བོད་རྔ་པ་ཁུལ་དུ་རྒྱ་ནག་གཞུང་གིས་རྒྱལ་ཁབ་འདྲ་མིན་གྱི་ཕྱི་འབྲེལ་གཞུང་ཚབ་མི་སྣ་བལྟ་སྐོར་ལ་འཁྲིད་པ།

༄༅།།བོད་རྔ་པ་ཁུལ་དུ་རྒྱ་ནག་གཞུང་གིས་རྒྱལ་ཁབ་འདྲ་མིན་གྱི་ཕྱི་འབྲེལ་གཞུང་ཚབ་མི་སྣ་བལྟ་སྐོར་ལ་འཁྲིད་པ་འདི་ཡུལ་བསྐོར་སྤྲོ་འཆམ་པའི་ངོ་བོར་འགྲེལ་བརྗོད་བྱེད་ཀྱི་ཡོད་ཀྱང་། བལྟ་སྐོར་བསྐྱོད་མཁན་ཕྱི་འབྲེལ་མི་སྣས་དངོས་དོན་རྟོག་ཞིབ་དང་གནས་ཚུལ་མཁོ་སྒྲུབ་ཆེད་དུ་ཕེབས་ཡིན་པ་ལྟ་བསྐོར་སྐུ་ཚབ་ནང་ཕེབས་མཁན་གྱི་འཇར་མཎ་སྐུ་ཚབ་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་ལ་འགྲེལ་བརྗོད་གནང་ཡོད་པ་རེད།

རྒྱ་ནག་གཞུང་གིས་ཨ་རི་དང་ཡོ་རོབ་ཐེ་བའི་ཕྱི་འབྲེལ་སྐུ་ཚབ་འཚོ་ཁག་ཅིག་བོད་མིའི་ས་གནས་ཁག་གཉིས་ཀྱི་ནང་དུ་ལྟ་སྲུང་ནན་པོའི་འོག་སྣེ་ལེན་བྱེད་ཡོད་པའི་གནས་ཚུལ་ཞིག་ཐོན་ཡོད་པ་ལྟར། འདིའི་ཐད་རྩད་ཞིབ་ཞུས་པར། སྐུ་ཚབ་འཚོ་ཁག་ནང་ཕེབས་མཁན་གྱི་སྐུ་ཚབ་གཅིག་གིས་ད་རེས་ཀྱི་ལྟ་སྐོར་ལས་རིམ་འདི་གནས་ཚུལ་བལྟ་ཞིབ་ཆེད་སྐྱོད་པ་ཞིག་ཡིན་པ་དང་། མ་འོངས་གནས་ཚུལ་མུ་མཐུད་ལྟ་ཞིབ་བྱེད་དེ་དུས་ལ་རན་སྐབས་ཕྱི་བསྒྲགས་གནང་རྒྱུ་དང་དེ་མིན་ཐུགས་འཚབ་ཀྱི་གནས་དོན་རྣམས་རྒྱ་ནག་མཉམ་ཐད་ཀར་གྲོས་མོལ་གནང་གི་རེད་ཅེས་ ཁྲིན་རྡུ་གྲོང་ཁྱེར་ནང་ཡོད་པའི་འཇར་མཎ་གཞུང་ཚབ་ཡན་ལག་ལས་ཁུངས་ཀྱི་སྤྱི་ཁྱབ་འགན་འཛིན་གཞོན་པ་ Alexander Fowles ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་ལ་ཕྱི་ཟླ་ ༦ ཚེས་ ༢༦ ཉིན་ཞལ་པར་བརྒྱུད་ངོ་སྤྲོད་གནང་ཡོད་པ་རེད།

དེ་ཡང་རྒྱ་ནག་གི་ཁྲིན་དུ་གྲོང་ཁྱེར་ནང་ཡོད་པའི་ཡོ་རོབ་དང་། ཨ་རི། ཨོས་ཀྲེ་ལི་ཡ་སོགས་ཀྱི་ཕྱི་རྒྱལ་སྐུ་ཚབ་ ༢༡ ལས་གྲུབ་པའི་འཚོ་ཁག་གཅིག་ཕྱི་ཟླ་ ༦ ཚེས་ ༡༧ དང་ ༡༨ སོ་སོར་རྒྱ་ནག་གཞུང་གིས་དབྱེས་བའི་ཟི་ཁྲོན་ཞིང་ཆེན་གྱི་རྔ་པ་བོད་རིགས་དང་ཆང་རིགས་རང་སྐྱོང་ཁུལ་དུ་སྐོར་སྐྱོད་ལ་སྣེ་ལེན་བྱེད་ཡོད་པ་རྒྱ་ནག་གཞུང་འབྲེལ་རྔ་པ་ཉིན་རེའི་གསར་ཁང་གིས་གནས་ཚུལ་སྤེལ་ཡོད་ཅིང་། སྐུ་ཚབ་ཚོགས་པའི་ཁོངས་སུ་ཨོས་ཀྲེ་ལི་ཡ་དང་།་ ཨོས་ཀྲི་ཡ། ཕ་རན་སི། འཇར་མ་ཎི། ཨིས་རེལ། པ་ཀིས་ཐན། པོ་ལེནཌ། སིང་གྷ་པུར། སུད་སི། ཨ་མི་རི་ཀ་བཅས་ཀྱི་སྐུ་ཚབ་ཡོད་ཅིང་། ཟི་ཁྲོན་ས་གནས་དམར་ཤོག་ཚོགས་པའི་ཕྱི་འབྲེལ་ལས་དོན་ཚོགས་ཆུང་གིས་བསྐོར་སྐྱོད་འདི་གོ་སྒྲིག་བྱས་པ་ཞིག་རེད་འདུག

བཀྲ་ཤིས་དབང་ཕྱུག་ལགས་ཀྱིས་གནས་ཚུལ་མཁོ་སྒྲུབ་ཞུས་པ་ཞིག་སྙན་སྒྲོན་ཞུ་གི་རེད།

གསར་འགོད་པ་བཀྲ་ཤིས་དབང་ཕྱུག