རྒྱ་ནག་གཞུང་གིས་ཡུ་གུར་མི་རིགས་རྩ་མེད་གཏོང་བཞིན་ཡོད་པ་ཁེ་ཎ་ཌའི་ནང་གྲོས་ཆོད་གཏན་འབེབས།

2021-02-23
Share
རྒྱ་ནག་གཞུང་གིས་ཡུ་གུར་མི་རིགས་རྩ་མེད་གཏོང་བཞིན་ཡོད་པ་ཁེ་ཎ་ཌའི་ནང་གྲོས་ཆོད་གཏན་འབེབས། ཤིན་ཅང་ནང་གི་ངལ་རྩོལ་རྭ་བ་ཞིག་གི་སྒོ་ཆེན་མདུན། །༩༣།༢༠༡༨
Reuters

རྒྱ་ནག་གཞུང་གིས་ཡུ་གུར་མི་རིགས་རྩ་མེད་གཏོང་བཞིན་པའི་དྲག་གནོན་སྲིད་ཇུས་ལག་བསྟར་བྱེད་བཞིན་པ་ཁེ་ཎ་ཌའི་གྲོས་ཚོགས་འོག་མའི་ནང་ངོས་འཛིན་གྱི་གྲོས་ཆོད་གཏན་འབེབས་གནང་འདུག
གནས་ཚུལ་ལྟར་ན། འདི་ཚེས་༢༢ཉིན། ཁེ་ཎ་ཌའི་གྲོས་ཚོགས་འོག་མའི་ནང་། རྒྱ་ནག་གཞུང་གིས་ཤིན་ཅང་ངམ་(Xinjiang )ཤར་ཏུར་ཀིསུ་ཐན་ནང་གི་ཡུ་གུར་མི་རིགས་རྩ་མེད་བཟོ་བཞིན་ཡོད་མེད་ཐད་འོས་བསྡུ་བྱས་སྐབས། གྲོས་ཚོགས་ཀྱི་ཚོགས་ཞུགས་འཐུས་མིའི་ནང་དགག་བྱ་གཅིག་ཀྱང་མེད་པར་གྲོས་ཚོགས་འཐུས་མི་༢༦༦གིས་མོས་མཐུན་གྱི་ཚད་མཐོའི་རྒྱབ་སྐྱོར་ཐོབ་ནས། རྒྱ་ནག་གཞུང་གིས་ཡུ་གུར་མི་རིགས་གཙོ་བོར་གྱུར་པའི་ཁ་ཆེ་གྲངས་ཉུང་མི་རིགས་ཐོག་དྲག་གནོན་གྱི་སྲིད་ཇུས་ལག་བསྟར་བྱས་ནས་མི་རིགས་རྩ་མེད་གཏོང་རྒྱུའི་སྲིད་ཇུས་སྤེལ་བཞིན་པ་ངོས་འཛིན་གྱིས་གྲོས་ཆོད་གཏན་འབེབས་གནང་བ་དང་མཉམ། ཁེ་ཎ་ཌའི་གྲོས་ཚོགས་འཐུས་མི་ཚོས། གལ་སྲིད་རྒྱ་ནག་གཞུང་གིས་མུ་མཐུད་དུ་ཡུ་གུར་མི་རིགས་ཐོག་དྲག་གནོན་གྱི་སྲིད་ཇུས་སྤེལ་ཚེ། ཁེ་ཎ་ཌ་གཞུང་གིས་རྒྱལ་སྤྱིའི་ཨོ་ལིམ་པིཀསི་(Olympics)རྩེད་འགྲན་གོ་སྒྲིག་ལྷན་ཚོགས་རྒྱུན་ལས་ཚོར། ཕྱི་ལོ་༢༠༢༢ལོའི་དགུན་ཁའི་རྩེད་འགྲན་དེ་རྒྱ་ནག་པེ་ཅིན་དུ་འཚོགས་རྒྱུ་ཕྱིར་འཐེན་བྱེད་དགོས་པའི་འབོད་སྐུལ་བྱེད་རྒྱུ་ཡིན་པ་བརྗོད་ཡོད་པ་རེད།
དེའི་ཐད་འདི་ཚེས་༢༢ཉིན་འཛམ་གླིང་ཡུ་གུར་ལྷན་ཚོགས་ཀྱིས་དགའ་བསུ་གནང་བ་དང་། ལྷན་ཚོགས་དེའི་ཚོགས་གཙོ་(Dolkun Isa)ལགས་ཀྱིས། རྒྱལ་སྤྱིའི་ཐོག་ཤར་ཏུར་ཀིསུ་ཐན་ནང་རྒྱ་ནག་གཞུང་གིས་མི་རིགས་རྩ་མེད་བཟོ་བའི་སྲིད་ཇུས་ལག་བསྟར་བྱེད་བཞིན་པར་སྐྱོན་བརྗོད་བྱེད་བཞིན་པའི་སྐབས་སུ། ཁེ་ཎ་ཌའི་གྲོས་ཚོགས་འོག་མའི་ནང་གྲོས་ཆོད་གཏན་འབེབས་གནང་བར་དགའ་བསུ་དང་། ཁེ་ཎ་ཌའི་སྲིད་བློན་(Justin Trudeau)ལགས་ཀྱིས་ཕྱོགས་འགལ་ཚོགས་པའི་གྲོས་འཆར་སྣང་མེད་གཏོང་དགོས་ལུགས་བློན་ཆེན་རྣམ་པར་ལམ་སྟོན་གནང་བར་བློ་ཕམ་ཡོད་ལུགས་གསུངས་འདུག
རྒྱ་ནག་གཞུང་གིས་ཡུ་གུར་བ་དང་། ཀ་ཛག དེ་མིན་ཊརྐི་མི་རིགས་ཀྱི་བུད་མེད་ཚོ་ངལ་རྩོལ་བསྒྱུར་བཀོད་རྭ་བར་བཅུག་ཐོག་བཙན་གཡེམ་གཙོས་པས་སྡུག་རྩུབ་དྲག་གནོན་གཏོང་བཞིན་པ་དང་། ཡུལ་མི་ས་ཡ་གཅིག་དང་འབུམ་བརྒྱད་ནས་ས་ཡ་གཉིས་བར་ཁྲིམས་འགལ་བཀག་བསྐྱིལ་བྱས་ཡོད་པའི་གནས་ཚུལ་ཐོན་བཞིན་པ་རྒྱལ་སྤྱིའི་ཐོག་གླེང་སློང་བྱེད་བཞིན་པ་རེད།
དེ་སྔ་ཕྱི་ཟླ་དང་པོའི་ནང་ཨ་རིའི་སྲིད་འཛིན་(Trump)གྱི་གཞུང་འཛིན་སྐབས། ཨ་མི་རི་ཀའི་གཞུང་གིས་རྒྱ་ནག་གཞུང་གིས་ཡུ་གུར་མི་རིགས་རྩ་མེད་བཟོ་བཞིན་པའི་ངོས་འཛིན་བྱས་ཡོད་པ་དང་། ཁེ་ན་ཌས་ད་རེས་རྒྱ་ནག་གཞུང་གི་སྲིད་ཇུས་དེ་དག་མི་རིགས་རྩ་མེད་ཀྱི་སྲིད་ཇུས་ཡིན་པར་ངོས་འཛིན་གནང་བ་ནི་ཨ་རིའི་རྗེས་རྒྱལ་ཁབ་ཨང་གཉིས་པ་དེ་ཆགས་ཀྱི་ཡོད་པ་རེད།

མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎

དྲ་གནས་ཆ་ཚང༌།