སྡེ་དགེ་རྫོང་ཁོངས་ཀྱི་གནས་སྟངས་ཐད་རྒྱ་གར་ལྷོ་ཕྱོགས་ཁུལ་གྱི་བོད་མི་ཚོས་གོམ་བགྲོད་དང་གདུང་སེམས་མཉམ་སྐྱེས་ཀྱི་ལས་འགུལ་སྤེལ་འདུག

སྡེ་དགེ་རྫོང་ཁོངས་ཀྱི་གནས་སྟངས་ཐད་རྒྱ་གར་ལྷོ་ཕྱོགས་ཁུལ་གྱི་བོད་མི་ཚོས་གོམ་བགྲོད་དང་གདུང་སེམས་མཉམ་སྐྱེས་ཀྱི་ལས་འགུལ་སྤེལ་སྐབས། ༠༢།༢༨།༢༠༢༤

ཁམས་སྡེ་དགེ་རྫོང་ཁོངས་ཀྱི་འབྲི་ཆུའི་རྒྱུད་དུ་རྒྱ་ནག་གཞུང་གིས་སྐམ་ཐོག་ཆུ་མཛོད་གློག་ཁང་གསར་རྒྱག་ཆེད་དེ་ཁུལ་གྱི་གྲོང་ཚོ་དང་དགོན་སྡེ་ཁག་ཅིག་གནས་སྤོར་བྱེད་དགོས་བའི་བཙན་བཀའ་བཀའ་བཏང་བ་དང་། གནས་སྤོར་བྱེད་འདོད་མེད་པ་དང་ལས་གཞི་དེ་ལ་ཞི་བའི་ངོ་རྒོལ་བྱེད་མཁན་བོད་མི་མང་པོ་ཞིག་རྒྱ་ནག་གི་ཉེན་རྟོག་པས་འཛིན་བཟུང་བྱས་བའི་གནས་ཚུལ་བྱུང་བཞིན་པར། རྒྱ་གར་ལྷོ་ཕྱོགས་ཁུལ་གྱི་བོད་མི་རྣམས་ཀྱིས་འདི་ཚེས་༢༨ཉིན་སྡེ་དགེ་ཕྱོགས་ཀྱི་ས་གནས་དེ་ཁུལ་གྱི་དགོན་གྲོང་གཉིས་ཀྱི་མི་མང་ཚོ་བཙན་ཤེད་གནས་སྤོར་མཚམས་འཇོག་ཡོང་སླད་སྨོན་ལམ་གསུངས་འདོན་གནང་བ་དང་། རྒྱ་ནག་གཞུང་ལ་ངོ་རྒོལ་གྱི་གོམ་བགྲོད་ལས་འགུལ་སྤེལ་གནང་སོང་།
ལས་འགུལ་དེ་རྒྱ་གར་ལྷོ་ཕྱོགས་སྦེ་ལ་ཀོ་པི་དབུ་མའི་ལམ་གྱི་བོད་ཀྱི་གཞོན་ནུ་དང་བེུད་ལྷན་ཚོགས་ཟུང་འབྲེལ་གྱིས་གོ་སྒྲིག་གནང་བ་ཞིག་ཡིན་པ་དང་། སྐབས་དེར་བོད་མི་ལྔ་བརྒྱ་ཙམ་ཞིག་མཉམ་ཞུགས་ཀྱིས་སྦེ་ལ་ཀོ་པི་བདེ་སྐྱིད་སླར་གསོའི་གཞིས་ཁུངས་ནས་སྦེ་ལ་ཀོ་པི་ལུགས་བསམ་གཞིས་ཁུངས་བར་ཞི་བའི་གོམ་བགྲོད་དང་རྒྱ་ནག་གཞུང་ལ་ངོ་རྒོལ་སྐད་འབོད་གནང་ཡོད་པ་རེད།
ལས་འགུལ་དབུ་འཛུགས་ཀྱི་མཛད་སྒོའི་ཐོག་སྦེ་ལ་ཀོ་པི་དབུ་མའི་ལམ་གྱི་བོད་ཀྱི་གཞོན་ནུ་ལྷན་ཚོགས་ཚོགས་གཙོ་བྱ་ཉལ་ཚེ་རིང་ལྷ་སྐྱབས་ལགས་ཀྱིས། བོད་ནང་གི་ད་ལྟའི་ཛ་དྲག་གནས་སྟངས་ངོ་སྤྲོད་དང་འབྲེལ་རྒྱ་གཞུང་གི་བྱེད་སྟངས་དེར་ངོ་རྒོལ་ཡོད་པ་དང་། བོད་ནང་གི་བོད་མིའི་དཀའ་སྡུག་ལ་གདུང་སེམས་མཉམ་སྐྱེས་ཞུ་ཆེད་ལས་འགུལ་འདི་སྤེལ་བ་ཞིག་ཡིན་པའི་འགྲེལ་བརྗོད་གནང་སོང་།
ལས་འགུལ་ནང་མཉམ་ཞུགས་གནང་མཁན་ཀརྨ་སྲིད་དར་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ། རྒྱ་ནག་གི་དབང་བསྒྱུར་འོག་ཡོད་པའི་བོད་ནང་གི་ཡ་ང་བའི་གནས་སྟངས་ལ་མ་བཟོད་པར་ད་རེས་ལས་འགུལ་འདིའི་ནང་མཉམ་ཞུགས་གནང་བ་འགྲེལ་བརྗོད་གནང་བྱུང་།

ཡང་བདེ་སྐྱིད་ལགས་ཀྱི་གསུངས་ན། དེང་སང་བརྡ་འཕྲིན་དུས་རབས་ཡིན་དུས་བོད་ནང་གི་དངོས་ཡོད་གནས་སྟངས་རྣམས་འཛམ་གླིང་མི་མང་ནས་ཤེས་རྟོགས་ཡོང་རྒྱུར་ང་ཚོས་ལས་འགུལ་སྤེལ་དགོས་རྒྱུ་གནད་འགག་ཆེན་པོ་ཡིན་པ་འགྲེལ་བརྗོད་གནང་བྱུང་།
གཞན་འདི་ཚེས་༢༨་ཉིན་ཁམས་སྡེ་དགེ་ཁུལ་གྱི་ཛ་དྲག་གནས་སྟངས་ལ་གདུང་སེམས་མཉམ་སྐྱེས་ཞུ་ཆེད་ཧོན་སུར་རབ་རྒྱས་གླིང་དབུ་མའི་ལམ་བོད་ཀྱི་གཞོན་ནུ་དང་བུད་མེད་ལྷན་ཚོགས་ཀྱི་གོ་སྒྲིག་འོག་ས་གནས་བོད་མི་ཚོས་སྨོན་ལམ་གསུང་འདོན་གནང་བ་དང་། ཚེས་༢༧་ཉིན་ཀོ་ལེ་གྷལ་དབུ་མའི་ལམ་གྱི་བོད་ཀྱི་གཞོན་ནུ་དང་བུད་མེད་ལྷན་ཚོགས་ཀྱི་གོ་སྒྲིག་འོག་གཞིས་ཁོངས་དེའི་ནང་བོད་མི་ཚོས་སྨོན་ལམ་གསུང་འདོན་དང་ཞི་བའི་གོམས་བགྲོད་ཀྱི་ལས་འགུལ་སྤེལ་གནང་འདུག

གོང་བརྗོད་སྡེ་དགེ་ཕྱོགས་ཀྱི་གནས་ཚུལ་ཐད་དབུས་བོད་མིའི་སྒྲིག་འཛུགས་ཀྱིས་རྒྱ་ནག་གཞུང་ལ་སྐྱོན་བརྗོད་གནང་འདུག་ལ། དེ་བཞིན་ཨ་རི་དང་ཁེ་ཎ་ཌའི་ཕྱི་སྲིད་ལས་ཁུངས། བོད་མིའི་འགྲོ་བ་མིའི་ཐོབ་ཐང་རྩོད་ལེན་པ། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གིས་རྒྱ་ནག་གི་བྱ་སྤྱོད་ལ་སྐྱོན་བརྗོད་དང་འབྲེལ། བོད་མི་དང་བོད་དོན་རྒྱབ་སྐྱོར་བ་ཚོས་ཨ་རི་དང་ཡོ་རོབ་སོགས་ནུབ་ཕྱོགས་ཡུལ་གྲུ་ཁག་ནང་གི་རྒྱ་ནག་གཞུང་ཚབ་མདུན་གཙོས་ས་གནས་གང་སར་རྒྱ་ནག་གཞུང་ལ་ངོ་རྒོལ་སྐད་འབོད་ཀྱི་ལས་འགུལ་སྤེལ་དང་སྤེལ་མུས་རེད་འདུག

གསར་འགོད་པ། པདྨ་དངོས་གྲུབ།
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།