞུང་དབར་འབྲེལ་བ་བཟང་པོ་མེད་པ། དེ་ཡང་ཨ་རི་གཞུང་ནས་བལ་ཡུལ་ནང་གི་མའོ་ཤོག་ཁག་གི་འཇབ་དམག་མེད་པ་བཟོ་ཐབས་སུ། གནས་དབྱུངས་བཏང་བའི་རྒྱལ་པོ་གྱ་ནེན་རྡ་རའི་དཔུང་དམག་ལ་གོ་མཚོན་གྱི་རོགས་རམ་དང་སྦྱོང་བརྡར་སོགས་གནང་ཡོད་པ་རེད། འོན་ཀྱང་འདི་ལོ་ཕྱི་ཟླ་ལྔ་པའི་ནང་རྒྱལ་ཡོངས་འོས་བསྡུའི་སྐབས་མའོ་ཚོགས་པར་རྒྱལ་ཁ་ཆེན་པོ་ཐོབ་རྗེས། བལ་ཡུལ་ནང་གི་ཨ་མི་རི་ཀའི་གཞུང་ཚབ་ཆེན་མོས་མའོ་ཤོག་ཁག་གི་འགོ་ཁྲིད་དང་མཇལ་འཕྲད་ཐོག་མ་དེ་གནང་ཡོད་པ་རེད།

བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
དབོན་སྟོད་དགོན་པའི་ཕྱག་མཛོད་བགྲེས་པ་དང་གྲོང་ཚོའི་ལས་བྱེད་པ་གཉིས་ཀྱི་གྱོད་དོན་གཞུང་ཕྱོགས་གྱོད་ཞིབ་པར་རྩིས་སྤྲད་ཟིན་འདུག
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎