བོད་ནང་མཐོ་རྒྱུགས་རྒྱ་ཡིག་གི་ལམ་ནས་སྤྲོད་དགོས་བར་བརྟེན་བོད་ཀྱི་སློབ་ཕྲུག་མང་པོར་དཀའ་ངལ་འཕྲད་བཞིན་འདུག

ཕྱི་ཟླ་༦ཚེས་༧ཉིན་ནས་བཟུང་ཕྱི་ཚེས་༩་བར་ཉིན་གྲངས་༣་རིང་རྒྱ་ནག་རྒྱལ་ཡོངས་སུ་ཕྱི་ལོ་༢༠༢༣ལོའི་རྒྱ་ནག་གི་མཐོ་རིམ་སློབ་གྲྭ་ཁག་ཏུ་འཛུལ་ཞུགས་ཀྱི་གཅིག་གྱུར་ཡིག་རྒྱུགས་ཞེས་པ་སྤྲོད་འགོ་ཚུགས་ཡོད་པ་དང་། བོད་ནང་གི་བོད་རང་སྐྱོང་ལྗོངས་ཟེར་བ་དང་ཞིང་ཆེན་བཞིའི་འོག་ཏུ་ཡོད་པའི་བོད་རིགས་སློབ་ཕྲུག་རྣམས་ཀྱང་སློབ་ཆེན་ཁག་ཏུ་འཛུལ་ཞུགས་ཆེད་ཡིག་རྒྱུགས་དེར་ཞུགས་ཡོད་པ་རེད། ཨེ་ཤེ་ཡ་རང་དབང་རླུང་འཕྲིན་ཁང་ལ་འབྲེལ་ཡོད་གནས་ཚུལ་མཁོ་སྤྲོད་པས་གསུངས་ན། མཚོ་སྔོན་དང་མགོ་ལོག གཞན་དཀར་མཛེས་ཕྱོགས་སུ་ཕྱི་ལོ་༢༠༢༢ལོ་ནས་བཟུང་རྒྱ་ཡིག་གཙོར་འཛིན་གྱི་སློབ་གསོ་ཐབས་ལམ་གཉིས་པ་ཞེས་པ་ལག་བསྟར་བྱས་ཏེ། འདི་ལོ་ནས་སློབ་གྲྭ་ཁག་ཏུ་མཐོ་རིམ་སློབ་གྲྭར་འཛུལ་ཞུགས་ཀྱི་ཡིག་རྒྱུགས་ཚང་མ་རྒྱ་ཡིག་ཏུ་བསྒྱུར་སྟབས། བོད་པའི་སློབ་ཕྲུག་རྒྱ་ཡིག་ནང་མཐོ་རྒྱུགས་གཏོང་མཁན་གྱི་གྲངས་ཚད་རང་བཞིན་གྱིས་མང་དུ་ཕྱིན་ཡོད་པ་འགྲེལ་བརྗོད་གནང་བྱུང་།
འདི་ལོར་མཐོ་རྒྱུགས་ཁྲོད་བོད་ཀྱི་ས་ཁུལ་ནས་རྒྱ་ཡིག་གི་ལམ་ནས་ཡིག་རྒྱུགས་གཏོང་མཁན་སློབ་མ་མང་ཤོས་ལྷ་ས་དང་དཀར་མཛེས། མཚོ་སྔོན་མགོ་ལོག་སོགས་ཡིན་འདུག འོན་ཀྱང་དཔེར་ན། མགོ་ལོག་ཁུལ་དུ་ཕྱི་ལོ་༢༠༢༢་ལོ་བར་སློབ་གྲྭ་ཁག་ཏུ་སློབ་ཚན་ཁག་བོད་ཡིག་ནང་འཁྲིད་སྦྱོང་བྱས་ཡོད་པ་དང་། ད་ལོ་ནས་བཟུང་མཐོ་རྒྱུགས་གཏོང་མཁན་སློབ་མ་ཚོའི་ཡིག་རྒྱུགས་རྒྱ་ཡིག་ནང་གཏོང་དགོས་པ་བཟོས་ཡོད་སྟབས། ལོ་མང་པོའི་རིང་སློབ་ཚན་བོད་ཡིག་གི་ལམ་ནས་སློབ་འཁྲིད་ཐོབ་མཁན་ཚོར་རྒྱ་ཡིག་གི་གནས་ཚད་ལོན་མེད་པར་བརྟེན། རྒྱ་རིགས་སློབ་མ་དང་མཉམ་པའི་སྐར་གྲངས་ལོན་མི་ཐུབ་ཀྱི་མེད་པའི་གནས་སྟངས་ཤིག་ཆགས་ཡོད་འདུག དེའི་རྐྱེན་གྱིས་བོད་ཕྲུག་སློབ་མ་ཚོའི་རྒྱུགས་འབྲས་ལ་གྱོད་གུད་དང་། མཐོ་རིམ་སློབ་ཆེན་ཡག་པོ་ཁག་ཏུ་ཚུད་མི་ཐུབ་པ་ཡོང་གི་ཡོད་པ་འགྲེལ་བརྗོད་གནང་གི་བྱུང་།
ཡང་གནས་ཚུལ་མཁོ་སྤྲོད་པ་གཞན་ཞིག་གིས། མཚོ་སྔོན་འབའ་རྫོང་དུ་འདི་ལོ་མཐོ་རྒྱུགས་ཁྲོད་ཞུགས་མཁན་བོད་རིགས་སློབ་མ་༦༠༠ལྷག་བྱུང་ཡོད་པ་ཁོང་ཚོས་རྩིས་རྫས་དངོས་གསུམ་སློབ་ཚན་ཚང་མ་རྒྱ་ཡིག་ནང་གཏོང་དགོས་ཆགས་ཡོད་པ་འགྲེལ་བརྗོད་གནང་བྱུང་།
ཨེ་ཤེ་ཡ་རང་དབང་རླུང་འཕྲིན་ཁང་ནས་ཤེས་རྟོགས་བྱུང་བར་གཞིགས་ན། དེ་སྔ་བོད་མི་འདུས་སྡོད་ས་ཁུལ་གྱི་སློབ་ཚོར་མཐོ་རྒྱུགས་ཁྲོད་གྲངས་ཉུང་མི་རིགས་ཀྱི་སྐར་གྲངས་ཞེས་ཡིག་རྒྱུགས་ཁྲོད་སྐར་མ་༥ཁ་སྣོན་བྱེད་སྲོལ་ཡོད་ཀྱང་། ཕྱི་ལོ་༢༠༢༢ལོ་ནས་བཟུང་ནས་བཟུང་སློབ་གསོ་འདྲ་མཉམ་ཡོང་དགོས་སྐོར་གྱི་སྲིད་བྱུས་འོག བོད་ནང་གི་ས་ཁུལ་མང་ཆེ་བ་ཞིག་ཏུ་ཁ་སྣོན་སྐར་གྲངས་དེ་མེད་པ་བཟོས་ཡོད་འདུག་ལ། ཡང་འབྲེལ་ཡོད་བོད་མི་གཞན་ཞིག་གིས་བོད་པའི་སློབ་མ་ཚོར་ཡང་རྒྱ་ཡིག་གི་ལམ་ནས་ཡིག་རྒྱུགས་གཏོང་དགོས་པ་བཟོས་བར་བརྟེན་ཁོང་ཚོར་སྐར་གྲངས་ཡག་པོ་མི་ལོན་པའི་ཉེན་ཁ་ཡོད་པར་མ་ཟད། སློབ་ཆེན་ཁག་ཏུ་ཚུད་རྒྱུགས་མ་འཕྲོད་པ་ཡིན་ན་ལས་ཀ་ཡང་རག་རྒྱུ་ཁག་པོ་ཆགས་རྒྱུའི་ཉེན་ཁ་ཡོད་པ་མ་ཟད་། དེང་སྐབས་བོད་ནང་དུ་དམའ་འབྲིང་སློབ་གྲྭ་དང་མཐོ་འབྲིང་སོགས་ནས་སློབ་སྦྱོང་མཚམས་འཇོག་མཁན་སློབ་མ་མང་དུ་འགྲོ་བཞིན་ཡོད་པ་ཡང་འགྲེལ་བརྗོད་གནང་བྱུང་།
རྒྱ་ནག་གཞུང་གི་རྩ་ཁྲིམས་དང་ས་གནས་མི་རིགས་རང་སྐྱོང་གི་བཅའ་ཁྲིམས་ནང་། མི་རིགས་ས་གནས་ཁག་ཏུ་སློབ་གསོ་མྱོང་བར་མི་རིགས་རང་གི་སྐད་ཡིག་ནང་སློབ་ཁྲིད་དགོས་པ་བཀོད་ཡོད་ཀྱང་། ཕྱི་ལོ་༢༠༢༡ལོ་ནས་བཟུང་རྒྱ་ནག་གཞུང་འབྲེལ་ངོས་ནས་སློབ་གསོ་འདྲ་མཉམ་ཞེས་པ་དང་། རྒྱ་བསྒྱུར་སློབ་གསོའི་སྲིད་བྱུས་ལག་བསྟར་བྱེད་བཞིན་ཡོད་པ་རེད་ལ། རྡ་རམ་ས་ལར་རྟེན་གཞི་བྱས་པའི་བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་ནས། རྒྱ་ནག་གཞུང་གིས་ཕྱི་ལོ་༢༠༢༡ལོ་ནས་བཟུང་གྲངས་ཉུང་མི་རིགས་ཀྱི་ས་ཁུལ་ཡར་རྒྱས་གཏོང་དགོས་པར་སློབ་གསོའི་ཐབས་ལམ་བསྒྱུར་དགོས་པར་བཤད་ནས། རྒྱ་ནག་གི་རྩ་ཁྲིམས་ནང་གསལ་བའི་མི་རིགས་ས་གནས་ཀྱི་སློབ་གསོའི་རང་དབང་སྐོར་ཡིག་ཐོག་གསལ་པ་དང་དོན་དངོས་ལག་ལེན་གཉིས་རྩ་བ་ནས་འགལ་ཡོད་པས། གནས་སྟངས་དེས་དེང་སྐབས་བོད་རིགས་སློབ་མ་མང་པོ་ཞིག་གིས་མཐོ་རིམ་སློབ་གསོ་མྱོང་མི་ཐུབ་པའི་གནས་སྟངས་འབྱུང་གི་ཡོད་པ་པ་འགྲེལ་བརྗོད་གནང་བྱུང་།
རྒྱ་ནག་ནང་མཐོ་རྒྱུགས་ནི་ལོ་ལྟར་སློབ་ཕྲུག་ཁྲི་ཚོ་མང་པོས་མཐོ་རིམ་སློབ་གྲྭ་ཁག་ཏུ་འཛུལ་ཞུགས་ཀྱི་ཡིག་རྒྱུགས་ཚད་མཐོ་ཤོས་ཤིག་ཆགས་ཀྱི་ཡོད་པ་རེད་ལ། བོད་ནང་ལ་མཚོན་ན་དེ་སྔ་རྒྱ་ནག་གི་མཐོ་རྒྱུགས་ཁྲོད་བོད་ཡིག་གི་ལམ་ནས་ཡིག་རྒྱུགས་སྤྲད་ནས་ཁུལ་དང་ཞིང་ཆེན་རིམ་པའི་ནང་ཡིག་རྒྱུགས་གྲུབ་འབྲས་ཨང་དང་པོ་ལེན་མྱོང་མཁན། བིས་མདོ་པཎ་ཆེན་རིན་པོ་ཆེའི་བོད་ཡིག་སློབ་འབྲིང་དང་། རྔ་བ་ཁུལ་མཛོད་དགེ་ཨ་ཁུ་ཉི་མའི་ཆེད་འཛུགས་གནང་བའི་སློབ་འབྲིང་སོགས་ཡོད་པ་དང་། ཕྱི་ལོ་༢༠༢༢ལོར་མཛོད་དགེ་བོད་ཡིག་སློབ་འབྲིང་གིས་མཐོ་རྒྱུགས་ཁྲོད་སློབ་ཚན་ཚང་མ་བོད་ཡིག་ནང་ཡིག་རྒྱུགས་བཏང་སྟེ། རྔ་བ་ཁུལ་ཡོངས་ནས་སྐར་གྲངས་མཐོ་ཤོས་བླངས་ཡོད་འདུག་ལ། སི་ཁྲོན་ཞིང་ཆེན་གྱི་རྩིས་དངོས་རྫས་གསུམ་གྱི་སྐར་གྲངས་མཐོ་ཤོས་སློབ་མ་ཚོ་སློབ་གྲྭ་དེ་ནས་ཐོན་ཡོད་འདུག
རྒྱ་ནག་གཞུང་འབྲེལ་སློབ་གསོ་ལས་ཁུངས་ཟེར་བའི་གྲངས་ཐོ་ལྟར་ན། འདི་ལོ་རྒྱ་ནག་རྒྱལ་ཡོངས་སུ་མཐོ་རྒྱུགས་ཁྲོད་ཞུགས་མཁན་སློབ་མ་ཁྲི་༡༢༩༡དང་། སྔར་ལོ་དང་བསྡུར་ན་སློབ་ཕྲུག་ཁྲི་༩༨འཕར་ཡོད་སྐོར་བཀོད་འདུག་ལ། འདི་ལོ་ལྟ་བུར་མཚོན་ན་རྒྱ་ནག་གཞུང་འབྲེལ་ངོས་ནས་མཐོ་རྒྱུགས་ཡིག་ཚད་དྲང་བདེན་ཡོང་ཆེད་བརྙན་མིག་དང་ཉེན་རྟོག་པ། དྲ་རྒྱ་ཤུགས་ཚད་མཐོ་ཤོས་སོགས་བཀོལ་ནས་རྒྱུགས་རའི་ནང་ལྟ་བཤེར་དང་། སློབ་མ་ཚོས་རྒྱུགས་རའི་ནང་ཡིག་རྒྱུགས་གཏོང་ཆོག་པའི་ལག་འཁྱེར་ལས་གཞན་པའི་ཅ་དངོས་གང་ཡང་འཁྱེར་མི་ཆོག་པ་སོགས་བརྗོད་འདུག རྒྱ་ནག་གཞུང་གིས་ཕྱི་ལོ་༢༠༢༢ལོར་ཡུལ་ཤུལ་སོགས་སུ་བརྡ་ལན་གང་ཡང་མེད་པར་རྒྱུགས་ཤོག་བཀྲམ་རྗེས་རྒྱ་ཡིག་ནང་ལན་འདེབས་དགོས་པར་སྐུལ་བས། ཡིག་ཚད་མ་འཕྲོད་པའི་སློབ་མ་མང་དག་ཅིག་བྱུང་ཡོད་པ་རེད།

གསར་འགོད་པ། སངས་རྒྱས་དཀོན་མཆོག
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།