ཨ་རིའི་བུ་ལོན་གྱི་ཚད་གཞི་སྤར་ཆ་གནང་ཕྱོགས་ཀྱི་དཀའ་རྙོག

༄༅༎ཨ་མི་རི་ཀའི་སྲིད་འཛིན་ཨོ་བ་མ་མཆོག་གིས་ཁྲིམས་བཟོ་བ་རྣམ་པར་རྒྱལ་ཁབ་ཀྱི་བུ་ལོན་གྱི་ཚད་གཞི་སྤར་ཆ་གནང་ཕྱོགས་ཀྱི་དཀའ་རྙོག་འཕྲལ་དུ་སེལ་དགོས་པའི་དུས་བ་བབ་ཡོད་ལུགས་གཏམ་བཤད་གནང་འདུག

འདས་པའི་ཉིན་ཤས་རིང་སྲིད་འཛིན་ཨོ་བ་མ་མཆོག་གིས་གྲོས་ཚོགས་གོང་འོག་གི་ཁྲིམས་བཟོ་བ་ཡོངས་ལ་རེས་གཟའ་མིག་དམར་གོང་བུ་ལོན་གྱི་ཚད་གཞི་སྤར་ཆ་གཙོས་པའི་ཁྲིམས་འཆར་གཏན་འབེབས་མ་བྱས་ཚེས་གཞུང་འགྲོན་གཏོང་ཡ་མེད་པའི་དཀའ་ངལ་སྤྲད་རྒྱུར་ཐེ་ཚོམ་མེད་པ་མ་ཟད་ རྒྱལ་ཁབ་ནང་སྔར་བྱུང་མྱོང་མེད་པའི་དཀའ་ངལ་ནང་ལྷུངས་ནས་རྒན་ཕོགས་དང་ སྨན་བཅོས་ སྲུང་སྐྱོབ་སོགས་སྤྱི་ཚོགས་བདེ་དོན་གྱི་ལས་འགུལ་མང་དག་ཞིག་ལ་ཟློག་དུ་མེད་པའི་དཀའ་ངལ་འཕྲད་རྒྱུར་ངེས་པར་བརྟེན་ ཚོགས་པ་གཉིས་ཀས་ད་ཆ་སོ་སོའི་ཚོགས་པའི་ལངས་ཕྱོགས་ཁོ་ན་དམ་འཛིན་མ་བྱས་པར་ རྒྱལ་ཁབ་ཀྱི་ཕེ་ཕན་ཆེད་དུ་ལྟ་བ་མཁྲེགས་འཛིན་དོར་ནས་གུ་བཤང་འགྲིག་འཇགས་གྱིས་ ང་ཚོས་ཨ་མི་རི་ཀ་ད་དུང་ཡང་འཛམ་གླིང་ནང་རྒྱལ་ཁབ་རྫིག་ཤོས་ཡིན་པ་བསྐྱར་དུ་ར་སྤྲོད་བྱེད་དགོས་ཅེས་འབོད་སྐུལ་ནན་པོ་གནང་ཡོད་རེད། ཨ་རིའི་དབུས་གཞུང་གི་བུ་ལོན་གྱི་ཚད་གཞི་འདི་ལོ་ཕྱི་ཟླ་ལྔ་པའི་ཚེས་༡༦བར་ཌོ་ལར་ཁྲག་ཁྲིག་༡༤དང་ཐེར་འབུམ་༢༩ཡིན་པ་རེད།  བུ་ལོན་གྱི་ཚད་གཞི་སྤར་ཕྱོགས་དང་གཞུང་གི་འགྲོ་སོང་གཅོག་ཆ་བྱ་ཕྱོགས་དང་ཡོང་འབབ་སོགས་ཀྱི་ཐད་ད་བར་དམངས་གཙོ་དང་སྤྱི་མཐུན་ཚོགས་པའི་དབར་འགྲིག་འཇག་བྱུང་མེད་ཀྱང་རྒྱ་ཆེའི་མང་ཚོགས་ཀྱི་གནོན་ཤུགས་འོག་ཉི་མ་གཉིས་ནང་ཚུད་འགྲིག་འཇགས་ཡོང་རྒྱུར་ཚོད་དཔག་བྱེད་བཞིན་པ་རེད།