Хитайда әмәлдарлар билән хәлқ оттурисида тәминат җәһәттә қанчилик пәрқ бар?

• 
  2006-01-05

"Хитай учур мәркизи" елан қилиған "хитайда коммунистик партийә әмәлдарлириниң пинсийә тәминати җәһәттики имтиязлири" һәққидики санлиқ мәлуматларда баян қилинишичә, җуңхуа хәлқ җумһурийитиниң пинсийә түзүмидә наһийә дәриҗиликтин юқири әмәлдарлар вәзипидин чикинип арамға чиқиду, 1949 - йили 10 - айниң 1 - күнидин бурун "инқилаби хизмәткә қатнашқан" әмәлдарлар вәзипидин айрилип арамға чиқиду, дәп бәлгиләнгән.

Алаһидә имтияз

Вәзипидин чикинип арамға чиққанлар хизмәт қилған йил саниға асасән бәлгиләнгән нисбәт бойичә мааш вә давалиниш суғуртиси қатарлиқлар билән тәминлиниду, вәзипидин айрилип арамға чиққанлар әмәлийәттә хизмәттин чикинмигән, пәқәт хизмәт қилмай арам алидиғанлар. Улар тулуқ мааш вә башқа суғуртилар билән тәминлиниду. Арамға чиққан әмәлдарларниң қолида нәқ һоқуқ болмиғачқа, уларниң алдиға хошамәтчиләр кәлмәйдиған болуп қалидиғандин башқа өзгириш йоқ. Буларниң ичидә дәриҗиси юқири болғанлири, болупму өлкә, министир дәриҗилик әмәлдарлар бәһриман боливатқан имтиязлар наһайити пәвқуладдә. Әң пәвқуладдилири мәркизи комитеттин арамға чиққанлар болуп, улар бәһриман боливатқан имтиязлар бәкла алаһидә.

Хитай коммунист партийә мәркизи комитети тәшкилат министирлиқи пешқәдәм кадирлар идарисиниң мәлуматиға қариғанда, хизмәттин айрилип арам еливатқан өлкә дәриҗилик кадирларниң сани 5537, улар ниң һәр биригә 3 - 5 кичә мәхсус хизмәтчи берилгән, уларниң һәр бири үчүн бир йилда 6 милйон йүәндин артуқ чиқим боливатиду. Коммунист партийиниң тәйвән ишлириға қойған әмәлдари ваң давхәнниңла бултурқи бир йиллиқ чиқими 9 милйон 470 миң йүән, униң мәхсус давалиниш пули 5 милйон йүәндин ашқан. Ли пең, җаң земин, вәнли, люхуачиң қатарлиқ хизмәттин айрилип арам еливатқан дөләт дәриҗилик 12 нәпәр әмәлдар үчүн һәр бир кишигә 6 муһапизәтчи, 2 шопур, икки күткүчи, икки катип, бир ашпәз, бир сестира берилгән.

Зиядә чиқим

Һазир җаң земин әң пәвқуладдә, униң коммунист партийиниң 17 - қурултийиғичә үнүмлүк хизмәт қилидиған идарә(назарәт) башлиқи дәриҗиликтин юқири 8 нәпәр хизмәтчи тәйинләнгән ишханиси бар. Мәркизи комитетниң сияси бюро әзаси дәриҗилик хизмәттин айрилип арам еливатқан 117 нәпәр әмәлдар үчүн һәр йили 1 милярд йүәндин артуқ чиқим болиду, һәр бир киши бешиға 10 милйон йүәндин тоғра келиду. Һазир арам еливатқан мушу дәриҗилик әмәлдарлар үчүн вә униңдин төвәнрәк туридиған мәслиһәтчиләр комитети башлиқи дегәндәк әмәлдарлар үчүн авиатсийә идарисиниң 2 айропилани, һәрбий комитетниң 2 айропилан, төмүр йол системисиниң 3 йүрүш пойизи вә 7 мәхсус вагони һәр вақит хизмәткә тәйяр. Бейҗиңда азадлиқ армийә баш дохтурханисиниң алий мутәхәссисләрдин тәркип тапқан 3 давалаш гурупписи, шаңхәйдә 2 давалаш гурупписи, гуаңҗуда 1 давалаш гурупписи булар үчүн мулазимәт қилишқа һәр вақт буйруқ күтүп туриду.

юқирида баян қилинған 12 нәпәр әң алий әрбабниң чоң шәһәрләрдә, арамгаһларда йәнә мәхсус туралғулири яки дачилири бар. Булар өз йенидин бир пул чиқим қилмай мәхсус хәлқниң пули билән бина қилинған 'хитайчә сотисялизм' дегән 'җәннәт’ тә яшайдиған кишиләр. Худди мавзедоң ейтқандәк пәвқуладдә материялдин ясалған бу коммунистлар билән хәлқниң турмушида асман - земин пәрқ бар.

"Хитай рәһбәрлирини дозахқа сетиветәйли"

"Йеңи әсир җурнили" да 1 - айниң 2 - күни, көпчиликкә тунуш болған "коммунистик партийә мәркизи комитетиниң тәшвиқат министирлиқиға от қоюветәйли" дәп обзор язғанлиқи үчүн бейҗиң университетиниң профессорлиқидин қалдурулған җав гобяв әпәндиниң бир обзори елан қилинди. Бу обзорда коммунист әмәлдарлар һәққидә мулаһизә йүргүзүлгән.

Мав зедоңни талантлиқ һәрбй алим дәйду, ـــ дәп баян қилиду җав гобяв әпәнди обзорида, ـــ миниң қаришимчә, мав зедоңниң "хәлқ уруши" дегән нәзирийиси, әмәлийәттә һәммә дөләт пуқралирини бәдинигә бомба теңип җәңгә атландуруштин башқа нәрсә әмәс. Дуң суңрүй дегән шуларниң бири. Мав зедоңниң нәзәридә хәлқниң һаяти әрзимәс нәрсә. У пүтүн хәлқни өлүмгә, от деңизиға, йәни дозахқа қарап меңишқа сәпәрвәр қилған. Әгәр дөләт бирәр мустәбитниң яки падишаниң қолида болмай, хәлқниң өзиниң қолида болса, хәлқ өз дөлитини аңлиқ һалда қоғдайду. Әмма мәлум шәхсниң дөлитини қоғдайдиған мәҗбурийити йоқ. Мән бурун җуңхуа хәлқ җумһурийити дегән бу дөләтни қоғдаш әмәс, бәлки бу дөләтни қандақ қилип сетиветиш һәққидә пикир йүргүзүп кәлдим. Мән бурун хитайни 100 йилғичә хитайдин башлиқ қоймайдиған шәрт билән америкиға сетиветәйли дәп пикир қилған идим. ــ Дәйду җавгобяв әпәнди, ـــ һазир қарисам дөләтни сатмай адәм сатқан дурустәк қилиду. Бу дөләттки ашу хәлқ алдида қан қәрзи бар, хәлқниң әркинликини боғидиған "дөләт рәһбәрлири" дейилгән бир учум кишиләрни бивастә дозаққила сетиветәйли. (Вәли)