རྒྱ་ནག་གཞུང་གིས་བོད་ནང་གི་དགོན་སྡེ་ཁག་ཏུ་བཙན་ཐབས་ཀྱིས་གཞུང་གཉེར་སློབ་གྲྭར་གཏོང་བཞིན་པའི་གྲྭ་བཙུན་ཚོར་བཅར་རྡུང་མནར་གཅོད་རྐྱེན་གྱིས་སྡོད་ཐབས་མེད་པའི་གནས་སུ་ལྷུང་གི་ཡོད་པ། བོད་ནང་གི་བོད་མིས་འགྲེལ་བརྗོད་གནང་གི་འདུག

འདི་ལོའི་ཕྱི་ཟླ་ ༧ ནས་བཟུང་རྒྱ་ནག་གཞུང་གིས་བོད་ནང་གི་རྔ་བ་དང་ཁྱུང་མཆུ། མཛོད་དགེ་རྫོང། དེ་བཞིན་དམུ་དགེ་སོགས་ནས་དགོན་པ་ཁག་ཏུ་ཡོད་པའི་གྲྭ་བཙུན་ལོ་ཆུང་ཚོར། རྒྱ་ནག་གཞུང་གིས་གཏན་འབེབས་བྱས་པའི་འོས་འགན་སློབ་གསོ་མྱོང་དགོས་སྐོར་བརྗོད་ནས། རྔ་བ་ཀིརྟི་དགོན་དང་སྒོ་མང་དགོན། སྣང་ཞུགས་དགོན། དེ་བཞིན་མཛོད་དགེ་རྫོང་སྟག་ཚང་ལྷ་མོ་ཀིརྟི་དགོན། གྲོ་ཚང་དགོན། དམུ་དགེ་རྫོང་དམུ་དགེ་དགོན་སོགས་ནས་ལོ་ཆུང་གྲྭ་ཆུང་སྟོང་ཕྲག་མང་པོ་བཙན་ཐབས་ཀྱིས་རྒྱ་ནག་གཞུང་གཉེར་སློབ་གྲྭར་བཏང་སྟེ། སློབ་གྲྭ་ནས་རྒྱ་ནག་གི་ཆབ་སྲིད་སློབ་གསོ་སྤེལ་བ་དང་། བཅར་རྡུང་དང་མནར་གཅོད་བྱེད་པ། མ་ཟ་དང་སྡོད་གནས་ཡག་པོ་མི་སྤྲོད་པ་སོགས་བཙོན་ཁང་ལྟ་བུ་བྱས་ཏེ། རྔ་བ་ཕྱོགས་ཀྱི་ས་གནས་མང་དག་ཅིག་ཏུ་སློབ་གྲྭར་བཅུག་པའི་གྲྭ་ཆུང་མང་པོ་སློབ་གྲྭ་ནས་སྡོད་མ་ཐུབ་པར་ཁང་བརྩེགས་དང་གྱང་ཁ་སོགས་ནས་མཆོང་སྟེ་བྲོས་བྱོལ་དང་། མཐའ་ན་རང་གི་ཚེ་སྲོག་ལ་རྒོལ་ཐབས་ཀྱི་གནས་སུ་ལྷུང་གི་ཡོད་པ་བོད་ནང་གི་འབྲེལ་ཡོད་བོད་མི་བཞི་ནས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་གི་འདུག

གོང་ཞུས་འབྲེལ་ཡོད་ཅིག་ནས་མུ་མཐུད་བརྗོད་དོན་ལ། རྒྱ་ནག་གཞུང་གིས་གྲྭ་བ་ལོ་ཆུང་ཚོ་དང་ཐོག་སློབ་གྲྭར་སྐྱེལ་དགོས་པའི་བཀོད་ཁྱབ་གཏོང་སྐབས། རྔ་བ་ཕྱོགས་ནས་སྲིད་གཞུང་གི་ལས་བྱེད་མི་སྣ་ ༥ ལྷག་ནས་དུད་ཁྱིམ་རེ་རེ་བྱས་ཏེ་སྒོ་རྡུང་ནས་ཁྱེད་ཚང་གི་བུ་ཕྲུག་སློབ་གྲྭར་སྐྱེལ་དགོས་པ་དང་། ཟ་མ་དང་སྡོད་གནས་སོགས་རིན་མེད་ཡིན་སྐོར་དང་། བྱིས་པ་སློབ་གྲྭ་ནས་སྡོད་མི་འདོད་པ་བྱུང་ན་ཕ་མ་ཡོང་སྟེ་ཡང་ཡང་ཐུག་འཕྲད་དང་དགོངས་པ་ཞུས་ཏེ་ནང་དུ་ཁྲིད་ཆོག་སྐོར། ན་ཚ་བྱུང་ན་སྨན་རིན་སྤྲོད་སྐོར་དང་སློབ་གྲྭ་སོགས་ཚང་མ་ཁྱིམ་བདག་དང་བྱིས་པའི་འདོད་པ་བཞིན་འདེམས་གསེས་བྱས་ཏེ་ཕྱིན་ཆོག་སྐོར་མང་དག་ཅིག་བརྗོད་སོང་ན་ཡང་། ཕྱི་ཟླ་ ༩ ཚེས་མགོར་སློབ་སྐབས་མགོ་ཚུགས་པ་དང་འབྲེལ་དེ་སྔ་བཤད་པ་ཚང་མ་རྫུན་མ་ཡིན་པ་མ་ཟད། ཁྱིམ་བདག་དང་བུ་ཕྲུག་ལ་སློབ་གྲྭ་འདེམས་གསེས་ཕར་ཞོག་ར་ལུག་ནང་བཞིན་ཚང་མ་བཙན་ཐབས་ཀྱིས་ཁྲིད་སོང་བ་དང་། ད་ལྟའི་ཆར་སློབ་གྲྭའི་ནང་དུ་བཙོན་མ་བཞིན་ཉིན་འཁྱོལ་མཚན་འཁྱོལ་གྱི་གནས་སུ་ལྷུང་ནས་ཡོད་པས། ས་གནས་གཞི་རིམ་ལས་བྱེད་དང་འགོ་ཁྲིད་ཚོར་གནས་སྟངས་དེ་ཡར་ཞུ་ཞུས་ཀྱང་ཡ་ལན་གང་ཡང་སྤྲོད་ཀྱི་མེད་པ་སོགས་འགྲེལ་བརྗོད་གནང་གི་འདུག

རྒྱ་ནག་གཞུང་ངོས་ནས་དགོན་སྡེ་ཁག་ཏུ་ལོ་ན་མ་སོན་པའི་མི་སྣ་བཅུག་མི་ཆོག་སྐོར་བརྗོད་ནས། དགོན་པ་ཁག་གི་སློབ་གྲྭ་སོགས་སྒོ་བརྒྱབ་བཅུག་སྟེ་གཞུང་གཉེར་སློབ་གྲྭར་མི་འགྲོ་ཐབས་མེད་བྱེད་བཞིན་ཡོད་བཞིན། ཡང་འབྲེལ་ཡོད་བོད་མི་གཞན་ཞིག་ནས་རྒྱ་ནག་གཞུང་གིས་ཕྱི་ཟླ་ ༨ ནང་རྔ་བ་དང་མཛོད་དགེ་ཕྱོགས་ཀྱི་དགོན་སྡེ་ཁག་གི་བླ་ཆེན་སོགས་ལ་ཆེད་དུ་མི་མང་ལ་བྱིས་པ་སློབ་གྲྭར་གཏོང་དགོས་པའི་སྐུལ་མ་བྱེད་བཅུག་པ་དང་། ས་གནས་མགོ་ཁྲིད་ཚོ་ཡོང་སྟེ་ཁྱིམ་ཚང་རེ་རེ་བྱས་ནས་སློབ་གསོ་བརྒྱབ་སྟེ། གཞུང་གཉེར་སློབ་གྲྭར་སྐྱེལ་བ་ཡིན་ན་དཀའ་ངལ་གང་ཡང་མེད་པ་བཤད་སོང་ན་ཡང་། སློབ་གྲྭར་བསྡུས་རྗེས་ཕ་མ་ཚོ་དང་ཐུག་འཕྲད་བྱེད་མི་བཅུག་པ་དང་། གྲྭ་ཆུང་ཚོའི་སེམས་ཁམས་བསམ་བློར་འགྱུར་བ་གཏོང་དགོས་སྐོར་བརྗོད་ནས་བཙན་ཐབས་ཀྱིས་གཞུང་གི་ཆབ་སྲིད་སློབ་གསོ་སྤྲོད་པ་དང་། འགྲོ་འདུག་སོགས་མི་ཤེས་སྐོར་བརྗོད་ནས་བཅར་རྡུང་དང་མནར་གཅོད་ཤུགས་ཆེར་གཏོང་གི་ཡོད་ན་ཡང་། ཁྱིམ་བདག་ཕ་མ་ཚོར་ཡར་ཞུ་བྱེད་ས་གང་ཡང་མེད་པར་ཡ་ལན་སྤྲོད་མཁན་མེད་པ་དང་། ཁྱིམ་བདག་ཕ་མ་མང་དག་ཅིག་གཞུང་གི་བཀོད་ཁྱབ་དང་ཉེས་ཆད་ལ་སྐྲག་ནས་ཚང་མ་རྡོག་རྩ་གཅིག་སྒྲིལ་གྱིས་ཞུ་གཏུག་བྱེད་ཕོད་ཀྱི་མེད་སྐོར་སོགས་ངུ་ངག་དང་བཅས་འགྲེལ་བརྗོད་གནང་བྱུང་།

རྒྱ་ནག་གཞུང་གིས་འདི་ལོའི་ཕྱི་ཟླ་ ༨ ནང་རྔ་བ་ཀིརྟི་དགོན་དང་། མཛོད་དགེ་སྟག་ཚང་ལྷ་མོ་ཀིརྟི་དགོན་གཉིས་ནས་སློབ་ཕྲུག་ ༡༠༠༠ ལྷག་གཞུང་གཉེར་སློབ་གྲྭར་བཙན་ཐབས་ཀྱིས་བཏང་བཅུག་ཡོད་པ་རེད་ལ། མཛོད་དགེ་རྫོང་བཅའ་སྡོད་གྲྭར་བཏང་བའི་གྲྭ་ཆུང་ཚོར་སློབ་དེབ་ཚང་མ་རྒྱ་ཡིག་འགྲེམས་སྤེལ་དང་། རྒྱ་ནག་འགོ་ཁྲིད་ཞི་ཅིན་ཕིང་གི་བསམ་བློ་ཟེར་བ་སོགས་ཀྱི་སློབ་གསོ་སྤྲོད་བཞིན་ཡོད་པ་འགྲེལ་ཡོད་ནས་བརྗོད་བྱུང་ལ། དེ་བཞིན་ཕྱི་ཟླ་ ༩ པའི་མགོ་སྟོད་དུ་རྒྱ་ནག་གཞུང་གིས་དམུ་དགེ་དགོན་ནས་བཙན་ཤེད་ཀྱིས་གཞུང་གཉེར་སློབ་གྲྭར་བཏང་བའི་སློབ་ཕྲུག་ ༥ ནས་། སློབ་གྲྭའི་ནང་བཅར་རྡུང་མནར་གཅོད་རྐྱེན་གྱིས་སྡོད་མ་ཐུབ་པར་རང་གི་ཚེ་སྲོག་ལ་རྒོལ་ཐབས་བྱས་པའི་གནས་ཚུལ་བྱུང་ཡོད་པ་རེད་ལ། ཕྱི་ཟླ་ ༩ ཚེས་ ༩ ཉིན་བོད་མིའི་སྒྲིག་འཛུགས་ནས་རྒྱ་ནག་གཞུང་གིས་རྔ་བ་ཕྱོགས་སུ་གཏན་འཇགས་སློབ་གྲྭ་ཆེད་འཛུགས་ཀྱིས། དགོན་སྡེ་ཁག་གི་གྲྭ་བཙུན་ལོ་ཆུང་ཚོར་ཆེད་དམིགས་ཀྱིས་ཆབ་སྲིད་སློབ་གསོ་སྤྲོད་བཞིན་པ་དེས། བོད་ཀྱི་ཆོས་དང་རིག་གཞུང་། སྐད་ཡིག་དང་བོད་མིའི་ངོ་བོ་སོགས་རྩ་མེད་བཟོ་ཐབས་བྱེད་བཞིན་པར་བློ་འཚབ་ཡོད་ཅེས། བོད་མིའི་སྒྲིག་འཛུགས་ཀྱི་དྲ་རྒྱར་འགོད་སྤེལ་གནང་ཡོད་པ་རེད།

གསར་འགོད་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།