གཏེར་སྔོག་ལ་ངོ་རྒོལ་གནང་མཁན་ཚེ་དབང་སྐྱབས་འདས་གྲོངས།

༄༅། །མདོ་སྨད་ཨ་མཆོག་གི་གོང་སྔོན་བླ་རིའི་ནང་གསེར་གྱི་གཏེར་ཁ་སྔོག་འདོན་གྱི་ལས་གཞིར་ངོ་རྒོལ་བྱེད་མཁན་གྱི་འགོ་ཁྲིད་གྲས་ཚེ་དབང་སྐྱབས་ལགས་འདས་གྲོངས་སུ་གྱུར་འདུག

འདི་ག་རླུང་འཕྲིན་ཁང་དུ་གནས་ཚུལ་མཁོ་སྤྲོད་བྱུང་བར་ལྟར་ན།  ཨ་མཆོག་ཚེ་དབང་སྐྱབས་ལགས་ཡུན་རིང་ནད་མནར་རྗེས་ ༢༠༡༧ ཕྱི་ཟླ་ ༤ ཚེས་ ༢༥ ཉིན་འདས་གྲོངས་སུ་གྱུར་འདུག་པ་དང་།  ཁོང་ནི་མདོ་སྨད་ཨ་མཆོག་ས་ཁུལ་གོང་སྔོན་བླ་རིར་རྒྱ་ནག་གཞུང་གིས་གཏེར་ཁ་སྔོག་འདོན་གྱི་ལས་གཞིར་ ༢༠༡༦ ལོའི་ཕྱི་ཟླ་ ༥ ཚེས་ ༣༡ ནས་ཕྱི་ཟླ་ ༦ ཚེས་ ༢ བར་ཨ་མཆོག་ཡུལ་ཚོའི་སྡེ་པ་འདྲ་མིན་གྱི་མི་དམངས་ནས་ངོ་རྒོལ་གྱི་ལས་འགུལ་སྤེལ་སྐབས། སྣེ་ཁྲིད་པ་གཙོ་བོའི་གྲས་ཤིག་ཡིན་པ་དང་།  ༢༠༡༦ ཕྱི་ཟླ་ ༦ ཚེས་ ༢ ཉིན་རྒྱ་མིའི་ཉེན་རྟོག་པ་དང་དམག་མི་འབོར་ཆེ་འབྱོར་ཏེ་ཁོང་དང་དེ་མིན་གྱི་མི་དྲུག་ལ་གཅར་རྡུང་ཚབས་ཆེ་བཏང་སྟེ་སྨན་ཁང་དུ་སྐྱེལ་དགོས་པའི་གནས་ཚུལ་བྱུང་ཡོད་པ་རེད།

ས་གནས་བོད་མི་ཚོས། གོང་སྔོན་བླ་རི་ནས་གཏེར་ཁ སྔོག་པ་ནི་ཁོར་ཡུག་གཏོར་སྐྱོན་དང་། ས་གནས་བོད་མིའི་ཡུལ་གོམས་ལ་གུས་བརྩི་མ་བྱས་བ་བརྗོད་ཡོད་པ་དང་།  ས་གནས་རྒྱ་ནག་གི་གཏེར་འདོན་ཚན་པས་ཨ་མཆོག་གོང་སྔོན་དུ་གཏེར་ཁ་སྔོག་འདོན་བྱས་ནས་མི་ལོ་བཅུ་ཙམ་འགྲོ་བཞིན་ཡོད་འདུག་པ་དང་། དེའི་རིང་ས་གནས་བོད་མི་ཆོས་གཏེར་སྔོག་མཚམས་འཇོག་གི་ཐད་ལན་མང་རེ་ཞུ་བྱས་ཀྱང་ཕན་ནུས་བྱུང་མེད་པ་རེད་འདུག

ཚེ་དབང་སྐྱབས་ལགས་ལ་སྔ་ལོ་རྒྱ་ནག་གཞུང་གིས་ཉེས་རྡུང་དྲག་པོ་བཏང་པའི་དོན་རྐྱེན་བྱུང་བ་ནས་བཟུང་ནད་གཞི་ཚབས་ཆེ་ཞིག་ཕོགས་ཏེ་སྨན་བཅོས་དང་རིམ་འགྲོ་སོགས་གང་ཡང་བྱས་ཀྱང་། དྲག་བསྐྱེད་གང་ཡང་མ་བྱུང་བར་ཉིན་ཤས་སྔོན་ཕྱི་ཟླ་ ༤ ཚེས་ ༢༥ ཉིན་འདས་གྲོངས་སུ་གྱུར་འདུག།

གསར་འགོད་པ་འགན་འཛིན་གཞོན་པ་སྐལ་ལྡན་བློ་གྲོས།