བོད་ཀྱི་སྲིད་བྱུས་ཉམས་ཞིབ་ཁང་དང་རྒྱལ་ཡོངས་བདེ་འཇགས་རིག་གནས་ཁང་གཉིས་ཀྱིས་མཉམ་ལས་ཞིབ་འཇུག་བྱ་རྒྱུའི་གན་རྒྱ་བཞག་འདུག

དེ་ཡང་སྤྱི་ཟླ་༩བའི་ཚེས་༢ཉིན་བོད་མིའི་སྒྲིག་འཛུགས་ཀྱི་བོད་ཀྱི་སྲིད་ཇུས་ཉམས་ཞིབ་ཁང་དང་རྒྱ་གར་ལྷོ་ཕྱོགས་གྲོང་ཁྱེར་སྦིང་ལོར་གྱི་(MSRamaiah University of Applied Sciences)་ཞེས་པའི་གཙུག་ལག་སློབ་གཉེར་ཁང་གི་རྒྱལ་ཡོངས་བདེ་འཇགས་རིག་གནས་ཁང་(Centre for National Security Studies)་ཞེས་པ་གཉིས་བར་གན་རྒྱ་བཞག་སྟེ་ཕྱོགས་གཉིས་བར་རྒྱལ་ཡོངས་བདེ་འཇགས་དང་། བོད་དོན་དང་འབྲེལ་ཡོད་གནས་ཚུལ་ཐོག་མཉམ་འབྲེལ་སྒོ་ནས་ཞིབ་འཇུག་དང་གནས་ཚུལ་བརྗེ་ལེན་གནང་རྒྱུའི་ཐག་གཅོད་གནང་འདུག
ཨེ་ཤེ་ཡ་རང་དབང་རླུང་འཕྲིན་ཁང་གིས་དེའི་ཐད་བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་སུ་བཅར་འདྲི་ཞུས་སྐབས། ཁོང་གིས་སློབ་གྲྭ་དེའི་འགན་འཛིན་(Jayaram)་ལགས་ནི་བོད་དོན་ལ་ཐུགས་སྣང་ཡོད་པ་དང་བོད་དོན་ལ་རྒྱབ་སྐྱོར་གནང་མཁན་ཞིག་རེད་འདུག་ལ། དེ་སྔ་སྲིད་སྐྱོང་སྤེན་པ་ཚེ་རིང་ལགས་རྒྱ་གར་ལྷོ་ཕྱོགས་སུ་ཕེབས་སྐབས་སློབ་སྤྱི་དང་མཇལ་འཕྲད་ཀྱིས་དེའི་སྐོར་ལ་བཀའ་མོལ་བྱུང་ཡོད་པས། ད་ཐེངས་ཁོང་ཚོས་ཚུར་འབྲེལ་བ་གནང་བ་ལྟར་གན་རྒྱ་དེ་བཞག་ཐུབ་པ་བྱུང་ཡོད། དེའི་དམིགས་ཡུལ་གཙོ་བོ་ནི་བོད་མཐོ་སྒང་གི་འཐབ་ཇུས་ཀྱི་གལ་གནད་དང་ཁོར་ཡུག་གི་གནད་དོན། དེ་བཞིན་འཕགས་བོད་གཉིས་བར་ལོ་རྒྱུས་རང་བཞིན་ལྡན་པའི་རིག་གཞུང་གི་འབྲེལ་བ་སོགས་དང་འབྲེལ་བའི་གལ་ཆེའི་གནད་དོན་ཐོག་ཉམས་ཞིབ་གནང་སྐབས་མཉམ་ལས་གནང་རྒྱུ་དང་ཤེས་རིག་བརྗེ་ལེན། སྲིད་ཇུས་གོ་རྟོགས་ཡར་རྒྱས་གཏོང་རྒྱུ་སོགས་ཡིན་པ་གསུངས་བྱུང་།

མོས་མཐུན་གན་རྒྱ་འཇོག་པའི་མཛད་སྒོའི་ཐོག་རྒྱལ་ཡོངས་བདེ་འཇགས་རིག་གནས་ཁང་གི་ཉམས་ཞིབ་པ་བགྲེས་པ་(Bala Subramanian)་ལགས་དང་། བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་གཞོན་པ་བསྟན་པ་རྒྱལ་མཚན་ལགས་གཉིས་ཀྱིས་འཚམས་འདྲིའི་གསུང་བཤད་གནང་བའི་རྗེས་སུ་རྒྱལ་ཡོངས་བདེ་འཇགས་རིག་གནས་ཁང་གི་འགན་འཛིན་(JV Prasad)་ལགས་དང་བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་རྣམ་གཉིས་ཀྱིས་ངོ་སྤྲོད་གསུང་བཤད་དང་མཉམ། རྣམ་པ་གཉིས་ཀྱིས་ཉམས་ཞིབ་ཁང་གཉིས་ཀར་རྒྱལ་ཡོངས་བདེ་འཇགས་དང་། ཐབས་ཇུས་དང་འབྲེལ་བའི་གནད་དོན་གལ་ཆེན་ཐོག་སྲིད་ཇུས་གོ་རྟོགས་དང་ཉམས་ཞིབ་ཡར་རྒྱས་གཏོང་ཐུབ་པའི་ནུས་པ་ཡོད་སྐོར་སོགས་གསུངས་འདུག
སྐབས་དེར་གཏམ་བཤད་གནང་མཁན་ཚོས་མཉམ་ལས་ཀྱི་འབྲེལ་བ་འདིས་བོད་དོན་དང་འབྲེལ་བའི་མཁས་པའི་བརྩམས་ཆོས་དང་སྲིད་ཇུས་སློབ་སྦྱོང་ཡར་རྒྱས་གཏོང་བར་གལ་གནད་ཆེན་པོ་ཆགས་ཡོད་སྐོར་ནན་བརྗོད་དང་། མཉམ་ལས་ཀྱི་འབྲེལ་ལམ་འདིས་མ་འོངས་པར་སྲིད་ཇུས་ཉམས་ཞིབ་ཁང་དང་སློབ་གཉེར་ཁང་དེ་གཉིས་ཀྱིས་བསམ་ཚུལ་དང་ཉམས་ཞིབ་གནང་བ་ཁག་བརྗེ་ལེན་ལ་ཕན་ཐོགས་ཆེན་པོ་ཡོང་བའི་རེ་བ་ཡོད་པ་སོགས་གསུངས་འདུག
གནས་ཚུལ་ནང་གསལ་ལྟར་ན། གོང་ཞུས་ཉམས་ཞིབ་ཁང་གཉིས་བར་གན་རྒྱར་མཚན་རྟགས་བཀོད་ཐུབ་པ་དེ་ནི་སྲིད་སྐྱོང་སྤེན་པ་ཚེ་རིང་ལགས་འདི་ལོ་༢༠༢༤་ལོའི་ཕྱི་ཟླ་༢་ཚེས་༨་ཉིན་ར་མ་ཡ་གཙུག་ལག་སློབ་གཉེར་ཁང་དུ་གཟིགས་སྐོར་གནང་སྐབས་སློབ་གཉེར་ཁང་གི་རིགས་བདག་སློབ་དཔོན་(Jayaram)་ལགས་དང་རྒྱལ་ཡོངས་བདེ་འཇགས་རིག་གནས་ཁང་གི་ཚོགས་མི་རྣམས་མཇལ་འཕྲད་གནང་བ་བརྒྱུད་བཀའ་མོལ་བྱུང་བའི་འབྲས་བུ་ཞིག་ཡིན་འདུག

གསར་འགོད་པ། སེང་གེ་རི་བསོད་ནམས་ལྷ་མོ། པདྨ་དངོས་གྲུབ།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།