བོད་མཐོ་སྒང་གི་དྲོ་ཚད་འཕར་བའི་རྐྱེན་གྱིས་ཁོར་ཡུག་གི་གནས་སྟངས་ལ་ཤུགས་རྐྱེན་ཆེན་པོ་ཐེབས་བཞིན་ཡོད་འདུག

ཨ་རིའི་ནང་རྟེན་གཞི་བྱས་པའི་(NPJ)་ཞེས་པའི་ཁེ་ལས་མ་ཡིན་པའི་གསར་འགོད་ལྷན་ཁང་གིས་ཞིབ་འཇུག་སྙན་ཐོ་ཞིག་བཏོན་ཡོད་པའི་ནང་། ༢༠༢༢་ལོའི་དབྱར་ཁའི་དྲོད་ཚད་འཕར་ནས་བོད་མདོ་དབུས་མཐོ་སྒང་གི་དཀྱིལ་དབུས་ཀྱི་ས་འོག་གི་འཁྱགས་རོམ་མྱུར་པོར་བཞུ་བཞིན་བའི་གནས་སྟངས་ཛ་དྲག་ཅན་དེས་ཁོར་ཡུག་ལ་ཤུགས་རྐྱེན་ཆེན་པོ་ཐེབས་བཞིན་ཡོད་པའི་སྐོར་ཞིབ་འཇུག་གྲུབ་དོན་ནང་གསལ་འདུག
ཁོང་ཚོས་བོད་ནང་དབྱར་དུས་སུ་དྲོད་ཚད་འཕར་བའི་སྐབས་ས་འོག་གི་འཁྱགས་རོམ་བཞུ་ཚད་ལ་བརྟག་དཔྱད་བྱས་པའི་སྐབས། ཕྱི་ལོ་༢༠༢༢ལོར་བང་རིམ་དྲུག་དང་རྟག་ཏུ་འཁྱགས་པའི་འཁྱགས་རོམ་ལ་བརྟག་དཔྱད་ཡུན་རིང་བྱས་ནས་གྲངས་ཐོ་བཀོལ་སྤྱོད་བྱས་པའི་མཇུག་འབྲས་སུ། ཕྱི་ལོ་༡༩༦༡ནས་༢༠༢༢བར་ས་ཁུལ་ཚང་མའི་ནང་(SAT)་ཞེས་པའི་དབྱར་ཁའི་མཁའ་དབུགས་དྲོད་ཚད་ཀྱི་འགྱུར་ལྡོག་དེ་ཆ་སྙོམས་ཀྱིས་དྲོད་ཚད་ཡར་འཕར་བཞིན་པ་ནི་མངོན་གསལ་དོད་པོ་ཡིན་པ་ཤེས་རྟོགས་བྱུང་འདུག
འདིའི་ཐད་རྒྱལ་སྤྱིའི་བོད་དོན་འབྲེལ་མཐུད་ཁང་གི་ཁོར་ཡུག་ཉམས་ཞིབ་པ་བློ་བཟང་དབྱངས་མཚོ་ལགས་ཀྱིས་ས་འོག་གཏན་འཇགས་འཁྱགས་རོམ་ཀྱིས་རླུང་ཛོར་པོ་རྣམས་ཉར་བསྡད་ཡོད་སྟབས་འཁྱགས་རོམ་དེ་ཚོ་བཞུ་བ་ཡིན་ན་མཁའ་རླུང་ལ་འབག་གཙོག་ཤོར་ནས་ཁོར་ཡུག་ལ་གནོད་སྐྱོན་ཆེན་པོ་བཟོ་བའི་ཉེན་ཁ་ཡོད་པ་དང་། ཡང་ཨེ་ཤེ་ཡའི་ཆུ་མཛོད་ཅེས་འབོད་པའི་བོད་མདོ་དབུས་མཐོ་སྒང་དུ་མཚེའུ་༡༠༠༠ལྷག་ཙམ་ཡོད་པ་དང་། བོད་ཀྱི་གཤམ་དུ་ཆགས་པའི་ཨེ་ཤེ་ཡའི་ཁུལ་གྱི་གལ་ཆེའི་གཙང་པོ་བཅུ་ཡི་ཆུ་མགོ་ཡང་བོད་ཡིན་སྟབས། དེས་ཆུ་བོ་དེ་དག་རྒྱུགས་སའི་གཤམ་འོག་རྒྱལ་ཁབ་ཁག་གི་མི་མང་ས་ཡ་ཉི་ཤུ་ལྷག་ཙམ་གྱི་ཆུའི་འབྱུང་ཁུངས་ལའང་བོད་ཀྱི་འཁྱགས་རོམ་བཞུ་བའི་རྐྱེན་གྱིས་གནོད་ཀྱི་རེད་ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།
ཨ་མི་རི་ཀའི་ནང་གི་(NPJ)་ཞེས་པའི་གསར་འགོད་ལྷན་ཁང་གིས་ཞིབ་འཇུག་གནང་སྐབས། ཕྱི་ལོ་༢༠༢༢ལོར་བོད་མདོ་དབུས་མཐོ་སྒང་གི་ས་ཁུལ་དེར་དབྱར་དུས་དྲོད་ཚད་འཕར་ཡོད་མེད་དང་། གལ་སྲིད་འཕར་ཡོད་ཚེ་ཞིབ་འཇུག་བྱ་ཡུལ་ས་ཁུལ་ཚང་མའི་ནང་ཁྱད་པར་ཆེ་ཆུང་གང་འདྲ་བཟོས་ཡོད་མེད། དྲོད་ཚད་ཀྱི་བྱུང་རིམ་ཀྱིས་སའི་གཏིང་འོག་ལ་ཡོད་པའི་འཁྱགས་རོམ་བཞུ་ཚད་ལ་ཁྱད་པར་གང་འདྲ་བཟོས་ཡོད་མེད་སོགས་ཀྱི་ཐོག་ཞིབ་འཇུག་གནང་བར་ ཕྱི་ལོ་༢༠༢༢ལོར་བརྟག་དཔྱད་བྱས་པ་ལོ་རེའི་ཆ་སྙོམས་ས་ཆའི་དྲོད་ཚད་ལོ་སྔོན་མའི་རྩིས་ནས་བརྒྱ་ཆ་བཅུ་བརྒལ་ཡོད་འདུག
རྒྱལ་སྤྱིའི་བོད་དོན་འབྲེལ་མཐུད་ཁང་གི་ཁོར་ཡུག་ཉམས་ཞིབ་པ་བློ་བཟང་དབྱངས་མཚོ་ལགས་ཀྱིས་བོད་ཀྱི་འཁྱགས་རོམ་མི་བཞུ་བའི་ཐབས་ལམ་ཡག་ཤོས་དེ་ནི་རྒྱ་ནག་གཞུང་གིས་བོད་ནང་ཆུ་མཛོད་གསར་རྒྱག་བྱ་རྒྱུ་དང་། གང་བྱུང་གཏེར་ཁ་སྔོག་འདོན་བྱ་རྒྱུ་སོགས་མཚམས་འཇོགས་བྱ་རྒྱུ་དེ་རེད་ཅེས་འགྲེལ་བརྗོད་གནང་བྱུང་།
དབྱིན་སྐད་དུ་(Permafrost)་ཞེས་པའི་འཛམ་གླིང་གི་བྱང་ཕྱོགས་ས་ཁུལ་སོགས་ཀྱི་ནང་རྒྱུན་དུ་འཁྱགས་པ་ཆགས་ནས་ཡོད་པའི་སའི་ཆགས་རིམ་ཀྱི་འཁྱགས་རོམ་མྱུར་པོའི་ངང་བཞུ་བ་ཡིན་ན། འགྱུར་ལྡོག་དེས་ཆུ་ཁམས་དང་སྐྱེ་ཁམས་ཁོར་ཡུག་ལ་ཤུགས་རྐྱེན་ཤུགས་ཆེན་ཐེབས་ཀྱི་ཡོད་འདུག ལྷག་པར་དུ་ད་ལྟའི་ཆར་དྲོད་ཚད་མཐོ་པོ་དང་དྲོད་རླབས་ཡང་ཡང་འཕྱུར་བ། ཤུགས་ཚད་རིམ་བཞིན་འཕར་བའི་འགྲོ་ཕྱོགས་ལ་གཞིགས་ན། གཏན་འཇགས་འཁྱགས་རོམ་བཞུ་བའི་རྐྱེན་གྱིས་ཁོར་ཡུག་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་པ་(NPJ)་ཞེས་པའི་ཞིབ་འཇུག་སྙན་ཐོའི་ནང་གསལ་འདུག

གསར་འགོད་པ། ཚེ་དབང་དངོས་གྲུབ།
རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།