Amérika buningdin kéyin xitay bilen uzun muddet soghuq urush qilamdu?

Eger amérika buningdin kéyin xitayning özini asiyadiki küchlük dölet dep jakarlishini qobul qilmisa, xitay bilen amérika otturisida urush yüz bérishi mumkin.
Muxbirimiz weli
2011.04.05
Cronin-Patrick-LowRes-305.jpg Yéngi amérika bixeterlik istratégiyisi tetqiqat merkizining asiya-tinch okyan programma mudiri doktor patrik kronin.
www.cnas.org

Yéngi amérika bixeterlik istratégiyisi tetqiqat merkizining asiya-tinch okyan programma mudiri doktor patrik kronin, 3‏-ayning 31-küni özining faysbuk tor bétide élan qilghan obzorida, hazirqi amérika-xitay munasiwiti üstide mulahize yürgüzüp, eger amérika buningdin kéyin xitayning özini asiyadiki küchlük dölet dep jakarlishini qobul qilmisa, xitay bilen amérika otturisida urush yüz bérishi mumkin dégen tesewwurni otturigha qoyghan idi. U tesewwurida yene temkin halda, amérika buninggha xéli burunla teyyarliq körüp bolghan, dep körsetken idi.

Doktor patrik kroninning obzoridiki bu tesewwurni aldi bilen xitayche chiqidighan dowéy tor géziti köchürüp basti we buninggha da'ir munasiwetlik uchurlarni toplap, bu heqtiki mexsus témisini her küni toluqlap-yéngilap turuwatidu. Gézit guruhi dep atilidighan xitay mebleghliri awstraliyide we yawropada chiqiriwatqan gézitlerde, hetta xitayning dölet ichidiki herbiy, diplomatiye, pen-téxnika, edebiyat-sen'et sahelirining xilmu-xil tor gézitliridimu, amérika buningdin kéyin xitay bilen uzun muddet soghuq urush qilidu, dégen köz qarashni kéngeytip sözleshke bashlidi.

Xitayche uchur wasitiliri hazir, amérika buningdin kéyin xitay bilen uzun muddet soghuq urush qilidu, dégen köz qarashni ispatlash üchün, amérikidiki yéngi amérika bixeterlik istratégiyisi tetqiqat merkizining asiya-tinch okyan programma mudiri doktor patrik kroninning “Eger amérika buningdin kéyin xitayning özini asiyadiki küchlük dölet dep jakarlishini qobul qilmisa, xitay bilen amérika otturisida urush yüz bérishi mumkin”, “Amérika buninggha xéli burunla teyyarliq körüp bolghan” dégen tehlilini tekrar-tekrar neqil keltürgendin bashqa, awstraliye prézidénti juliya gillard xanimning amérika-awstraliye munasiwiti heqqidiki teshebbusinimu, xitay uchur wasitiliri özliri kötürüp chiqqan “Amérika buningdin kéyin xitay bilen uzun muddet soghuq urush qilidu” dégen köz qarashning ispati dep körsetmekte.

Xitayche gézitlerning bir-biridin köchürüp we kéngeytip bayan qilinishiche, awstraliye prézidénti juliya gillard xanim amérikini ziyaret qilghanda, amérika bilen awstraliye herbiy munasiwetni kéngeytip, ortaq düshmen'ge bille qarshi turush kérek dégen teshebbusni otturigha qoyghan. Awstraliyining xelq'ara siyaset tetqiqatchisi wayt élan qilghan maqalilerdimu, xitayning küchliniwatqanliqi---amérikining asiya-tinch okyan rayonidiki yétekchilik ornigha qilin'ghan riqabet, xitayning kéngiyishini chekleshte, awstraliye choqum amérika bilen birliship heriket qilishi kérek, dep körsetken.

Xitayche uchur wasitiliri, amérika kéngesh palatasining péshqedem ezasi john mékkaynning, xitay küchiyip ketkenliki üchün amérika bilen xitay otturisida urush yüz bérishi natayin, biz xitayning herbiy küchini chong küch dep mölcherlimeymiz, emma her éhtimalgha qarshi teyyarliq bolush kérek, bundaq teyyarliqlarning ichide, amérika bilen awstraliyining birliship heriket qilishi, xitayning asiya-tinch okyan rayonidiki kéngiyishini chekleshte eng téz ünüm béridighan chare, chünki bir rayonda birdin köp döletning bir qa'idige ri'aye qilishi bir ghayet zor küch dep körsetkenlikinimu, xitaylar özliri hazir kötürüp chiqqan “Amérika buningdin kéyin xitay bilen uzun muddet soghuq urush qilidu” dégen köz qarashning yene bir ispati qilip körsetken.

Xitayche uchur wasitiliride yene, amérika tashqi ishlar ministirliqining sherqiy asiya-tinch okyan ishlirigha mes'ul mu'awin bashliqi kambérining amérika-xitay munasiwiti heqqidiki sözlirinimu, xitaylar özliri hazir kötürüp chiqqan “Amérika buningdin kéyin xitay bilen uzun muddet soghuq urush qilidu” dégen köz qarashning ispati dep körsetken.

Xitayche gézitlerning bir-biridin köchürüp we kéngeytip bayan qilinishiche, amérika tashqi ishlar ministirliqining sherqiy asiya-tinch okyan ishlirigha mes'ul mu'awin bashliqi kambéri qilghan sözliride, amérikining asiya-tinch okyan istratégiyisining eng tewrenmes asasi-bu rayonda démokratiyini we kishilik hoquqni qollash, xelqning diniy we pikir bayan qilish erkinlikini qanat yaydurush, amérikining uzun muddetlik menpe'iti dégen mushu, asiyada 21-esirde yüz béridighan özgirish del mushu sehnide namayan qilinidu, bu, amérikining mushu rayon'gha qoshidighan eng chong töhpisi bolup qalidu, dégen. Shundaqla u yene, amérika özining pütün yer shari iqtidarini del mushu sehnide tepsiliy namayan qilidu, dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.