Америка хәлқара диний әркинлик комитетиниң комиссари нури түркәл: «хитай уйғурларға қарита мәдәнийәт қирғинчилиқ елип бериватиду»

Мухбиримиз әркин
2020-06-05
Елхәт
Пикир
Share
Принт

Америка хәлқара диний әркинлик комитетиниң комиссари нури түркәл 4-июн күни америкадики «христиан ахбарат тори» (CBN қанили) ниң зияритини қобул қилип, хитайниң уйғурларға қарита «мәдәнийәт қирғинчилиқи» елип бериватқанлиқи, бу кризиста уйғурлар хиристян вә йәһудий җамаәтлириң зор қоллишиға еришкәнлики, лекин башқа диний гуруппиларниң йетәрлик қоллимиғанлиқи, уларниңму уйғурлар үчүн сөз қилиши керәкликини билдүргән. Бу нури түркәлниң юқириқи вәзипигә олтурғандин бери тунҗи қетим америка таратқусиниң зияритини қобул қилишидур.

Нури түркәл юқириқи сөзләрни CBN ниң вашингтонда турушлуқ мухбири җәниффер вишонниң зияритини қобул қилғанда тәкитлигән. Униң қәйт қилишичә, һазир уйғурлар «дәвримиздики мәдәнийәт қирғинчлиқиға учримақта» икән. У: «әгәр бир һөкүмәт бир етник милләтни коллектип җазалап, униң етник арқа көрүнүши, диний етиқади сәвәблик униң аяллири вә балилирини нишан қилса, бу ениқки мәдәнийәт қирғинчлиқиға ятиду,» дегән.

Нури түркәл йеқинда америка дөләт мәҗлисидә мақуллинип, президент трампниң имза қоюшиға сунулған «уйғур кишилик һоқуқ сиясити қануни» һәққидә тохтилип, буниң уйғурларға аит америкадики тунҗи қанун икәнлики, бу қанунниң һөкүмәтниң «йәр шари магнетиский қануни» ни ишқа селип, хитайда диний вә аз санлиқ милләтләрни бастурушта җавабкарлиқи бар болған хитай әмәлдарлириға ембарго йүргүзүшигә көрсәтмә беридиғанлиқини билдүргән. Нури түркәл өткән һәптә америка авам палата рәиси нәнси пелоси тәрипидин америка хәлқара диний әркинлик комитетиниң комиссарлиқиға тәйинләнгән иди.

Пикирләр (0)
Share
Толуқ бәт