ཨ་མི་རི་ཀའི་སྲིད་འཛིན་འོས་མི་རྣམ་གཉིས་ཀྱི་བགྲོ་གླེང་སྐབས་གནད་དོན་འདྲ་མིན་ཐད་ནས་རྒྱ་ནག་གླེང་འདུག

འདིར་གནན་ན་དབྱིན་ཡིག་ནང་འདིའི་སྐོར་གྱི་གནས་ཚུལ་ཞིབ་ཕྲ་ཀློག་ཐུབ།

འདི་ཚེས་༡༠རེས་གཟའ་མིག་དམར་ཉིན་ཨ་མི་རི་ཀའི་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་(Donald Trump)་དང་། མང་གཙོ་ཚོགས་པའི་སྲིད་འཛིན་འོས་མི་ལྕམ་(Kamala Harris)་རྣམ་གཉིས་བར་སྲིད་འཛིན་འོས་བསྡུ་དང་འབྲེལ་བའི་བགྲོ་གླེང་ཐེངས་དང་པོ་གནང་སྐབས། གནད་དོན་འདྲ་མིན་ཐད་ནས་རྒྱ་ནག་གི་གནད་དོན་ཐོག་བགྲོ་གླེང་གནང་ཡོད་པ་རེད།
སྐབས་དེར་ཨ་མི་རི་ཀའི་སྲིད་འཛིན་སྐུ་གཞོན་ལྕམ་(Kamala Harris)་ལགས་ཀྱིས་དུས་རབས་ཉི་ཤུ་རྩ་གཅིག་པའི་འགྲན་བསྡུར་འདིའི་ནང་རྒྱ་ནག་ངེས་པར་དུ་ཕམ་ཉེས་གཏོང་དགོས་ཞེས་བརྗོད་པར། ཁོང་གི་ཁ་གཏད་སྲིད་འཛིན་འོས་མི་སྲིད་འཛིན་ཟུར་པ་སྐུ་ཞབས་(Donald Trump)་ལགས་ཀྱིས་ཁོང་ལ་རྒྱ་ནག་གིས་ཞེད་སྣང་བྱེད་ཀྱི་ཡོད་པ་དང་། ཁོང་ཨ་མི་རི་ཀའི་སྲིད་འཛིན་གྱི་ཕོ་བྲང་དཀར་པོའི་ནང་བསྐྱར་དུ་བསྐོས་པ་ཡིན་ན་རྒྱ་ནག་ལ་སྒོ་ཁྲལ་གྱི་ཐོག་ནས་ཨ་མི་རི་ཀར་ཨ་སྒོར་ཐེར་འབུམ་མང་པོ་སྤྲོད་དགོས་བཟོ་རྒྱུ་ཡིན་པའི་སྐོར་བརྗོད་ཡོད་པ་རེད།

སྲིད་འཛིན་འོས་མི་སྐུ་ཞབས་(Donald Trump)་ལགས་ཀྱིས་ཨ་མི་རི་ཀའི་ནང་བཅའ་དངོས་བཟོ་བསྐྲུན་སླར་གསོ་དང་ཕྱིའི་རྒྱལ་ཁབ་ཁག་ལ་ཚོང་འབྲེལ་ཐོག་བརྟེན་རྒྱུ་དེ་ཉུང་དུ་གཏོང་ཆེད་རྒྱ་ནག་ནས་ནང་འདྲེན་བྱས་པའི་དངོས་ཟོག་བརྒྱ་ཆ་དྲུག་བཅུ་ཐམ་པར་སྒོ་ཁྲལ་བརྒྱ་ཆ་བཅུ་ནས་བརྒྱ་ཆ་ཉི་ཤུ་བར་འགེལ་རྒྱུའི་འཆར་གཞི་ཡོད་པ་རེད་འདུག
སྲིད་འཛིན་འོས་མི་ལྕམ་(Kamala Harris)་ཡིས་སྲིད་འཛིན་(Joe Biden)་མཆོག་གི་སྲིད་བྱུས་གཞིར་བཟུང་རྒྱ་ནག་ནས་ནང་འདྲེན་བྱས་པའི་གློག་སྒུལ་མོ་ཀྲ་སོགས་ལ་སྒོ་ཁྲལ་བརྒྱ་ཆ་བརྒྱ་དང་ཉི་འོད་ཀྱི་ཡོ་ཆས་ལ་སྒོ་ཁྲལ་བརྒྱ་ཆ་ལྔ་བཅུ་བཀལ་ནས་དམིགས་ཀར་རྒྱ་ནག་ནས་ནང་འདྲེན་བྱས་པའི་བཅའ་དངོས་ཚང་མར་སྒོ་ཁྲལ་འགེལ་རྒྱུ་མིན་པ་དེས་ཨ་མི་རི་ཀའི་ནང་གི་བཅའ་དངོས་བཟོ་བསྐྲུན་ཐོག་འཕེལ་རྒྱས་ཡོང་རྒྱུ་ཙམ་དུ་མ་ཟད། རྒྱལ་ཁབ་ཀྱི་དཔལ་འབྱོར་ཐོག་གནོད་སྐྱོན་ཐེབས་རྒྱུ་མིན་པའི་སྐོར་འགྲེལ་བརྗོད་གནང་ཡོད་པ་རེད་འདུག

ཨ་མི་རི་ཀའི་རྒྱལ་ས་ཝ་ཤིན་ཀྲོན་ནང་རྟེན་གཞི་བྱས་བའི་རྒྱལ་སྤྱིའི་བོད་དོན་ལས་འགུལ་ཁང་གིས་ཨ་མི་རི་ཀའི་རྒྱལ་ཡོངས་སྲིད་འཛིན་གྱི་འོས་བསྡུ་སླེབས་ལ་ཉེ་བའི་སྐབས་འདིར་འདི་ཚེས་༡༠ཉིན་ཨ་མི་རི་ཀའི་སྲིད་དོན་ཚོགས་པ་གཉིས་ཀ་དབྱེར་མེད་ཐོག་ནས་བོད་དོན་ཐད་རྒྱབ་སྐྱོར་གནང་བཞིན་ཡོད་པ་དང་། ཆབ་སྲིད་ཚོགས་པ་གཉིས་ཀའི་བོད་དོན་རྒྱབ་སྐྱོར་ལ་འགྱུར་བ་འགྲོ་རྒྱུ་མིན་པ་བསྒྲགས་འདུག
རེས་གཟའ་མིག་དམར་ཉིན་གྱི་ཨ་མི་རི་ཀའི་སྲིད་འཛིན་འོས་མི་རྣམ་གཉིས་ཀྱི་བགྲོ་གླེང་ཐེངས་དང་པོ་དེ་ཨ་མི་རི་ཀའི་བྱང་ཤར་ཕྱོགས་ཀྱི་གྲོང་ཁྱེར་(Philadelphia)་ནང་གནང་བ་དེ་དུས་ཡུན་ཆུ་ཚོད་གཅིག་དང་ཕྱེད་ཀ་དང་བགྲོ་གླེང་སྐབས་ཕྱི་སྲིད་ཀྱི་གནད་དོན་དང་། ལྷག་པར་དུ་དཀྱིལ་ཤར་ཨེ་ཤེ་ཡ་དང་ཡུཀ་རེན་ནང་གི་དམག་འཁྲུག རྒྱ་ནག་དང་ཨ་མི་རི་ཀའི་དྲག་པོའི་དཔུང་དམག ཨ་ཧྥི་གྷ་ནིས་སི་ཐན་ནས་ཕྱིར་འཐེན་བྱས་པ་སོགས་ཀྱི་གནད་དོན་འདྲ་མིན་ཐད་གླེང་སློང་གནང་ཡོད་པ་རེད།
བགྲོ་གླེང་ལས་རིམ་དེ་ཨ་མི་རི་ཀའི་(ABC News)་གསར་འགྱུར་བརྙན་འཕྲིན་ཁང་གིས་གོ་སྒྲིག་མདོ་འཛིན་གནང་ཡོད་པ་རེད།

གསར་འགོད་པ། ལྷུན་གྲུབ་ཚེ་རིང་། སེང་གེ་རི་བསོད་ནམས་ལྷ་མོ།
རྩོམ་སྒྲིག་པ། དོན་གྲུབ་རྣམ་རྒྱལ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།