ཐེ་ཝན་གྱིས་དྲག་རྒོལ་འགོག་ཆེད་དམག་སྦྱོང་བྱེད་བཞིན་འདུག

ཐེ་ཝན་གྱི་དམག་དཔུང་གིས་ཐེ་ཝན་མཚོ་གླིང་དུ་དྲག་པོའི་ཁ་གཏད་ལ་འགོག་ཐབས་ཆེད་དམག་དོན་སྦྱོང་བརྡར་བྱེད་བཞིན་ཡོད་འདུག
དེ་ཡང་ཕྱི་ཚེས་༡༧་ནས་འགོ་ཚུགས་ཏེ་ཉིན་གྲངས་གཉིས་རིང་ཐེ་ཝན་དམག་དཔུང་གིས་ལྕགས་གྲབ་འཁོར་ལོ་དང་། མེ་སྒྱོགས་ཐད་འཕུར་གནམ་གྲུ་སོགས་བེད་སྤྱད་ནས་ཐེ་ཝན་གྱི་དབུས་ས་གནས་ཁུལ་དུ་ལོ་འཁོར་གྱི་དམག་དོན་སྦྱོང་བརྡར་བྱེད་སྒོ་ཚུགས་ཡོད་འདུག
ཐེ་ཝན་གྱི་སྲིད་འཛིན་ལྕམ་ཚད་དབྱིང་འོན་གྱིས་སྲིད་འཛིན་ཐུགས་འགན་བཞེས་པའི་རྗེས་  རྒྱ་ནག་གཞུང་གིས་ལྕམ་ཚད་དབྱིང་འོན་གྱི་ཆབ་སྲིད་ཚོགས་པ་དམངས་གཙོ་ཡར་ཐོན་ཚོགས་པས་ཐེ་ཝན་རང་དབང་བྱ་རྒྱུར་ཤུགས་སྣོན་རྒྱབ་ཀྱི་ཡོད་ལུགས་ཀྱི་སྐྱོན་བརྗོད་བྱས་པ་མ་ཟད། ཐེ་ཝན་མཚོ་རྒྱུད་ཁུལ་དུ་མཚོ་དམག་གྲུ་གཟིངས་ཀྱིས་སྐོར་བསྐྱོད་བྱས་པ་སོགས་དྲག་པོའི་འཇིགས་སྐུལ་རིམ་པ་བྱས་པའི་ཁར་ཐེ་ཝན་རྒྱ་ནག་དང་གཅིག་སྒྲིལ་བྱ་དགོས་རྒྱུའི་འབོད་སྒྲ་ཡང་ཤུགས་ཆེ་རུ་གཏོང་བཞིན་ཡོད་པའི་འོག ཐེ་ཝན་དམངས་ཁྲོད་ཀྱི་དངངས་ཚབ་རྣམ་པ་ཞི་འཇམ་ཡོང་ཐབས་སུ་ཐེ་ཝན་གྱིས་རྒྱ་ནག་གི་དྲག་རྒོལ་ལ་འགོག་ཐབས་ཀྱི་ནུས་པ་ཡོད་པའི་རྣམ་འགྱུར་སྟོན་ཐབས་སུ་དམག་དོན་སྦྱོང་བརྡར་བྱེད་བཞིན་ཡོད་ཅིང་། ཐེ་ཝན་སྲུང་སྐྱོབ་ལས་ཁང་གི་མགྲིན་ཚབ་པ་གྲན་ཁྲུང་ཆིའི་ཡིས་དམག་དོན་གྱི་སྦྱོང་བརྡར་དེ་བཞིན་ཐེ་ཝན་མཚོ་གླིང་དང་དེ་བཞིན་བདག་དབང་ཐོག་རྕོད་གླེང་ཡོད་པའི་ལྷོ་རྒྱ་ནག་རྒྱ་མཚོའི་ཁུལ་དུ་ཛ་དྲག་གི་གནད་དོན་ལ་གདོང་ལེན་ཆེད་དམག་དོན་སྦྱོང་རྡར་བྱེད་བཞིན་པའི་སྐོར་གསུངས་འདུག
རྒྱ་ནག་གཞུང་གིས་ཐེ་ཝན་དེ་བཞིན་རྒྱ་ནག་དང་ཁ་བྲལ་ཐབས་མེད་པའི་རྒྱ་ནག་གི་ཞིང་ཆེན་ཞིག་ཡིན་ལུགས་ཤོད་བཞིན་ཡོད་པ་མ་ཟད། ཨ་རིའི་གསར་དུ་འདེམས་ཐོན་བྱུང་བའི་སྲིད་འཛིན་གྲོའོ་ནོལ་ཁྲོམ་མཆོག་དང་ཐེ་ཝན་གྱི་སྲིད་འཛིན་ལྕམ་ཚད་དབྱིང་འོན་རྣམ་གཉིས་ཞལ་པར་ཐོག་ནས་ལོ་རྒྱུས་རང་བཞིན་ལྡན་པའི་བཀའ་མོལ་གནང་བའི་རྗེས་རྒྱ་ནག་གཞུང་གིས་ཐེ་ཝན་ཐོག་གནོན་ཤུགས་དང་། ཉེ་བའི་ཆར་ཐེ་ཝན་མཚོ་རྒྱུད་ཉེ་འགྲམ་དུ་སྐམ་མཚོ་མཁའ་གསུམ་གྱི་དམག་དོན་སྦྱོར་བརྡར་བྱས་ནས་དྲག་པོའི་འཇིགས་སྐུལ་གྱི་གོམ་སྟབས་མཐོ་རུ་བཏོང་བཞིན་ཡོད་པ་རེད།
ཐེ་ཝན་དམག་དཔུང་གིས་ད་རེས་ཐེ་ཝན་གྱི་དབུས་ས་གནས་སུ་དམག་དོན་སྦྱོང་བརྡར་བྱས་པ་དང་ཕྱོགས་འཚུངས་ཐེ་ཝན་མཁའ་ཐོག་དམག་དཔུང་གིས་ཐེ་ཝན་གྱིས་ཨ་རི་ནས་ཉོ་གྲུབ་བྱས་པའི་F16་རྟགས་ཅན་གྱི་དམག་གི་གནམ་གྲུ་༡༤༣་ཀྱི་རིམ་པ་མཐོ་རུ་གཏོང་རྒྱུར་ཨ་རིའི་མཁའ་དབྱིངས་ལས་ཁང་དང་མཉམ་ལས་གནང་རྒྱུའི་ཐག་གཅོད་བྱུང་ཡོད་པ་ར་སྤྲོད་གནང་ཡོད་འདུག

གསར་འགོད་པ་འཆི་མེད།