སྤྱི་འཐུས་སྐུ་ཚབ་ནས་སི་ཀོ་ཊ་ལན་ཌིའི་གྲོས་ཚོགས་ཀྱི་འགྲོ་ལུགས་ལ་རྒྱུས་ལོན་གནང་འདུག

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་ལགས་ཀྱིས་སྣེ་ཁྲིད་འོག སྤྱི་འཐུས་ཟླ་བ་ཚེ་རིང་ལགས་དང་། སྤྱི་འཐུས་བསོད་ནམས་ནོར་བུ་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཕྱི་ཟླ་༡༡ཚེས་༡༧ནས་ཚེས་༢༣ བར་དབྱིན་ཡུལ་ནང་གྲོས་ཚོགས་ཀྱི་འགྲོ་ལུགས་འགྲོ་སྟངས་རྒྱུས་ལོན་གཟིགས་ཞིབ་དང་།  གྲོས་ཚོགས་འཐུས་མིར་མཇལ་འཕྲད་གནང་བ་སོགས་ཀྱི་ལས་དོན་ལེགས་འགྲུབ་ཀྱིས་ཕྱི་ཚེས་༢༤ ཉིན་སི་ཀོ་ཊ་ལན་ཌི་ (Scotland) ནང་ཕེབས་འབྱོར་གྱིས་ཕྱི་ཚེས་༢༥ཉིན་གྱི་སྔ་དྲོར་སི་ཀོ་ཊ་ལན་ཌི་ཤེས་ཡོན་ལས་འཆར་དང་འབྲེལ་བའི་ལས་རིམ་འགོ་འཛུགས་ཀྱིས་ཐོག་མར་སྐུ་ཞབས་ཨ་ཡན་ གྷིལ་ (Ian Gill) ལགས་ཀྱིས་སྤྱི་འཐུས་སྐུ་ཚབ་ཚོགས་ཆུང་གི་ཚོགས་མི་རྣམས་ལ་སི་ཀོ་ཊ་ལན་ཌིའི་གྲོས་ཚོགས་སྐོར་ཞིབ་ཕྲ་ངོ་སྤྲོད་དང་། དེ་ནས་སི་ཀོ་ཊ་ལན་ཌིའི་ངལ་རྩོལ་སྲིད་དོན་ཚོགས་པ་ནས་ཡིན་པའི་གྲོས་ཚོགས་འཐུས་མི་དང་། བློན་ཆེན་ཟུར་པ་ལྕམ་སྐུ་ས་རཱ་ བྷོ་ཡག་ (Sarah Boyack) དང་ལྷན་མཇལ་འཕྲད་གནང་ཞིང་། སྐབས་དེར་ལྕམ་སྐུ་མཆོག་གིས་དབྱིན་ཡུལ་དང་། སི་ཀོ་ཊ་ལན་ཌི་གྲོས་ཚོགས་གཉིས་ཀྱི་འོས་བསྡུའི་ལས་རིམ་གྱི་ཁྱད་པར་དང་། སི་ཀོ་ཊ་ལན་ཌི་རང་སྐྱོང་གི་འགན་དབང་བརྒྱུད་སྤྲོད་ཀྱི་ལས་རིམ། སི་ཀོ་ཊ་ལན་ཌི་གྲོས་ཚོགས་གསར་འཛུགས་དང་འགན་དབང་ཆ་བགོས། རང་སྐྱོང་གི་ལས་དོན་དང་། དབུས་གཞུང་གི་གནང་དགོས་ཀྱི་ལས་དོན་ཁག་གི་དབྱེ་བ། སི་ཀོ་ཊ་ལན་ཌི་གྲོས་ཚོགས་ནང་སྲིད་བྱུས་གཏན་འབེབས་གནང་རྒྱུའི་བརྒྱུད་རིམ། རྒྱལ་ཁབ་སྤྱི་ཡོངས་ཀྱི་ཁྲིམས་བཟོའི་ལས་དོན་ཐོག་སི་ཀོ་ཊ་ལན་ཌི་གྲོས་ཚོགས་འཐུས་མིའི་འགན་འཁྲི་ཞུ་ཕྱོགས་སྐོར་ངོ་སྤྲོད་གནང་བ་དབྱིན་ཡུལ་སྐུ་ཚབ་དོན་གཅོད་ཚེ་རིང་གཡང་སྐྱིད་ལགས་ནས་འདི་ག་རླུང་འཕྲིན་ཁང་ལ་གསུང་བྱུང་།

དེ་བཞིན་བོད་མི་མང་སྤྱི་འཐུས་ཚོགས་གཙོ་མཆོག་གིས་སྣེ་ཁྲིད་པའི་སྤྱི་འཐུས་སྐུ་ཚབ་ཚོགས་ཆུང་གིས་སི་ཀོ་ཊ་ལན་ཌིའི་གྲོས་ཚོགས་ནང་གཟིགས་ཞིབ་ཀྱིས་སི་ཀོ་ཊ་ལན་ཌིའི་མང་གཙོའི་འགྲོ་ལུགས་སྤྱི་དང་། གྲོས་ཚོགས་ཀྱི་ལས་རིམ། སྲིད་དོན་དང་རིག་གཞུང་གྱི་རྒྱབ་ལྗོངས་ལོ་རྒྱུས་སོགས་ལ་རྒྱུས་ལོན་གནང་ཡོད་འདུག དེ་བཞིན་ཕྱི་ཚེས་༢༦ཉིན་སི་ཀོ་ཊ་ལན་ཌི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་རཱོ་སི་ གྷིར་ (Ross Greer)མཆོག་དང་ལྷན་མཇལ་འཕྲད་ཀྱིས་མུ་མཐུད་དུ་སི་ཀོ་ཊ་ལན་ཌི་གྲོས་ཚོགས་ཀྱི་མང་གཙོའི་འགྲོ་ལུགས་དང་། རྒྱལ་སྤྱིའི་གནད་དོན་ཐོག་སྲིད་དོན་ཚོགས་པ་སྣ་མང་ལས་གྲུབ་པའི་གྲོས་ཚོགས་འཐུས་མིའི་ཚོགས་པའི་འགན་འཁྲི་ཞུ་ཕྱོགས་སྐོར་སོགས་ཀྱི་ཐོག་གླེང་མོལ་བྱུང་བ་མ་ཟད་། སི་ཀོ་ཊ་ལན་ཌིའི་གྲོས་ཚོགས་ནང་ཚོགས་ཆུང་འཚོག་ནས་སྔོན་རྩིས་ལྟ་བུ་འཚོག་འདུ་དང་ཡུལ་དེའི་བཙོན་པའི་གནས་སྟངས་ཐད་ཛ་དྲག་གི་གྲོས་གཞི་ཞིག་ལ་གྲོས་མོལ་བྱེད་བཞིན་པར་ཟུར་ཉན་གྱི་གོ་སྐབས་སོགས་བྱུང་ཡོད་འདུག

དེ་བཞིན་སྤྱི་འཐུས་སྐུ་ཚབ་ཚོགས་ཆུང་ནས་ཕྱི་ཚེས་༢༧ཉིན་མཐའ་མར་ཡུལ་དེའི་གྲོས་ཚོགས་ཀྱི་ཉན་ཞིབ་ཞིག་ཏུ་ཚོགས་ཞུགས་གནང་བ་སོགས་ཡུལ་དེའི་སྲིད་དོན་ཚོགས་པ་སྣ་མང་ལས་གྲུབ་པའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་ལྷན་ཚོགས་འདུ་ཞིག་འཚོགས་ནས་གཙོ་བོ་ཚོགས་པའི་ངོ་བོ་དང་། ལས་དོན་གནང་ཕྱོགས། དཔལ་འབྱོར་སྙན་ཐོ་དང་ལས་བསྡོམས་ཐོག་བགྲོ་གླེང་གནང་བ་མ་ཟད་། སྐབས་དེར་བོད་མི་མང་སྤྱི་འཐུས་ཚོགས་གཙོ་མཆོག་གིས་བོད་ནང་གི་ཛ་དྲག་གནས་སྟངས་ཐོག་གསུང་སྐབས། གཙོ་བོ་རྒྱ་ནག་དམར་གཞུང་གིས་བོད་པའི་སློབ་ཕྲུག་རྣམས་རྒྱའི་གཏན་འཇགས་སློབ་གྲྭའི་ནང་བཙན་ཤེད་ཐོག་སློབ་འཇུག་བྱེད་བཅུག་ནས་བོད་ཀྱི་སྐད་ཡིག་དང་། རིག་གཞུང་། མི་རིགས་ཀྱི་ངོ་བོ་དང་བཅས་པ་ཉམས་དམས་རྩ་བརླག་ཏུ་གཏོང་རྒྱུའི་དམིགས་ཡུལ་བཟུང་བའི་ཐོག་བོད་རིགས་རྣམས་རྒྱ་རིགས་ནང་མཉམ་བསྲེས་གཏོང་བཞིན་ཡོད་པའི་སྐོར་དང་། བྱིས་པ་ཚུན་ཆད་ཀྱི་རིགས་རྫས་བསྡུ་ལེན། འགྲོ་བ་མིའི་ཐོབ་ཐང་བརྡལ་བཤིག ཆོས་དད་རང་དབང་ཐོག་དམ་དྲག་ཤུགས་ཆེ་བྱས་དང་བྱེད་བཞིན་པའི་གནས་སྟངས་སྐོར་གསལ་སྟོན་གནང་འདུག དེ་བཞིན་ཛ་དྲག་ཅན་གྱི་གནད་དོན་དེ་རྣམས་ལ་རྒྱལ་སྤྱིའི་ནང་མུ་མཐུད་ཞུ་སྐུལ་དང་། རྒྱལ་སྤྱིའི་ཐོག་ནས་ཀྱང་དེ་དག་ལ་གདོང་ལེན་གནང་དགོས་པ་ངོས་བཟུང་བའི་ཐོག སི་ཀོ་ཊ་ལན་ཌི་དང་རྒྱལ་སྤྱིའི་གྲོས་ཚོགས་གཞན་གྱི་ནང་གནད་དོན་དེ་དག་ཐོག་ཐུགས་སྣང་ཡོང་ཐབས་ཀྱི་ཐབས་ལམ་ཇི་ཡོད་ཐོག་ཚོགས་བཅར་བ་དང་ཕན་ཚུན་དབར་གྲོས་བསྡུར་ལྷུག་པོ་བྱུང་ཡོད་པ་རེད།

ཐེངས་འདིར་བོད་མི་མང་སྤྱི་འཐུས་ཚོགས་གཙོས་སྣེ་ཁྲིད་པའི་སྐུ་ཚབ་ཚོགས་ཆུང་གིས་ཕྱི་ཟླ་༡༡ཚེས་༡༧ནས་ཕྱི་ཚེས་༢༧བར་དབྱིན་ཡུལ་གྲོས་ཚོགས་དང་སི་ཀོ་ཊ་ལན་ཌིའི་གྲོས་ཚོགས་ནང་ཡུལ་དེ་གཉིས་ཀྱི་གྲོས་ཚོགས་ཀྱི་འགྲོ་ལུགས་འགྲོ་སྟངས་ལ་རྒྱུས་ལོན་སོགས་བརྒྱུད་བོད་མི་མང་སྤྱི་འཐུས་ལྷན་ཚོགས་དང་དམངས་གཙོ་གཅིག་མཚུངས་ཡིན་པའི་ཆ་ནས་ལེགས་ཆ་མི་ཉུང་བ་ལེན་རྒྱུ་བྱུང་བ་སོགས་འགྲེལ་བརྗོད་གནང་གི་འདུག།

གསར་འགོད་པ། ལྕགས་མོ་འཚོ།

རྩོམ་སྒྲིག་པ། དོན་གྲུབ་རྣམ་རྒྱལ།

དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།

དྲྭ་ཐོག་སྤེལ་མཁན། པ་སངས་དོན་ལྡན།