མར་ཀོ་ རུ་བྷི་ཡོ་ ཨ་རིའི་ཕྱི་སྲིད་དྲུང་ཆེར་བསྐོ་གཞག་གནང་སྲིད་པ།

ཨ་རིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན་།  བསྐྱར་དུ་སྲིད་འཛིན་དུ་འོས་འདེམས་བྱུང་བ་སྐུ་ཞབས་ཌོ་ནལཌི་ ཊམཔ་(Donald Trump) མཆོག་གིས་སྲིད་འཛིན་ཐུགས་འགན་བཞེས་རྗེས་ཨ་རིའི་ཕྱི་སྲིད་དྲུང་ཆེར་གྲོས་ཚོགས་གོང་མའི་འཐུས་མི་སྐུ་ཞབས་ མར་ཀོ་རུ་བྷི་ཡོ་ (Macro Rubio) མཆོག་ཨ་རིའི་ཕྱི་སྲིད་དྲུང་ཆེར་འདེམས་བསྐོ་གནང་སྲིད་པའི་སྐོར་ཚོད་དཔག་གི་གནས་ཚུལ་མང་པོ་ཞིག་སྤེལ་བཞིན་ཡོད་པ་རེད།

ད་ལོ་དགུང་གྲངས་༥༣ལ་ཕེབས་པའི་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ མར་ཀོ་རུ་བྷི་ཡོ་ (Macro Rubio) མཆོག་ནི་ཨ་རིས་རྒྱ་ནག་ལ་དྲག་ཤུགས་ཆེ་རུ་གཏོང་དགོས་པའི་སྐོར་ལ་གསལ་པོའི་ཐོག་ནས་གསུང་མཁན་གྱི་གྲོས་ཚོགས་གོང་མའི་འཐུས་མིའི་གྲས་ཤིག་ཡིན་པ་དང་། ཁོང་གིས་ཊམཔ་གྱིས་སྲིད་གཞུང་ཐོག་མའི་སྐབས་གྲོས་ཚོགས་ནང་ཞབས་ཞུ་སྒྲུབ་སྐབས་ཨ་རིས་རྒྱ་ནག་གཞུང་གིས་བཀོད་སྒྲིག་བྱེད་པའི་དཔལ་འབྱོར་ལ་འགྲན་རྩོད་ཆེད་རོགས་རམ་བྱེད་པའི་བཟོ་ལས་སྲིད་ཇུས་ལ་སྐུལ་འདེད་གཏོང་འགོ་ཚུགས་པ་དང་།  དེ་བཞིན མར་ཀོ་རུ་བྷི་ཡོ་ (Macro Rubio) ཡིས་གྲོས་ཚོགས་ནང་ཆབ་སྲིད་ཚོགས་པ་གཉིས་ཕྱོགས་ལས་གྲུབ་པའི་རྒྱ་ནག་སྐོར་གྱི་འཛིན་སྐྱོང་ལྷན་ཁང་གི་ཚོགས་གཙོ་མཉམ་འབྲེལ་གྱི་འགན་འཁུར་གནང་གི་ཡོད་པ་དང་། ཕྱི་ལོ་ ༢༠༢༠ ལོར་སྐུ་ཞབས་རུ་བྷི་ཡོ་ཡིས་རྒྱ་ནག་གི་ཡུ་གུར་གྲངས་ཉུང་མི་རིགས་ཚོར་བཙན་ཤེད་ཀྱི་ངལ་རྩོལ་སྐུལ་ནས་བཟོས་པའི་རྒྱ་ནག་གི་དངོས་ཟོག་ཨ་རིའི་ནང་ནང་འདྲེན་བྱེད་པར་བཀག་འགོག་བྱེད་པའི་ཁྲིམས་འཆར་ལ་རྒྱབ་སྐྱོར་གནང་ཡོད་པ་དང་། སྲིད་འཛིན་ བྷཡ་ཌན་ ཡིས་ལོ་རྗེས་མར་ཁྲིམས་སུ་མིང་རྟགས་བཀོད་ཡོད་པ་མ་ཟད་ འདི་ལོ་སྲིད་འཛིན་མཆོག་གིས་ཁྲིམས་སུ་གཏན་འབེབས་གནང་པའི་བོད་རྒྱའི་དཀའ་རྙོག་སེལ་བར་སྐུལ་འདེད་གཏོང་བའི་ཁྲིམས་འཆར་ལ་ གྲོས་ཚོགས་གོང་མའི་ནང་རྒྱབ་སྐྱོར་གནང་མཁན་གྱི་མི་སྣ་གཙོ་གྲས་ཞིག་ཡིན་འདུག་ལ་  ལྷག་པར་དུ་ཁོང་ནི་བོད་དང་ཤིན་ཅང་རྒྱ་ནག་ནང་གི་འགྲོ་བ་མིའི་ཐོབ་ཐང་གནས་སྟངས་ཐད་དོ་སྣང་ཆེན་པོ་གནང་མཁན་ཞིག་ཡིན་ཞིང་།  གྲོས་ཚོགས་ནང་ཧོང་ཀོང་གི་འགྲོ་བ་མིའི་ཐོབ་ཐང་དང་དམངས་གཙོའི་ཁྲིམས་འཆར་ཞེས་པ་བཏོན་གནང་མཁན་གྱི་གྲོས་ཚོགས་འཐུས་མིའི་གྲས་ཤིག་ཀྱང་ཡིན་པ་རེད། སྐུ་ཞབས་མར་ཀོ་རུ་བྷི་ཡོ་མཆོག་གིས་རྒྱ་ནག་གཞུང་གི་ཧོང་ཀོང་ནང་ཆབ་སྲིད་ཀྱི་དམ་དྲག་དང་དྲག་གནོན་གྱི་བྱ་སྤྱོད་ལ་སྐྱོན་བརྗོད་ཤུགས་ཆེ་གནང་པའི་ཉེར་ལེན་དུ་ ༢༠༢༠ ལོར་རྒྱ་ནག་གཞུང་གིས་ཁོང་དང་གཞན་ཨ་རིའི་གྲོས་ཚོགས་ཀྱི་འཐུས་མི་དང་འགྲོ་བ་མིའི་དོན་གཉེར་བ་སོགས་ཁྱོན་མི་སྣ་༡༡ལ་དམ་བསྒྲགས་བཀའ་ཆད་གསལ་བསྒྲགས་ཡང་བྱས་ཡོད་པ་རེད།

ཡང་རོཡ་ཊར་གསར་འགྱུར་བརྒྱུད་ལམ་གྱིས་གནས་ཚུལ་སྤེལ་བ་ལྟར་ན།  ཨ་རིའི་སྲིད་འཛིན་དུ་བསྐྱར་དུ་འོས་འདེམས་བྱུང་བ་སྐུ་ཞབས་ཌོ་ནལཌི་ ཊམཔ་ མཆོག་གིས་གྲོས་ཚོགས་འོག་མའི་འཐུས་མི་སྐུ་ཞབས་ མཡ་ཀི་ ཝལ་ཛི་ (Mike Waltz) མཆོག་ཨ་རིའི་རྒྱལ་སྲུང་སློབ་སྟོན་པར་བསྐོ་བཞག་གནང་ཡོད་པའི་སྐོར་འབྲེལ་ཡོད་རྒྱུད་ལམ་ཁག་གིས་གནས་ཚུལ་སྤེལ་འདུག་   སྐུ་ཞབས་ མཡ་ཀི་ ཝལ་ཛི་ (Mike Waltz) ནི་འོས་འདེམས་བྱུང་བའི་སྲིད་འཛིན་ ཌོ་ནལཌི་ ཊམཔ་ ལ་ཤུགས་ཆེའི་རྒྱབ་སྐྱོར་གནང་མཁན་ཞིག་ཡིན་པ་མ་ཟད།  ཨ་རིའི་རྐང་དམག་གི་དམིགས་བསལ་དམག་དཔུང་ Green Beret ཟེར་བའི་ནང་དམག་དཔོན་གནང་མྱོང་ཡོད་པའི་ཁར།  རྒྱ་ནག་གཞུང་གིས་ཨེ་ཤེ་ཡ་དང་ཞི་བདེ་རྒྱ་མཚོའི་ཁུལ་དུ་སྤེལ་བཞིན་པའི་བྱ་སྤྱོད་ཁག་ལ་སྐྱོན་བརྗོད་ཤུགས་ཆེ་གནང་མཁན་ཞིག་ཀྱང་ཡིན་ཞིང་།   ཁོང་གིས་ཨེ་ཤེ་ཡ་དང་ཞི་བདེ་རྒྱ་མཚོའི་མངའ་ཁུལ་དུ་གདོང་ཐུགས་ཡོང་སྲིད་པའི་གནས་སྟངས་ལ་གདོང་ལེན་གྱི་གྲ་སྒྲིག་བྱ་དགོས་པའི་བསམ་ཚུལ་འཛིན་གནང་གི་ཡོད་པ་རེད།   ཨ་རིའི་རྒྱལ་སྲུང་སློབ་སྟོན་པའི་ལས་གནས་དེར་དངོས་ཡོད་ཀྱི་དབང་ཚད་ཆེན་པོ་ཡོད་པ་དང་།  སྐུ་ཞབས་ མཡ་ཀི་ ཝལ་ཛི་ (Mike Waltz) ཡིས་སྲིད་འཛིན་ཊམཔ་ལ་རྒྱལ་ཁབ་བདེ་འཇགས་ཀྱི་གལ་ཆེའི་གནས་ཚུལ་ཁག་ཐད་ཀར་སྙན་སེང་ཞུ་རྒྱུ་དང་འབྲེལ། འབྲེལ་ཡོད་ལས་ཁང་ཁག་དང་ཕན་ཚུན་འབྲེལ་འཐུད་བྱ་རྒྱུའི་ལས་འགན་བཞེས་རྒྱུ་ཡིན་པ་རེད།   ཁོང་གིས་ཕྱི་ལོ་༢༠༢༡ལོར་ཨ་རིའི་སྲིད་འཛིན་བྷཡ་ཌན་ གྱིས་ཨཕ་གྷ་ཎེ་སི་ཐཱན་ནས་དམག་དཔུང་ཕྱིར་ཐེན་བྱས་པའི་ཐག་གཅོད་ལ་སྐྱོན་བརྗོད་གནང་ཏེ།  འོས་འདེམས་བྱུང་བའི་སྲིད་འཛིན་ཊམཔ་ གྱི་ཕྱི་འབྲེལ་སྲིད་བྱུས་ཀྱི་ལྟ་སྤྱོད་ལ་རྒྱབ་སྐྱོར་ཤུགས་ཆེ་གནང་ཡོད་པ་རེད།  སྐུ་ཞབས མཡ་ཀི་ ཝལ་ཛི་ (Mike Waltz) ཡིས་དེ་སྔོན་ཨ་རིའི་རྒྱལ་སྲུང་དྲུང་ཆེའི་རྒྱལ་ཁབ་སྲིད་བྱུས་འགན་འཛིན་གྱི་ཕྱག་ལས་གནང་མྱོང་ཡོད་པ་མ་ཟད།  ཕྱི་ལོ་༢༠༡༨ལོར་ཨ་རིའི་གྲོས་ཚོགས་འཐུས་མིར་འོས་འདེམས་བྱུང་ཡོད་པ་དང་།  གྲོས་ཚོགས་འོག་མའི་དམག་དོན་ལྷན་ཁང་གི་ཚོགས་ཆུང་འགན་འཛིན་དང་།  སྤྱི་མཐུན་ཚོགས་པའི་རྒྱ་ནག་ལས་དོན་ལྷན་ཁང་གི་འཐུས་མིའི་གྲས་ཤིག་ཀྱང་ཡིན་པ་རེད།  ཁོང་གིས་ད་ལོ་ལོ་བསྟོད་ཙམ་དུ་རྒྱ་ནག་དང་ཐད་ཀར་དམག་འཐབ་ཡོང་རྒྱུར་སྔོན་འགོག་གི་འཐབ་བྱུས་ལྔ་ཟེར་བའི་དེབ་ཤིག་འགྲེམས་སྤེལ་གནང་ཡོད་པ་དང་།  དེའི་ནང་ཐེ་ཝན་ལ་དམག་དོན་གྱི་རོགས་རམ་བྱེད་ཤུགས་ཆེ་རུ་གཏོང་རྒྱུ་དང་།  ཞི་བདེ་རྒྱ་མཚོའི་མངའ་ཁུལ་གྱི་མཐུན་ཕྱོགས་ཡུལ་གྲུ་ཚོ་དང་འབྲེལ་ལམ་བཟང་དུ་གཏོང་རྒྱུ་དང་།  དམག་གི་གནམ་གྲུ་དང་དམག་གྲུའི་ཚད་གཞི་དེང་རབས་ཅན་དུ་བསྒྱུར་བཅོས་བྱ་རྒྱུ་སོགས་བཏོན་གནང་ཡོད་པ་རེད།   འོན་ཀྱང་ཟླ་བ་སྔོན་མའི་འདུ་འཛོམས་ལས་འགུལ་ཞིག་གི་ཐོག་སྐུ་ཞབས་ མཡ་ཀི་ ཝལ་ཛི་ (Mike Waltz) ཡིས་ཨ་རིས་ ཡུཀ་རཱེན་དམག་འཐབ་ཐོག་འཛིན་པའི་དམིགས་ཡུལ་དང་དེ་བཞིན་ཞི་བདེ་རྒྱ་མཚོའི་ཁུལ་གྱི་ཐོན་ཁུངས་དང་འགྲོ་གྲོན་གཏོང་ཕྱོགས་སོགས་ཀྱི་ཐད་ཨ་རིའི་ཁེ་ཕན་དང་མཐུན་གྱི་ཡོད་མེད་ཐད་བསམ་ཞིབ་བྱ་དགོས་པའི་བསམ་ཚུལ་བཏོན་ཡོད་པ་རེད།།

གསར་འགོད་པ། འཆི་མེད།

རྩོམ་སྒྲིག་པ། བསྟན་འཛིན་བདེ་སྐྱིད།

དྲྭ་ཐོག་རྩོམ་སྒྲིག་པ། བསྟན་འཛིན་པདྨ། དོན་གྲུབ་རྣམ་རྒྱལ།

དྲྭ་ཐོག་སྤེལ་མཁན། པ་སངས་དོན་ལྡན།