བོད་ཀྱི་རྒྱལ་ས་ལྷ་སའི་ཞོ་སྟོན་དུས་ཆེན་ཉེན་རྟོག་པས་བསྐོར་བའི་དམ་དྲག་འོག་སྲུང་བརྩི་བྱེད་དགོས་བྱུང་འདུག

ཕྱི་ལོ་ ༢༠༢༤ ཟླ་ ༨ ཚེས་ ༤ ནས་བཟུང་བོད་ཀྱི་རྒྱལ་ས་ལྷ་སའི་ནང་ཞོ་སྟོན་གྱི་དུས་ཆེན་དངོས་སུ་དབུ་འཛུགས་གནང་སྟེ། འབྲས་སྤུངས་དགོན་པར་གོས་སྐུ་བཤམ་གནང་བའི་སྐབས་ཕྱོགས་ཁག་གང་སར་ཉེན་རྟོག་མི་སྣ་བཀྲམས་ཡོད་པ་དང་། བོད་ཀྱི་རྒྱལ་ས་ལྷ་སའི་ཁུལ་དུ་ཞོ་སྟོན་གྱི་དུས་ཆེན་སྔ་ནུབ་ནས་འགོ་བཙུགས་ཀྱིས་རྒྱ་ནག་གི་ཉེན་རྟོག་པས་གཞུང་ལམ་ཁག་ཅིག་བཀག་སྡོམ་བྱས་པ་མ་ཟད། སྒྲིག་ཆས་གྱོན་པ་དང་མ་གྱོན་པའི་ཉེན་རྟོག་པས་གོས་སྐུ་བཤམ་ཡུལ་དུ་དམ་དྲག་ཧ་ཅང་ཆེན་པོ་བྱས་པ་དང་། ལྷ་སའི་ནོར་བུ་གླིང་ཁའི་ནང་རྒྱུན་ལྡན་བཞིན་གླིང་ཀ་གཏོང་སྲོལ་ཡོད་པ་ཡང་དམ་དྲག་བྱེད་ཀྱི་ཡོད་པ་མ་ཟད། གོས་སྐུ་བཤམ་ཡུལ་དུ་དགེ་འདུན་པའི་ཆས་གྱོན་ནས་ཉེན་རྟོག་པས་ལྟ་སྲུང་བྱེད་ཀྱི་ཡོད་པ་བོད་ཀྱི་རྒྱལ་ས་ལྷ་ས་ནས་རང་གི་བདེ་འཇགས་ཆེད་མིང་བརྗོད་འདོད་མེད་པའི་བོད་མི་ཁག་ཅིག་གིས་བརྗོད་བྱུང་།

རྒྱ་ནག་གཞུང་འབྲེལ་བརྒྱུད་ལམ་ཤིན་ཧྭ་གསར་འགྱུར་ཁང་གིས་གནས་ཚུལ་ལྟར་ན། ད་ལྟ་རང་ལོ་ ༥༨ ཡིན་པའི་འབྲས་སྤུངས་དགོན་པའི་དགོན་སྡེ་དོ་དམ་ཨུ་ཡོན་ལྷན་ཁང་གི་འགན་འཛིན་གཞོན་པ་ངག་དབང་ཆོས་འཛིན་ལགས་ཀྱིས་གོས་སྐུ་ཆེན་པོ་བཤམ་སྟོན་གནང་བ་འདི་ནི་བདེ་ཐང་དང་བྱ་བ་ལམ་ལྷོང་གི་མཚོན་རྟགས་ཤིག་ཡིན་པ་བརྗོད་འདུག
འོན་ཀྱང་བོད་མི་ཁག་ཅིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ། གོས་སྐུ་གཤམས་གནང་བའི་སྐབས་ཕྱོགས་ཁག་གང་སར་སྒྲིག་ཆས་གྱོན་པ་དང་མི་གྱོན་པའི་རྒྱ་ནག་གཞུང་གི་ཉེན་རྟོག་མི་སྣ་བཀྲམས་ཡོད་པ་དང་། ཞོ་སྟོན་གྱི་དུས་ཆེན་དེར་ཞུགས་མཁན་མི་མང་ཚོ་སྲུང་བརྩི་ཞུ་སྐབས་བློ་བདེ་བག་ཕེབས་ཞིག་མེད་པར་སེམས་ནང་དངངས་འཚབ་ཆེན་པོ་ཡོད་ལུགས་གནས་ཚུལ་ངོ་སྤྲོད་གནང་བྱུང་ལ། ལྷག་པར་འདི་ལོའི་ཞོ་སྟོན་དུས་ཆེན་སྐབས་དེ་སྔ་ཡིན་ན་ཉིན་གྲངས་ ༥ རིང་གུང་གསེང་ཡོད་ཀྱང་འདི་ལོ་སྔར་དང་མི་འདྲ་བར་ལས་ཁུངས་ཁག་གི་ལས་བྱེད་པ་ཚོར་གུང་གསེང་ཉིན་གཅིག་ལས་བཞག་མེད་པ་དང་། ལྷ་སའི་ནོར་བུ་གླིང་ཁའི་ནང་ལྷ་མོ་ལྟ་བར་འགྲོ་སྐབས་རྒྱ་ནག་གཞུང་གིས་སྟངས་འཛིན་ནན་པོ་བྱེད་དེ་ནོར་བུ་གླིང་ཁའི་ནང་དུ་ཟས་རིགས་ཚོང་གཉེར་བྱེད་ས་མེད་པར་ནང་དུ་སྡོད་གནས་བཅས་པར་སྟངས་འཛིན་ཀྱི་ཡོད་པ་ཡང་འགྲེལ་བརྗོད་གནང་བྱུང་།

སྤྱིར་འདི་ལོའི་ཞོ་སྟོན་དུས་ཆེན་དེ་ལོ་སྔོན་མ་དང་མི་འདྲ་བར་ཕྱི་ཚུལ་ནས་བལྟས་ན་མི་ཚོགས་མང་ལ་འཁྲུགས་ཆ་དོད་པ་དང་། འབྲས་སྤུངས་དགོན་པའི་གོས་སྐུ་བཤམ་གནང་བའི་སྐབས། གོས་སྐུ་བསྣམས་ཕེབས་མཁན་གྱི་དགེ་འདུན་པའི་ནང་དུའང་ཉེན་རྟོག་མི་སྣས་དགེ་འདུན་པའི་ཆས་གོས་གྱོན་ནས་ལྟ་སྲུང་བྱེད་ཡོད་པ་བརྗོད་བྱུང་།
རྩ་བའི་ཆ་ནས་འདི་ལོའི་ལྷ་སའི་ཞོ་སྟོན་དེར་ཕྱི་ཕྱོགས་ནས་གཟིགས་ན་གོས་སྐུ་བཤམས་གནང་བའི་སྐབས་ས་ཕྱོགས་གང་སར་འཚང་ཁ་ཤིག་ཤིག་དང་། ཆོས་མཇལ་བ་རྣམས་ཀྱི་སེམས་ནང་སྤྲོ་སྣང་ཆེན་པོ་ཡོད་པའི་རྣམ་པ་གཟིགས་རྒྱུ་ཡོད་ཀྱང་དོན་དངོས་སུ་སྐབས་དེར་གཡས་ཡོན་ཚང་མར་དྲག་ཆས་གྱོན་པ་དང་། དྲག་ཆས་མི་གྱོན་པའི་ཉེན་རྟོག་མི་སྣ་ཕོན་ཆེ་བཀྲམ་ཡོད་པ་མ་ཟད། འགྲོ་ལམ་ཡོངས་སུ་ཉེན་རྟོག་པས་སྟངས་འཛིན་བྱེད་བཞིན་པ་དང་། གཡས་གཡོན་ཚང་མར་སྔར་ལས་པར་ཆས་མང་བ་བཙུགས་ནས་ལྟ་སྲུང་བྱེད་ཀྱི་ཡོད་པ་མ་ཟད། ལས་བྱེད་པ་དང་། སློབ་ཕྲུག་ཚོ་འབྲས་སྤུངས་དགོན་པར་གོས་སྐུ་མཇལ་བར་འགྲོ་མི་ཆོག་པའི་ཉེན་བརྡ་བཏང་ཏེ་གལ་སྟེ་ལས་བྱེད་པ་དང་། སློབ་ཕྲུག་ཚོ་འབྲས་སྤུངས་དགོན་པར་གོས་སྐུ་མཇལ་བར་ཕྱིན་པ་ཤེས་རྟོགས་བྱུང་ཚེ་སྐབས་འཕྲལ་ལས་ཁུངས་དང་། སློབ་གྲྭའི་སྒྲིག་གཞི་གཞིར་བཟུང་ཉེས་ཆད་འགེལ་རྒྱུ་ཡིན་པ་ཞོ་སྟོན་མ་ཚུགས་པའི་གོང་ནས་ཁུངས་སོ་སོར་ཉེན་བརྡ་བཏང་ཡོད་འདུག
ཡང་ལྷ་ས་གྲོང་ཁྱེར་ནང་བཞུགས་མཁན་གཞུང་འབྲེལ་ལས་བྱེད་མི་སྣ་ཁག་ཅིག་གིས། འདི་ལོའི་ཞོ་སྟོན་དུས་ཆེན་ཉིན་ཉིན་གཅིག་ལས་གུང་སེང་མེད་དུས་རེས་གཟའ་སྤེན་པ་ནས་འགོ་འཛུགས་ཀྱིས་ཕྱི་ཚེས་ ༥ རེས་གཟའ་ཟླ་བའི་བར་ལྷ་ས་གྲོང་ཁྱེར་ནས་ཚོུད་འགའ་ཤས་མོ་ཊ་བཏང་སྟེ་ཉེ་འཁོར་གྱི་གྲོང་གསེབ་ས་ཁུལ་ཁག་ནང་ཞོ་སྟོན་གྱི་དགའ་སྟོན་ལ་རོལ་བཞིན་ཡོད་འདུག

གསར་འགོད་པ། དབྱངས་སྒྲོན།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་སྤེལ་མཁན། ཀླུ་འབུམ།