དཀར་མཛེས་རྟའུ་རྫོང་ཁོངས་ཀྱི་ནད་པ་ཚང་མ་བོད་རིགས་རེད་འདུག

2020-02-19
གློག་འཕྲིན།
མཆན།
Share
པར་བཀོད།
བོད་ནང་སེལ་ཤུལ་ཕྱོགས་སུ་ཏོག་དབྱིབས་ནད་འབུ་སྔོན་འགོག་བྱེད་བཞིན་པ། ༢༠༢༠།༢
བོད་ནང་སེལ་ཤུལ་ཕྱོགས་སུ་ཏོག་དབྱིབས་ནད་འབུ་སྔོན་འགོག་བྱེད་བཞིན་པ། ༢༠༢༠།༢
བོད་འབྱོར།

དཀར་མཛེས་རྟའུ་རྫོང་ཁོངས་སུ་ཏོག་དབྱིབས་ནད་འབུ་གསར་བ་ཕོག་པའི་ནད་པའི་གྲངས་འབོར་༦༠་བར་འཕར་ཡོད་པ་དང་ནད་པ་ཚང་མ་བོད་རིགས་རེད་འདུག
འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གིས་བོད་ནང་གི་འབྲེལ་ཡོད་མི་སྣ་བརྒྱུད་གནས་ཚུལ་རྩད་ཆོད་བྱུང་བ་ལྟར་བ་ན། འདི་ཚེས་༡༨་ཉིན་གྱི་ཆུ་ཚོད་༢༤་ རིང་དཀར་མཛེས་རྟའུ་ཕྱོགས་སུ་ཏོག་དབྱིབས་ནད་འབུ་གསར་བ་དབྱིན་སྐད་དུ་(COVID-19)་ཡོད་པའི་ནད་པ་གསར་བ་མི་གྲངས་༣ ་བྱུང་ནས་ད་ཆ་དཀར་མཛེས་རྟའུ་ཕྱོགས་སུ་བསྡོམས་ནད་པ་མི་གྲངས་༦༠་བར་འཕར་ཡོད་པ་དང་། ནད་པ་དེ་དག་ཚང་མ་བོད་རིགས་ཡིན་པ་རེད་ལ། ད་ལྟ་དཀར་མཛེས་ཁུལ་དང་རྟའུ་རྫོང་སོགས་སུ་དམིགས་བཙུགས་སྨན་ཁང་ནང་ལོགས་སུ་བཀར་ནས་སྨན་བཅོས་བྱེད་བཞིན་པ་བརྗོད་བྱུང་། དེ་བས་ད་ཆ་དཀར་མཛེས་ཁུལ་སྤྱི་ཡོངས་སུ་བསྡོམས་ནད་པ་མི་གྲངས་༦༥་ བར་འཕར་ཡོད་པ་དང་། རྟའུ་རྫོང་ཁོངས་ཀྱི་ནད་པ་དེ་དག་མ་ཟུར་ཤང་ངམ་ཡུལ་ཚོ་དང་། ཁང་གསར་ཡུལ་ཚོ། དགེ་བཤེས་ཡུལ་ཚོ། ཁུག་ཆགས་ཡུལ་ཚོ། དབའ་ཞབས་ཡུལ་ཚོ་བཅས་ནས་ཡིན་པ་རེད་འདུག   གཞན་དཀར་མཛེས་ཁུལ་དུ་ཏོག་དབྱིབས་ནད་འབུ་གསར་བའི་རིམས་ནད་འགོས་ཡོད་པར་དོགས་ཡོད་མི་གྲངས་༤༡༠་ཟུར་དུ་བཀག་ཉར་གྱིས་བརྟག་དཔྱད་བྱེད་བཞིན་ཡོད་པའི་སྐོར་ཚེས་ ༡༨ ་ཉིན་དཀར་མཛེས་བོད་རིགས་རང་སྐྱོང་ཁུལ་འཕྲོད་བསྟེན་བདེ་ཐང་ལྷན་ཁང་གིས་གནས་ཚུལ་སྤེལ་འདུག
རྟའུ་ཕྱོགས་སུ་ཛ་དྲག་གི་གནས་སྟངས་དེའི་འོག་ཚེས་༡༧་ཉིན་དཀར་མཛེས་ཁུལ་སྤྱི་བདེ་ལས་ཁུངས་དང་། དཀར་མཛེས་ཁུལ་འགྲིམ་འགྲུལ་སྐྱེལ་འདྲེན་ལས་ཁུངས་བཅས་ནས་གསལ་བསྒྲགས་སྤེལ་ནས། ཞིང་ཆེན་དང་ཁུལ་ནས་ཆོག་མཆན་ཐོབ་པ་བརྒྱུད། སྤྱི་ཚེས་༡༧་ཉིན་ནས་བཟུང་རྟའུ་ཕྱོགས་ཀྱི་གཞུང་ལམ་ཨང་༣༥༠་རྟའུ་རྫོང་དཔལ་སྨད་གྲོང་རྡལ་ནས་རྟའུ་རྫོང་ཁང་སར་ཡུལ་ཤོག་བར་ཏོག་དབྱིབས་གསར་བའི་ནད་ཡམས་མཇུག་མ་རྫོགས་བར་འགྲིམ་འགྲུལ་བཀག་སྡོམ་བྱེད་རྒྱུ་ཡིན་འདུག
འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གིས་རྒྱ་ནག་གཞུང་འབྲེལ་གསར་ལམ་དང་གཞན་གསར་ལམ་ཁག་གི་གྲངས་ཐོར་ཞིབ་འཇུག་མཉམ་བསྡུར་བྱས་བ་ལྟར་ན། འདི་གའི་ཚེས་ ༡༩ ་ཉིན་བར། བོད་མི་གནས་སྡོད་ལྗོངས་དང་ཞིང་ཆེན་ཁག་ལྔའི་ནང་ཏོག་དབྱིབས་ནད་འབུ་གསར་བའི་འགོས་ནད་བྱུང་བའི་ནད་པའི་གྲངས་འབོར་ནི། རྒྱ་ནག་གིས་བརྗོད་བཞིན་པའི་བོད་རང་སྐྱོང་ལྗོངས་ཁུལ་ལྷ་ས་གྲོང་ཁྱེར་ནང་ནད་པ་མི་གྲངས་ ༡ ་ཐོན་ཡོད་པ་དེ་སྤྱི་ཟླ་ ༢ ་ཚེས་ ༡༢་ཉིན་ནད་གཞི་སངས་དྲག་གིས་བོད་རང་སྐྱོང་ལྗོངས་མི་དམངས་སྨན་ཁང་གསུམ་པ་ནས་ཐོན་ཡོད་པ་རྒྱ་ནག་གཞུང་འབྲེལ་གྱི་གསར་འགྱུར་བརྒྱུད་ལམ་དུ་གནས་ཚུལ་སྤེལ་ཡོད་པ་རེད། དེ་བཞིན་མཚོ་སྔོན་ཟི་ལིང་དུ་ནད་པ་ ༡༥ ་དང་། མཚོ་བྱང་ཁུལ་དུ་ནད་པ་༣ སི་ཁྲོན་དཀར་མཛེས་ཁུལ་དུ་ནད་པ་༦༥ ༼དེའི་ནང་ ༦༠་རྟའུ་རྫོང་ནས་ཡིན༽ རྔ་བ་ཁུལ་དུ་༡ ཀན་ལྷོའམ་མདོ་ལྷོ་ཁུལ་དུ་བསྡོམས་ནད་པ་༨ ་བཅས་བྱུང་འདུག
གཞན་སྤྱི་ཡོངས་ནས་འདི་གའི་སྤྱི་ཟླ་ ༢ ་པའི་ཚེས་ ༡༩ ་ཉིན་གྱི་ཞོགས་པ་བར། རྒྱ་ནག་ནང་མི་གྲངས་༧༥༢༨༢་ལྷག་ལ་ནད་ཡམས་དེ་འགོས་ཡོད་པ་གཏན་འཁེལ་བྱུང་བ་དང་། ༼དེའི་ཁྲོད་སྨན་པ་༡༧༡༦་ལྷག་ཡོད༽ དེའི་ཁྲོད་ཀྱི་ནད་པ་མི་གྲངས་༢༠༡༢་ཙམ་གྲོངས་འདུག་ལ་རྒྱ་ནག་ཝུའུ་ཧན་ནས་ད་ཆ་འཛམ་གླིང་གི་ཡུལ་གྲུ་ཁག་ ༢༥ ་ལྷག་གི་ནང་ནད་ཡམས་དེ་ཁྱབ་ཡོད་འདུག

མཆན། (0)
Share
དྲ་གནས་ཆ་ཚང༌།