ཨ་མི་རི་ཀའི་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ Donald Trump ལ་ཨ་རིའི་སྲིད་འཛིན་འོས་འདེམས་ཁྲོད་རྒྱལ་ཁ་ཐོབ་འདུག

ཨ་རིའི་སྲིད་འཛིན་གྱི་འོས་བསྡུའི་གྲུབ་འབྲས་གཟིགས་རྒྱུར་འདིར་མནན།

ཨེ་པི་གསར་འགྱུར་ལས་ཁང་གིས་ཕྱི་ཚེས་ ༦ ཉིན་གནས་ཚུལ་སྤེལ་བའི་ནང་ཨ་མི་རི་ཀའི་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་Donald Trump ལ་ཨ་མི་རི་ཀའི་རྒྱལ་ཡོངས་ Electoral College ཞེས་པའི་སྲིད་འཛིན་འོས་བསྡུའི་ཆེད་ཀྱི་འོས་འཕེན་པའི་ཚོགས་ཆུང་གི་འོས་ཤོག་ཐོབ་ཁོངས་ནས་འོས་གྲངས་ ༢༧༧ ཐོབ་ནས་ཁོང་ཨ་མི་རི་ཀའི་སྲིད་འཛིན་ཐེངས ༤༧ པར་འདེམས་ཐོན་བྱུང་འདུག  ཁོང་གི་འགྲན་ཡ་དམངས་གཙོ་ཚོགས་པའི་སྲིད་འཛིན་འོས་མི་ལྩམ་ Kamala Harris ལ་འོས་འཕེན་པའི་ཚོགས་ཆུང་གི་ཐོབ་ཁོངས་ནས་འོས་གྲངས་ ༢༢༤ ལས་ཐོབ་གནང་མེད་པ་རེད།

སྤྱིར་ཨ་མི་རི་ཀའི་སྲིད་འཛིན་ལ་འོས་འདེམས་ཡོང་རྒྱུར་འོས་འདེམས་པའི་ཚོགས་ཆུང་གི་འོས་གྲངས་༢༧༠ཐོབ་དགོས་ཀྱི་ཡོད་པ་རེད།  ཨ་རིའི་མངའ་སྡེ་ཁག་ཅིག་གི་ནང་མུ་མཐུད་དུ་འོས་ཤོག་གྲངས་བཤེར་གནང་བཞིན་ཡོད་པ་རེད།
ཨ་མི་རི་ཀའི་སྲིད་འཛིན་ལ་འདེམས་ཐོན་བྱུང་བའི་སྐུ་ཞབས་ Donald Trump ནི་ཨ་མི་རི་ཀའི་སྲིད་འཛིན་ལས་ཐོག་ ༤༧ དེ་ཆགས་རྒྱུ་ཡིན་པ་དང་ཁོང་ནི་ཨ་མི་རི་ཀའི་ལོ་རྒྱུས་ནང་ཕྱི་ལོ་ ༡༨༩༢ ལོར་སྲིད་འཛིན་དམ་པ་ Grover Cleveland གི་རྗེས་ནས་སྲིད་འཛིན་ཞིག་ལ་འོས་ཤོག་ཚར་གཅིག་ཤོར་བའི་རྗེས་བསྐྱར་དུ་འོས་ཤོག་ཐོབ་གནང་མཁན་གཉིས་པ་དེ་ཆགས་ཡོད་པ་རེད་ལ།  ཡང་ཁོང་ནི་ནག་ཉེས་ཕོག་པའི་སྲིད་འཛིན་གྱི་འོས་ཤོག་ཐོབ་གནང་མཁན་ཐོག་མ་དེའང་ཆགས་རྒྱུ་ཡིན་པ་རེད།    ཨ་མི་རི་ཀའི་སྲིད་འཛིན་ལ་འདེམས་ཐོན་བྱུང་བའི་སྐུ་ཞབས་ Donald Trump གིས་ཨ་མི་རི་ཀའི་དབུས་གཞུང་ནང་འགྱུར་བ་ཤུགས་ཆེ་གཏོང་རྒྱུའི་ཁས་ལེན་གནང་ཡོད་པ་མ་ཟད་ཕྱི་འབྲེལ་སྲིད་ཇུས་ཐོག་ལ་ཡང་འགྱུར་བ་ངེས་ཅན་ཞིག་ཐེབས་རྒྱུ་ཡིན་པའི་སྐོར་སོགས་གནས་ཚུལ་ནང་བཀོད་འདུག  

གསར་འགོད་པ། ལྷུན་གྲུབ་ཚེ་རིང། རིག་ལྡན་སྒྲོལ་མ།
རྩོམ་སྒྲིག་པ། རིག་ལྡན་སྒྲོལ་མ། བསྟན་འཛིན་པདྨ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ནོར་སྡེ་སྒྲོལ་མ།