སྦེལ་ཇམ་རྒྱལ་སྲས་མཆོག་ལ་བོད་དོན་གླེང་དགོས་པའི་རེ་འབོད།

༄༅༎སྦེལ་ཇམ་གྱི་རྒྱལ་སྲས་མཆོག་རྒྱ་ནག་ལ་འཚམས་འདྲིར་ཕེབས་པའི་སྐབས་བོད་དོན་གླེང་སློང་གནང་དགོས་པའི་འབོད་སྐུལ་ཞུས་ཡོད་འདུག
དེ་ཡང་བྷེལ་འཇམ་ནང་གི་བོད་ཀྱི་གྲོགས་པོ་ཚོགས་པའི་ཚོགས་མི་སྐུ་ཞབས་དྲེ་ནི་སི་ སྦར་སྦོན་དང་། ཨེལ་སེ་ཀི་སེ་སྦལ་གཉིས་ནས་སྦེལ་ཇམ་གྱི་རྒྱལ་སྲས་ཕི་ལིཔ་སི་མཆོག་ཁ་ས་ཚེས་ཉི་ཤུ་དྲུག་ཉིན་རྒྱ་ནག་ལ་ཚོང་དོན་ཆེད་ཕེབས་པའི་དུས་ཚོད་དང་སྟབས་བསྟུན་ནས་བོད་དོན་གླེང་སློང་ཡོང་བའི་འབོད་སྐུལ་གྱི་ཞུ་སྙན་ཞིག་ཕུལ་ཡོད་འདུག ཞུ་སྙན་དེའི་ནང་། དེ་སྔ་ཕྱི་ལོ་ ༡༩༥༠ ཐམ་པ་ནས་བཟུང་རྒྱ་ནག་གཞུང་ནས་བོད་ནང་སྡུག་སྦྱོང་ཇི་ལྟར་བཏང་མིན་དང་། དམིགས་བསལ་ད་ལྟའི་དུས་ཚོད་འདིར་ཡང་བོད་ནང་ཆོས་དང་། སྨྲ་བརྗོད་རང་དབང་མེད་པ། འགྲོ་བ་མིའི་ཐོབ་ཐང་མེད་པའི་ཁར་བོད་མི་ཚོའི་ཐོག་དྲག་གནོན་ཤུགས་ཆེ་བྱེད་བཞིན་ཡོད་པ་དང་། མཐའ་ན་བོད་པའི་སྐད་ཡིག་ཚུན་ཆད་ཀྱང་རྩ་མེད་བཟོ་ཐབས་ཀྱི་སྲིད་བྱུས་འཛིན་གྱི་ཡོད་པའི་སྐོར་བཀོད་ཡོད་པ་རེད། ལྷག་པར་དུ་ཉེ་བའི་དུས་ཚོད་ཐུང་ཐུང་ཞིག་ནང་། བོད་མི་བཅུ་ཙམ་ནས་རྒྱ་ནག་གཞུང་གི་བྱ་སྤྱོད་ལ་འ་ཆད་འུ་ཐུག་གི་གནས་སྟངས་འོག་རང་ལུས་མེར་བསྲེགས་བཏང་བའི་གནས་ཚུལ་ཡོང་གི་ཡོད་པ་སོགས་ཞུས་ཡོད་པ་རེད།།