ཨ་རིའི་སྲིད་འཛིན་གྱི་རྒྱལ་ཁ་སུ་ལ་ཐོབ་ཀྱང་བོད་དོན་ཐད་རྒྱབ་སྐྱོར་ཤུགས་ཆེན་ཡོད་པ་དེར་འགྱུར་བ་འགྲོ་རྒྱུ་མིན་པ་གསུངས་འདུག

ཨ་རིའི་སྲིད་འཛིན་གྱི་འོས་བསྡུའི་གྲུབ་འབྲས་གཟིགས་རྒྱུར་འདིར་མནན།

ཕྱི་ལོ་༢༠༢༤ལོའི་ཨ་རིའི་སྲིད་འཛིན་གྱི་འོས་བསྡུ་ཆེན་མོའི་ཁྲོད་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་Donald Trump ལ་ཨ་མི་རི་ཀའི་རྒྱལ་ཡོངས་སྲིད་འཛིན་འོས་བསྡུ་ཆེན་མོའི་ཁྲོད་ཉུང་མཐར་ཨ་མི་རི་ཀའི་རྒྱལ་ཡོངས་ Electoral College ཞེས་པའི་སྲིད་འཛིན་འོས་བསྡུའི་ཆེད་ཀྱི་འོས་འཕེན་པའི་ཚོགས་ཆུང་གི་འོས་གྲངས་ ༢༧༠ ཐོབ་དགོས་པ་ལས་འོས་གྲངས་༢༧༧ ཐོབ་ནས་ཨ་མི་རི་ཀའི་སྲིད་འཛིན་ཐེངས ༤༧ པར་བདམས་ཐོན་བྱུང་བ་དང་། ཁོང་གི་འགྲན་ཟླ་དམངས་གཙོ་ཚོགས་པའི་སྲིད་འཛིན་འོས་མི་ལྩམ་ Kamala Harris ལ་འོས་གྲངས་ ༢༢༤ ལས་ཐོབ་མེད་པ་རེད།  ཨ་རིའི་མངའ་སྡེ་ཁ་ཤས་ནང་མུ་མཐུད་དུ་འོས་ཤོག་གྲངས་བཤེར་གནང་བཞིན་ཡོད་པ་རེད།

ཨ་མི་རི་ཀའི་སྲིད་འཛིན་ལ་བདམས་ཐོན་བྱུང་བའི་སྐུ་ཞབས་ Donald Trump ནི་ཨ་མི་རི་ཀའི་སྲིད་འཛིན་ཐེངས་༤༧ དེ་ཆགས་རྒྱུ་ཡིན་པ་དང་ཁོང་ནི་ཨ་མི་རི་ཀའི་ལོ་རྒྱུས་ནང་ཕྱི་ལོ་ ༡༨༩༢ ལོར་སྲིད་འཛིན་དམ་པ་ Grover Cleveland གི་རྗེས་ནས་སྲིད་འཛིན་ཞིག་ལ་འོས་ཤོག་ཐེངས་གཅིག་ཤོར་བའི་རྗེས་སུ་ཡང་བསྐྱར་འོས་ཤོག་ཐོབ་མཁན་ཨང་གཉིས་པ་དེ་ཆགས་ཡོད་པ་རེད།

དེ་བཞིན་སྐུ་ཞབས་ཌོ་ནོལ་ཊ་རམ་ནས་རེས་གཟའ་ལྷག་པའི་སྔ་ཤས་སུ་ཧྥུ་ལོ་རེ་ཌ་མངའ་སྡེའི་འདུ་འཛོམས་སྟེང་ཨ་རིའི་སྲིད་འཛིན་གྱི་འོས་འདེམས་ནང་རྒྱལ་ཁ་ཐོབ་པ་གསལ་བསྒྲགས་དང་ཁོང་གི་རྒྱབ་སྐྱོར་བ་ཚོར་བཀའ་དྲིན་ཞུ་བའི་གསུང་བཤད་གནང་དོན། འདི་ནི་སྔར་བྱུང་མྱོང་མེད་པའི་ལས་འགུལ་ཞིག་དང་ཁ་གསང་པོའི་ཐོག་ནས་བརྗོད་ན་ང་རང་ནས་འདི་ནི་ལོ་རྒྱུས་ཐོག་ཆེས་རླབས་ཆེ་བའི་ཆབ་སྲིད་ལས་འགུལ་ཞིག་ལ་ངོས་འཛིན་བྱེད་ཀྱི་ཡོད་ཅེས་གསུང་ནས། ཁོང་གིས་མཐའ་མཚམས་གནད་དོན་བསྐྱར་གསོ་སོགས་ཨ་རིས་ཐག་གཅོད་བྱེད་དགོས་པའི་གནད་དོན་ཐམས་ཅད་ཐག་གཅོད་བྱེད་རྒྱུ་དང་། ད་དུང་ཁོང་གིས་སྟོབས་ཆེན་དང་བདེ་འཇགས། དར་ཞིང་རྒྱས་པའི་ཨ་མེ་རི་ཀ་མངོན་འགྱུར་ཐད་འབད་བརྩོན་གནང་རྒྱུ་ཡིན་པ་སོགས་ནན་གསུང་གནང་ཡོད།

ཌོལ་ནོལ་ཊ་རམ་ཡིས་་ཕྱི་ལོ་༢༠༡༦ནས་ཕྱི་ལོ་༢༠༢༠ལོའི་བར་ཨ་རིའི་སྲིད་འཛིན་གནང་བའི་སྐབས་སུ་ཁོང་གིས་རྒྱ་ནག་ལ་ཚོང་འབྲེལ་ཐོག་བཀག་སྡོམ་དང་སྒོ་ཁྲལ་སྤར་བ་སོགས་མཁྲེགས་འཛིན་གྱི་སྲིད་ཇུས་དུ་མ་ལག་བསྟར་གནང་ཡོད་ནའང་། བོད་དོན་གཙོས་པའི་འགྲོ་བ་མིའི་ཐོབ་ཐང་གི་གནས་སྟངས་ཐད་གླེང་སློང་གནང་བ་ཉུང་ཉུང་ཡིན་པས་ཐེངས་འདིར་ཁོང་ཡང་བསྐྱར་སྲིད་འཛིན་ལ་བསྡད་པའི་དུས་སུ་གོང་ཞུས་གནས་སྟངས་དེ་དག་ཐད་འགྱུར་བ་འགྲོ་མིན་སོགས་ཀྱི་སྐོར་ལ་དྲིས་པར་བྱང་ཨ་རིའི་བོད་ཀྱི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ནས། ཨ་རིའི་གཞུང་འཛིན་ལ་ཚོགས་པ་ཆེ་ཤོས་གཉིས་ཀྱི་ནང་ནས་སུ་སླེབས་ཀྱང་བོད་དོན་ཐད་ཨ་རིའི་སྤྱི་མཐུན་ཚོགས་པ་དང་།  དམངས་གཙོ་ཚོགས་པ་ཐུན་མོང་གི་རྒྱབ་སྐྱོར་བརྟན་པོ་ཡོད་པ་གསུང་གི་འདུག གོང་ཞུས་བཞིན་བོད་ཀྱི་བདེན་པའི་འཐབ་རྩོད་ཐད་ཨ་རིའི་མི་དམངས་ནས་རྒྱབ་སྐྱོར་གྱི་རྩ་བ་ཚུགས་པ་བཞིན་ཨ་རིའི་གྲོས་ཚོགས་གོང་འོག་གཉིས་ཀྱི་ཚོགས་པ་དབྱེར་མེད་ཀྱིས་ཐུན་མོང་གི་རྒྱབ་སྐྱོར་ཤུགས་ཆེན་ཡོད་ཀྱང་། གྲོས་ཚོགས་འཐུས་མི་གསར་བར་འབྲེལ་མཐུད་དང་གཞུང་ཕྱོགས་ནས་མུ་མཐུད་དུ་རྒྱབ་སྐྱོར་ཐོབ་ཆེད། བོད་མིའི་སྒྲིག་འཛུགས་དང་གཞུང་འབྲེལ་མ་ཡིན་པའི་ཚོགས་པ་ཁག་ནས་ནུས་པ་མཉམ་སྤུངས་ཀྱིས་བོད་དོན་ཞུ་སྐུལ་གནང་རྒྱུ་སོགས་ཀྱི་ཐད་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ནས་མུ་མཐུད་དུ་གསུང་བྱུང་། དེ་མིན་ཨེ་པི་གསར་འགྱུར་ནང་ཌོ་ནོལ་ཊ་རམ་མཆོག་ཨ་རིའི་སྲིད་འཛིན་ཐེངས་༤༧པ་ཆགས་པ་དེ་ནི། ལོ་བཞིའི་སྔོན་ལ་ཕམ་ཁ་ངེས་ལེན་མ་བྱས་བ་དང་། གྲོས་ཚོགས་ཚོགས་ཁང་མདུན་དུ་དྲག་པོའི་ཟིང་ཆ་བྱུང་བ། ཉེས་འཛུགས་སྣ་མང་བྱས་པ་དང་ཐེངས་གཉིས་ལ་ལྐོག་གསོད་བྱེད་གྲབས་ལས་ཐར་བའི་སྲིད་འཛིན་ཟུར་བ་འདི་ལ་མཚོན་ན། ཐེངས་འདི་ནི་ལོ་རྒྱུས་དོན་སྙིང་ལྡན་པའི་ཕྱིར་ཕེབས་པ་ཞིག་རེད་ཟེར། ད་ལྟ་དགུང་ལོ་༧༨ལ་སླེབས་པའི་ཌོ་ནོལ་ཌི་ཊ་རམ་མཆོག་གིས་ཕྱི་ལོ་༢༠༢༥ ཟླ་ ༡ ཚེས་༢༠ ཉིན་སྲིད་འཛིན་ལས་འཁུར་དམ་བཅའི་མཛད་སྒོ་གནང་རྒྱུ་དང་། གཞུང་གསར་བ་འདི་ལའང་ཨ་རིའི་ནང་ཆབ་སྲིད་ཕྱོགས་ཁག་གཉིས་སུ་གྱེས་བའི་དཀའ་ངལ་དང་ཨ་རིས་འཛམ་གླིང་གི་དཀའ་རྙོག་ཁག་ལ་ཤུགས་རྐྱེན་སོགས་གནད་དོན་མང་པོ་ཞིག་ལ་གདོང་ལེན་བྱེད་དགོས་ཆགས་ཀྱི་ཡོད་པ་རེད།།

གསར་འགོད་པ། ལྕགས་མོ་མཚོ།

རྩོམ་སྒྲིག་པ། དོན་གྲུབ་རྣམ་རྒྱལ།

དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།

དྲྭ་ཐོག་སྤེལ་མཁན། པ་སངས་དོན་ལྡན།