རྒྱ་ནག་ནང་གི་ཨ་རིའི་གཞུང་ཚབ་སྲིད་འཛིན་འོས་བསྡུར་ཞུགས་རེ།

༄༅༎རྒྱ་ནག་ནང་ཡོད་པའི་ཨ་མི་རི་ཀའི་གཞུང་ཚབ་ཆེན་མོ་ཇོན་ཧན་སི་མེན་ནས་ཕྱི་ལོ་༢༠༡༢་ལོའི་ཨ་རིའི་སྲིད་འཛིན་གྱི་འོས་བསྡུའི་འགྲན་རྩོད་ནང་ཞུགས་འདོད་ཡོད་པའི་རྣམ་འགྱུར་ཤུགས་ཆེ་ཞིག་གསལ་སྟོན་གནང་བཞིན་ཡོད་པའི་སྐོར་གནས་ཚུལ་ཐོན་ཡོད་པ་རེད།

རྒྱ་སྐད་ཡག་པོ་བསྐྱོན་མཁན་གྱི་ཨ་རིའི་གཞུང་ཚབ་ཆེན་མོ་ཇོན་ཧན་སི་མེན་ནི་རྒྱ་ནག་ནང་གཞུང་ཚབ་ཀྱི་ལས་འཁུར་མ་བཞེས་གོང་ཨ་མི་རི་ཀའི་ཡུའུ་ཀྲའ་མངའ་སྡེའི་སྤྱི་ཁྱབ་འགན་འཛིན་ཡིན་པ་དང་ ཁོང་ནས་༢༠༠༨ཀྱི་འོས་བསྡུའི་ནང་སྲིད་འཛིན་ཨོ་སྦ་མའི་ཁ་གཏད་སྤྱི་མཐུན་ཚོགས་པའི་སྲིད་འཛིན་འོས་མི་ཇོན་མེ་ཀེན་གྱི་འོས་བསྡུའི་དྲིལ་བསྒྲགས་ཀྱི་ལས་དོན་འགན་འཁུར་གནང་མཁན་གཙོ་བོའི་གྲས་ཤིག་ཡིན་པ་དང་ ཨ་རིའི་སྲིད་འཛིན་མཆོག་གིས་འོས་ཐོབ་ཀྱི་རྗེས་སུ་ཁོང་ལ་རྒྱ་ནག་ནང་གཞུང་ཚབ་ཏུ་བཀོད་གཏོང་གནང་བ་འདིས་སྐབས་དེར་སྲིད་དོན་དབྱེ་ཞིབ་པ་ཚོས་སྲིད་འཛིན་ཨོ་སྦ་མས་ཕྱིས་བྱུང་ཕྱི་ལོ་༢༠༡༢ཀྱི་འོས་བསྡུའི་ནང་ཁོང་ལ་འགྲན་བསྡུར་ཐུབ་པའི་ཕྱོགས་འགལ་སྤྱི་མཐུན་ཚོགས་པའི་སྲིད་འཛིན་གྱི་འོས་མི་ནུས་ལྡན་ཞིག་༢༠༡༢ལོར་ཁ་གཏད་དུ་ཐོན་མི་ཐུབ་པའི་ཐབས་ཤེས་བཟང་པོ་ཞིག་བྱུང་ཡོད་པར་ངོས་འཛིན་ གནང་ཡོད་པ་རེད་

དེ་ལྟར་ཡང་ད་རེས་ཨ་རིའི་ནིའུ་སི་ལྦིཀ་Newsweekདུས་དེབ་ཀྱིས་གཞུང་ཚབ་ཆེན་མོ་ཇོན་ཧན་སི་མེན་ལ་ཁོང་༢༠༡༢་ཀྱི་སྲིད་འཛིན་གྱི་འོས་མིར་ཞངས་འཆར་ཡོད་མེད་བཀའ་དྲིས་ཞུས་པའི་སྐབས་སུ་ ཁོང་གིས་ངོས་ཀྱི་ནུས་པ་གང་ཡོད་ད་ལྟ་རང་གི་ལས་འཁུར་དེའི་ཐོག་བཏོང་བཞིན་ཡོད་ལ་ ཡིན་ནའི་ལས་ཀ་འདི་མུ་མཐུད་ནས་བྱེད་ནས་སྡོད་ཡ་ཞིག་མ་རེད་ཅེས་གོ་དོན་ཞིག་སྤེལ་ཡོད་པ་དང་ ཡང་གཞུང་ཚབ་ཆེན་མོ་མཆོག་དང་བློ་ཐག་ཉེ་པོ་ཡོད་པའི་མི་སྣ་ཚོས་ཁོང་ནས་ཉེ་ལམ་ཨ་རིའི་ནང་ཕྱོགས་བསྐྱོད་སྐབས་སུ་ཕྱིས་འབྱུང་སྲིད་འཛིན་གྱི་འོས་བསྡུར་ཞངས་རྒྱུའི་གནད་དོན་གྱི་སྐོར་འབྲེལ་ཡོད་མི་སྣའི་ལྷན་བཀའ་བསྡུར་གནང་ཡོད་པའི་སྐོར་ཡང་ངོ་སྤྲོད་གནང་བའི་གནས་ཚུལ་བཀོད་ཡོད་པ་རེད་ ཇོན་ཧན་སི་མེན་ནི་ཨ་རིའི་ནང་ཚོང་པ་འབྱོར་ལྡན་ཞིག་བུ་ཡིན་པ་དང་ ཁོང་ལ་རྒྱ་གར་དང་རྒྱ་ནག་གཉིས་ནས་བདག་སྐྱོང་གནང་བའི་བོུ་གསོ་ཕྲུག་གཉིས་ཀྱི་གཙོས་ཕྲུ་གུ་བདུན་ཡོད་པ་དང་ གལ་ཏེ་ཁོང་སྲིད་འཛིན་འོས་མིར་ཞངས་པ་ཡིན་ན་ ཁོང་ཨ་རིའི་ཕྱོགས་འགལ་སྤྱི་མཐུན་ཚོགས་པའི་སྲིད་འཛིན་འོས་མིའི་ཁུངས་སུ་དགོངས་པ་གུ་ཡངས་བཞེས་མཁན་གྱི་འོས་མི་ནུས་ལྡན་ཞིག་འགྱུར་གྱི་ཡོད་པའི་ཚོད་དཔག་གནང་གི་ཡོད་པ་རེད་