སུཝེ་ཌེན་གྲོས་ཚོཊ་ནང་བོད་དོན་རྒྱབ་སྐྱོར་ཚོཊ་པ་གསར་འཛུགས།

སུཝེ་ཌེན་རྒྱལ་ཁབ་ཀྱི་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་ཞིག་གསར་འཛུགས་གནང་ཐུབ་པ་བྱུང་འདུག
དེ་ཡང་བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་རྒྱའི་ཐོག་གནས་ཚུལ་སྤེལ་བར་གཞིགས་ན། སྤྱི་ཟླ་ ༣ ཚེས་ ༢༨ ཉིན་སུཝེ་ཌེན་རྒྱལ་ཡོངས་གྲོས་ཚོགས་ཀྱི་འཐུས་མི་ལྕམ་ (Magareta Cederfelt) མ་ག་རེ་ཏ་ སེ་རྡར་ཧྥེལཊ་དང་། ལྕམ་ཀརེསི་ཊིན་ལུདྷ་གེརེན་ (Kerstin Lundgren) སྐུ་ཞབས་ཀཱརལ་ཤཡེ་ལར་(Carl Schyler། ལྕམ་ཊཱི་ན་ཨ་ཀེ་ལོཕྷཊ་ (Tina Ackerloft) ལྕམ་ཀེ་རོ་ལི་ནེ་ སཛཡེ་སྦར་ (Caroline Szyber) རྣམ་པ་ཐོུང་གི་ཐོག་ནས་ སུཝེ་ཌེན་གྲོས་ཚོགས་ཀྱི་བོད་ཀྱི་གྲོགས་པོ་ཚོགས་པའམ། སེུཝེ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་ཞིག་གསར་བཙུགས་གནང་འདུག
ཚོགས་པ་འདི་གསར་བཙུགས་རྗེས་ཀྱི་ཚོགས་འདུ་ཐེངས་པོའི་ཐོག་སུཝེ་ཌེན་བོད་དོན་རྒྱབ་སྐྱོར་ཚོགས་པ་ (Swedish Tibet Committee) འི་རྒྱུན་ལས་ཚོགས་མི་ཧ་ན་ཤཱལ་མན་དང་། སུཝེ་ཌེན་བོད་རིགས་ཚོགས་པའི་ཚོགས་གཞོན་འཇམ་དབྱངས་ཆོས་སྒྲོན་ལགས། ཚོགས་མི་བསྟན་འཛིན་བདེ་སྐྱིད་ལགས་བཅས་ལྷན་ཞུགས་གནང་འདུག
སྐབས་དེར་གྲོས་ཚོགས་ཀྱི་འཐུས་མི་ལྕམ་མ་ག་རེ་ཏ་ སེ་རྡར་ཧྥེལཊ་ལགས་ཀྱིས། སུཝེ་ཌེན་གྲོས་ཚོགས་ནང་བོད་དོན་ཐད་རྒྱབ་སྐྱོར་གནང་མཁན་མང་པོ་ཡོད་སྟབས། བོད་ཀྱི་གནད་དོན་འདི་བཞིན་སུཝེ་ཌེན་གྱི་གྲོས་ཚོགས་ནང་གླེང་སློང་དགོས་པ་གལ་ཆེན་པོ་ཡིན་པའི་སྐོར་གསལ་བཤད་གནང་པར་མ་ཟད། ཚོགས་འདུའི་ཐོག་བོད་ཀྱི་གནད་དོན་ཐད་གོ་རྟོག་སྤེལ་ཆེད་རིང་མིན་བོད་དང་འབྲེལ་བའི་ཚོགས་འདུ་ཞིག་བསྐོང་ཚོགས་གནང་རྒྱུར་མོས་མཐུན་བྱུང་འདུག
སུཝེ་ཌེན་བོད་རིགས་ཚོགས་པའི་ཚོགས་གཞོན་འཇམ་དབྱངས་ཆོས་སྒྲོན་ལགས་ཀྱིས། བོད་དོན་དང་འབྲེལ་བའི་འཕེལ་རྒྱས་ཀྱི་གནས་ཚུལ་གསར་པ་འདིའི་ཐད་ཧ་ཅང་གི་དགའ་ཚོར་ཆེན་པོ་བྱུང་བ་དང་། བོད་དང་འབྲེལ་བའི་ལས་འགུལ་མང་ཙམ་ཡོང་རྒྱུར་རེ་བ་ཡོད་པ་གསུངས་འདུག

གསར་འགོད་པ་ཕྲེང་རིང་བསྟན་ནོར་དང་། འགན་འཛིན་གཞོན་པ་སྐལ་ལྡན་བློ་གྲོས།