ཆོས་དབྱིངས་སྐྱིད་ལགས་སུ་པེ་རིསི་ཨོ་ལོམ་པིཀསི་ཀྱི་འདུར་རྒྱུག་འགྲན་བསྡུར་ཁྲོད་རྒྱལ་ཁ་བྱུང་མེད་ཀྱང་བོད་ཕྱི་ནང་གཉིས་ནས་ཁོང་ལ་རྒྱབ་སྐྱོར་ཤུགས་ཆེ་བྱས་པ།

ཆོས་དབྱིངས་སྐྱིད་ཨོ་ལོམ་པིཀསི་རྩེད་འགྲན་སྐབས། ༢༠༢༤།༠༨།༠༧

ཕྱི་ལོ་ ༢༠༢༤ ཟླ་ ༨ ཚེས་ ༧ ཉིན། ཨོ་ལོམ་པིཀསི་རྩེད་འགྲན་ཁྲོད་བོད་མི་གསེར་གྱི་རྟགས་མ་ཐོག་མ་ཐོབ་མཁན་འདུར་རྒྱུག་ལུས་རྩལ་པ་ཆོས་དབྱིངས་སྐྱིད་ལགས་ཀྱིས་ཧྥ་རན་སིར་ཚོགས་པའི་པེ་རིསི་ཨོ་ལིམ་པིཀསི་ (Olympics) རྩེད་འགྲན་ཁྲོད་སྐྱེས་པ་དང་བེུད་མཉམ་བསྲེས་ཀྱི་སྤྱི་ལེ་ ༤༢.༡༩༥ཡི་འདུར་རྒྱུག་འགྲན་བསྡུར་ནང་མཉམ་ཞུགས་གནང་ཡོད་པ་དང་།   འགྲན་བསྡུར་འདི་ཧྥ་རི་སིའི་ལྕགས་མདུང་ཉེ་འཁོར་དུ་གཉེར་ཡོད།  ཁོང་མོ་དང་མཉམ་དུ་འདུར་རྒྱུག་རྩེད་རོགས་རྒྱ་རིགས་སྐྱེས་པ་དེར་རྩེད་འགྲན་གྱི་སྒྲིག་གཞི་དང་འགལ་བའི་ཉེས་ཆད་འོག་ཕམ་ཉེས་བྱུང་ཡོད་ན་ཡང་འདུར་རྒྱུག་འགྲན་བསྡུར་སྐབས་བོད་ཕྱི་ནང་གཉིས་ནས་སྤྱི་ཚོགས་དྲ་ལམ་ཁག་ཏུ་ཆོས་དབྱིངས་སྐྱིད་ལགས་སུ་རྒྱབ་སྐྱོར་ཤུགས་ཆེ་ཐོབ་ཡོད།

ད་རེས་ཀྱི་འདུར་རྒྱུག་འགྲན་བསྡུར་འདིའི་ནང་ཆོས་དབྱིངས་སྐྱིད་ལགས་སུ་བོད་པའི་ངོས་ནས་རྒྱབ་སྐྱོར་མཚོན་ཆེད་བོད་མི་མང་པོ་དངོས་སུ་རྩེད་འགྲན་བྱ་ཡུལ་དངོས་ལ་ཕེབས་ནས་ཆོས་དབྱིངས་སྐྱིད་ཟེར་ཁོང་གི་མིང་ནས་འབོད་པ་དང་ཤུགས་རྒྱོབས་ཞེས་འབོད་བཞིན་པ་གོ་ཐོས་ཡོང་གི་ཡོད་པ་མ་ཟད། རྩེད་འགྲན་ཡུལ་དངོས་སུ་བོད་ཀྱི་རྒྱལ་དར་གཤམ་ཡོད་པ་སོགས་མཐོང་རྒྱུ་འདུག་ལ།  དེ་མིན་བོད་ནང་ནས་སྤྱི་ཚོགས་དྲ་ལམ་བརྒྱུད་ཆོས་དབྱིངས་སྐྱིད་ལགས་མཉམ་ཞུགས་ཡོད་པའི་རྩེད་འགྲན་འདིའི་ཐད་གཏོང་ལ་ལྟ་མཁན་ཧ་ཅང་མང་པོ་བྱུང་ཡོད་འདུག་ལ།   ཐད་གཏོང་འོག་ཏུ་ཞབས་མཆན་དང་གསོལ་བ་སྨོན་འདེབས་པ་སོགས་མཐོང་རྒྱུ་ཡོད་པའི་ཐོག་ད་རེས་ཀྱི་འགྲན་བསྡུར་འདིའི་ནང་ཁོང་ལ་ཕམ་ཉེས་བྱུང་པའི་རྗེས་བོད་མི་ཞིག་ནས་སྐད་འཕྲིན་དྲ་ལམ་དུ་སེམས་ནས་བཟོད་མི་ཐུབ་པའི་ཚོར་བ་ཞིག་གིས་མིག་ཆུ་ལྷུང་ལྷུང་དུ་བཏང་པ་དང་། ཡང་བོད་མི་མང་པོས་ཆོས་དབྱིངས་སྐྱིད་ནི་མི་རིགས་ཀྱི་ལ་རྒྱལ་དང་སྤོབས་ཡིན་པའི་སེམས་ཤུགས་སྐྱེད་གཞི་སོགས་སྤེལ་བཞིན་པ་མཐོང་རྒྱུ་འདུག

ཧྥ་རན་སིར་གནས་བཞུགས་བསྟན་འཛིན་རྣམ་རྒྱལ་ལགས་ཆོས་དབྱིངས་སྐྱིད་ལགས་ཀྱིས་འདུར་རྒྱུག་འགྲན་བསྡུར་བྱེད་ཡུལ་དུ་དངོས་སུ་སོང་ཡོད་པ་དང་། ཁོང་གིས། རྒྱལ་སྤྱིའི་རྩེད་འགྲན་འདིའི་ནང་བོད་ཀྱི་བུ་མོ་འདུར་རྒྱུག་ལུས་རྩལ་པ་ཆོས་དབྱིངས་སྐྱིད་ལགས་དངོས་སུ་མཐོང་དུས། དགའ་སྐྱོ་གཉིས་ལྡན་གྱི་ཚོར་སྣང་བྱུང་ལ་མཉམ་དུ་མ་འོངས་ཉིན་གཅིག་ལ་ང་ཚོའི་བོད་མི་རྩེད་འགྲན་པ་དེ་ཚོ་བོད་རྒྱལ་ཁབ་ཆེན་པོའི་རྒྱལ་དར་གྱི་འོག་ལ་འགྲན་ཞུགས་ཐུབ་པའི་སྨོན་ལམ་རྒྱབ་པ་ཡིན་ཞེས་པ་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
ད་ཪེས་ཆོས་དབྱིངས་སྐྱིད་ལགས་ཀྱི་འགྲན་བསྡུར་དེ་རྒྱ་ནག་གི་(CCTV 5+)་བརྙན་འཕྲིན་སོགས་སུ་སྟོན་སྐབས་འགྲན་བསྡུར་བྱེད་ཡུལ་དུ་བོད་མི་རྒྱབ་སྐྱོར་བ་ཚོས་བོད་ཀྱི་རྒྱལ་དར་འཕྱར་ཡོད་པ་བོད་ནང་གི་བོད་མི་ཁག་ཅིག་གིས་མཐོང་འདུག་པར་ཁོང་ཚོས་བོད་ཀྱི་རྒྱལ་དར་མཐོང་པས་དགའ་ཚོར་བྱུང་ཞེས་གསུངས་མཁན་འདུག
ཆོས་དབྱིངས་སྐྱིད་ལགས་སུ་ཨེ་ཤེ་ཡ་རང་དབང་རླུང་འཕྲིན་ཁང་གི་རྒྱ་སྐད་སྡེ་ཚན་གྱི་གསར་འགོད་པ་འཇེཕ་ཝང་ (Jeff Wang) གིས་བཅར་འདྲི་ཞུས་སྐབས། ཁོང་མོས། ད་རེས་གྱི་འགྲན་བསྡུར་མཇུག་འབྲས་ཅུང་སེམས་སྐྱོ་དགོས་པ་ཞིག་ཆགས་སོང་ཡང་། ཁོང་མོའི་ཤུགས་རྐྱེན་ལས་དེང་སྐབས་རྒྱང་རྒྱུག་འགྲན་སྡུར་གཙོས་རྩེད་འགྲན་ཁག་གི་ནང་བོད་རིགས་ལུས་རྩལ་བ་མཉམ་ཞུགས་བྱེད་མཁན་ཇེ་མང་ཡིན་པས་སེམས་པ་དགའ་སྣང་ཡོང་གི་ཡོད་ཅེས་ལན་འདེབས་གནང་འདུག
ཁོང་མོས་ད་དུང་། ད་བར་ཨོ་ལོམ་པིཀསི་ཀྱི་རྩེད་འགྲན་ཐེངས་ ༤ ནང་མཉམ་ཞུགས་བྱས་པ་དང་། འགྲན་ཚོགས་བཞི་ཀར་ང་རང་བོད་མིའི་སྐུ་ཚབ་གཅིག་པུ་དེ་ཡིན་པ་དང་། ངས་དུས་ཡུན་རིང་པོར་ཨུ་ཚུགས་བྱས་པའི་རྒྱུ་མཚན་ནི་ངས་ཕྲུ་གུ་འགའ་ཤས་ལ་ཤུགས་རྐྱེན་སྤྲོད་འདོད་ཡོད་པས་ཡིན། ངས་བོད་ཀྱི་ལུས་རྩལ་བ་ཇེ་མང་ནས་ཇེ་མང་ཡོང་བཞིན་པ་མཐོང་ཞིང་། སེམས་པ་སྤྲོ་སྣང་ལྡན་པ་ཚོར་གྱི་འདུག ངས་བལྟས་ན་འདི་དག་ཚང་མ་རིན་ཐང་ལྡན་པ་རེད་བསམ་གྱི་འདུག་པས། འདི་ནི་རྟགས་མ་ཞིག་གིས་སྒྲུབ་ནུས་པ་མི་མཚོན་ཞེས་འདུར་རྒྱུག་འགྲན་བསྡུར་གྲུབ་རྗེས་གསར་འགོད་པར་གསུངས་འདུག

ཐེངས་འདིར་སྐྱེས་པ་དང་བེུད་མཉམ་བསྲེས་ཀྱི་འདུར་རྒྱུག་འགྲན་བསྡུར་ཁྲོད་ཁོ་མོ་དང་མཉམ་འབྲེལ་མཁན་རྒྱ་རིགས་སྐྱེས་པ་ཧེ་ཤང་ཧུང་གིས་སྤྱི་ལེ་༡༠རྒྱུག་རྗེས་ཆོས་དབྱིངས་སྐྱིད་ལགས་སུ་བརྒྱུད་སྤྲོད་བྱས་ཡོད་པ་དང་། ཁོ་མོ་ཐེངས་དང་པོའི་སྤྱི་ལེ་ ༡༠ དང་མཐའ་མའི་སྤྱི་ལེ་ ༡༠ བཅས་ཁྱོན་སྤྱི་ལེ་ ༢༠ རྒྱུག་ཡོད་ན་ཡང་། ཁོང་དང་མཉམ་དུ་རྒྱུག་མཁན་གྱི་རྒྱ་རིགས་སྐྱེས་པ་དེས་རྩེད་འགྲན་གྱི་སྒྲིག་གཞི་དང་འགལ་ཏེ་ཤོག་བྱང་དམར་པོ་རགས་རྐྱེན། རྩེད་འགྲན་ཁྲོད་ནས་ཕྱིར་ཕུད་ཀྱིས་སྐར་མ་བཀག་ཡོད་སྟབས་རྩེད་འགྲན་ཁྲོད་རྗེས་ལུས་ཐེབས་པར་ཤུགས་རྐྱེན་ཆེན་པོ་བྱུང་ཡོད་པ་དང་། ཐེངས་འདིར་ཁོང་ལ་ཕམ་ཉེས་བྱུང་དོན་ནི་རྒྱ་རིགས་རྩེད་འགྲན་པ་སྐྱེས་པ་དེའི་ནོར་འཁྲུལ་ཡིན་ཞེས། བོད་མི་མང་དག་ཅིག་གིས་སྐྱོན་བརྗོད་བྱེད་བཞིན་ཡོད་འདུག

ཆོས་དབྱིངས་སྐྱིད་ལགས་ནི་བོད་ཀྱི་ལོ་རྒྱུས་ཁྲོད་ཨོ་ལོམ་པིཀསི་རྩེད་འགྲན་ཐོག་བོད་མི་གསེར་གྱི་རྟགས་མ་ཐོབ་མཁན་ཐོག་མ་དེ་ཡིན་ཞིང་།   ཁོང་གིས་ཨོ་ལོམ་པིཀསི་ཡི་འདུར་རྒྱུག་འགྲན་བསྡུར་ནང་མཉམ་ཞུགས་གནང་བ་དེས་ཕམ་ཉེས་བྱུང་མིན་ལ་མ་ལྟོས་པར་བོད་ཕྱི་ནང་གཉིས་ཀྱི་བོད་མི་རྣམས་ལ་དགའ་ཚོར་དང་སྤོབས་པ་སྐྱེ་གཞི་ཞིག་ཆགས་ཡོད་པ་རེད་ལ།   ཕྱི་ཚེས་ ༦ ཉིན་ནས་བཟུང་བོད་ཕྱི་ནང་གཉིས་ཀྱི་སྤྱི་ཚོགས་དྲ་ལམ་ཁག་ཏུ་ཁོང་གི་འགྲན་བསྡུར་དང་འབྲེལ་བའི་བྱང་བུ་སྒྲིག་བཟོ་བྱས་པ་སོགས་མང་པོ་ཞིག་བརྒྱུད་བསྐུར་བྱེད་བཞིན་ཡོད་པ་དང་། བོད་མི་གཅིག་ནས་གཟི་བརྗིད་དང་ཕུགས་འདུན་འཚོལ་སྙེག་གི་བཞུད་ལམ་རིང་མོ་འདི་ད་ནི་འགོ་རྩོམ་ལ་ཉེ་སྟེ། ང་ཚོས་མཉམ་དུ་ཆོས་དབྱིངས་སྐྱིད་ཀྱིས་ཕད་རི་སིའི་ཨོ་རྩལ་འགྲན་ཚོགས་སྟེང་སླར་ཡང་གྲུབ་འབྲས་གསར་པ་ལེན་པར་རེ་སྨོན་ཞུ་ཞེས་དང་། ཁྱེད་ཀྱིས་གངས་དཀར་པོའི་དབུ་འཕང་དགུང་ལ་བསྟད་མྱོང་། དེ་རིང་ཡང་སྔ་བཞིན་བསམ་ཐོག་ལ་ཡོང་བའི་སྨོན་ལམ་འདེབས་ཞེས་དང་། ཡང་ཧྥ་རན་སིར་བཞུགས་མཁན་བཙན་བྱོལ་བོད་མི་མང་པོས་ཁོང་ལ་རྒྱབ་སྐྱོར་མཚོན་ཆེད་ཡུལ་དངོས་སུ་ཆེད་བཅར་གྱིས་སྐད་འབོད་ལམ་ནས་རྒྱབ་སྐྱོར་གནང་ཡོད་འདུག

ཆོས་དབྱིངས་སྐྱིད་ལགས་ནི་ཕྱི་ལོ་ ༡༩༩༠ ལོར་རྒྱ་ནག་གཞུང་གིས་དབྱེས་བའི་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་ཟེར་བའི་མདའ་བཞིའམ་ཧེ་ཡན་རྫོང་ཝ་འཇོག་ཡུལ་ཚོའི་བོད་པའི་འབྲོག་ཁྱིམ་དཀྱུས་མ་ཞིག་ཏུ་སྐྱེས་ཤིང་། རྒྱལ་སྤྱིའི་ཨོ་ལིམ་པིཀསི་འགྲན་ཚོགས་སྟེང་གསེར་གྱི་བྱ་དགའ་ལེན་མཁན་གྱི་བོད་པ་ཐོག་མ་དེ་ཡིན་པ་དང་། ཁོང་ཕྱི་ལོ་ ༢༠༡༠ ལོར་རྒྱ་ནག་རྒྱལ་ཁབ་ཀྱི་མཆོང་རྒྱུག་འཕེན་གསུམ་རུ་ཁག་ཏུ་ཞུགས་རྗེས། ཕྱི་ལོ་ ༢༠༡༢ ལོར་དབྱིན་ཡུལ་གྱི་རྒྱལ་ས་ལོན་ཌོན་དུ་འཚོགས་པའི་རྒྱལ་སྤྱིའི་ཨོ་ལིམ་པིཀསི་འགྲན་ཚོགས་ནང་ཞུགས་པ་དང་། དེ་བཞིན་ཕྱི་ལོ་ ༢༠༡༥ ལོའི་སིཔེན་རྒྱལ་ཁབ་ཏུ་ཚོགས་པའི་རྒྱལ་སྤྱིའི་མཆོང་རྒྱུག་འཕེན་གསུམ་འགྲན་བསྡུར་ནང་སྤྱི་ལེ་༢༠ཅན་གྱི་བུད་མེད་འདུར་རྒྱུག་འགྲན་བསྡུར་ཁྲོད་ཨང་གཉིས་པ་ཐོབ་པ་དང་། རྒྱ་ནག་རྒྱལ་ཡོངས་ཀྱི་རྟིང་རྩོད་འགྲན་བསྡུར་གྱི་ནང་སྤྱི་ལེ་ ༢༠ ཅན་གྱི་བུད་མེད་འདུར་རྒྱུག་འགྲན་བསྡུར་ནང་ཨང་དང་པོ་བཅས་ཐོབ་མྱོང་ཡོད་པ་རེད།

ཆོས་དབྱིངས་སྐྱིད་ལགས་ཀྱིས་ཕྱི་ལོ་ ༢༠༡༢ ལོར་དབྱིན་ཡུལ་གྱི་རྒྱལ་ས་ལོན་ཌོན་དུ་རྒྱལ་སྤྱིའི་ཨོ་ལིམ་པིཀསི་རྩེད་འགྲན་ནང་སྤྱི་ལེ་ ༢༠ ཡི་འདུར་རྒྱུག་འགྲན་བསྡུར་ནང་ཞུགས་པའི་སྐབས་ཆུ་ཚོད་ ༡ དང་སྐར་མ་ ༢༥ སྐར་ཆ་ ༡༦ གྱིས་ཨེ་ཤེ་ཡའི་རྩེད་འགྲན་པའི་ལོ་རྒྱུས་ཀྱི་ཟིན་ཐོ་འཁོད་དེ་ཟངས་ཀྱི་རྟགས་མ་ཐོབ་ཡོད་པ་དང་། ཪ་ཤི་ཡའི་ (Russia) བུད་མེད་འདུར་རྒྱུག་པ་གཉིས་ལ་གསེར་དང་དངུལ་གྱི་རྟགས་མ་ཐོབ་ཡོད་ཀྱང་།  རྗེས་སུ་ཁོང་གཉིས་ཀྱིས་འགྲན་བསྡུར་སྐབས་སྨན་རྫས་སྤྱད་ཡོད་པ་ཤེས་རྟོགས་བྱུང་སྟེ་ཁོང་གཉིས་ཀྱི་རྟགས་མ་དེ་གཉིས་རྩིས་མེད་བཏང་པ་དང་། ཆོས་དབྱིངས་སྐྱིད་ལགས་སུ་གསེར་གྱི་རྟགས་མ་ཐོབ་པ་གསལ་བསྒྲགས་བྱས་ཡོད་ལ། ལོ་ངོ་ ༡༡ གི་རྗེས་སུ་ཕྱི་ལོ་ ༢༠༢༣ ལོར་ཁོང་ལ་ཨོ་ལིམ་པིཀསི་ཀྱི་གསེར་གྱི་རྟགས་མ་རྗེས་གསབ་བྱས་ཏེ་དངོས་སུ་རྩིས་སྤྲོད་གནང་པ་དང་ཨོ་ལོམ་པིཀསི་རྩེད་འགྲན་ཁྲོད་གསེར་གྱི་རྟགས་མ་ལེན་མཁན་བོད་མི་ཐོག་མ་དེ་ཡང་ཆགས་ཡོད་པ་རེད།།

གསར་འགོད་པ། བདེ་སྐྱིད་ཀུན་སྒྲོལ།  བཀྲིས་དབང་ཕྱུག   འཇེཕ་ཝང་།

རྩོམ་སྒྲིག་པ། བསྟན་འཛིན་པདྨ། 

དྲྭ་ཐོག་རྩོམ་སྒྲིག་པ། སྒྲོལ་དཀར། བཀྲ་ཤིས་དབང་ཕྱུག

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།