Almatada “Milletler ara dostluqni mustehkemlesh” ke a'it ilmiy muhakime yighini boldi

Hazir qazaqistanda jiddiy we her tereplime muhakime qiliniwatqan mesililerning biri milletler we dinlar ara dostluq hem razimenlikni, memliketning muqimliqini saqlash, yüzdin oshuq milletning béshini qoshup, ularning barliq ish-pa'aliyetlirini bir omumiy qazaqistan xelqining xatirjemlikini teminleshke we döletning xelq'aradiki abruyini saqlap qélishqa seperwer qilishtur. Bu jehette köpligen ilmiy-muhakime yighinliri, uchrishishlar we bashqa pa'aliyetler bolup ötmekte. Ene shundaq pa'aliyetlerning biri yéqinda almatada boldi.

Sheherge orunlashqan “Dostluq öyi” binasida qazaqistan bilim we pen ministirliqi süléyménof namidiki sherqshunasliq instituti, qazaqistan Uyghurlirining jumhuriyetlik milliy medeniyet merkizi we qazaqistan özbéklirining almata sheherlik medeniyet merkizi birliship, “Memlikettiki barawerlikning shekillinish jeryanidiki musteqil qazaqistanning türkiy tilliq milletliri” témisida yumilaq üstel ilmiy muhakime yighini bolup ötti. Uni sherqshunasliq institutining mudiri, proféssor ebsattar dérbisali achqandin kéyin, qazaqistan Uyghurlirining jumhuriyetlik milliy medeniyet merkizining ijra'iye mudiri zuxrullam qurwanbaqiyéf “Qazaqistan Uyghurlirining jumhuriyetlik milliy medeniyet merkizining pa'aliyiti heqqide”, almata sheherlik özbék milliy medeniyet merkizining re'isi abduxélil oralbayéf “Almata sheherlik özbék milliy medeniyet merkizining pa'aliyiti heqqide”, sherqshunasliq instituti Uyghurshunasliq merkizining bashliqi, tarix penlirining doktori risalet kerimowa “Memliketlik barawerlikning shekillinish jeryanidiki musteqil qazaqistanning türkiy tilliq milletliri : emelge ashurush meqsiti we yolliri” namliq doklatliri bilen sözge chiqti.

Dügilek üstelge yigirmidin oshuq kishi öz doklatliri bilen qatnashqan bolup, ularning asasiy qismini Uyghurlar teshkil qilghan idi.

Atap éytqanda mezkur yighinda yene tarix penlirining doktorliri risalet kerimowaning “Medeniy en'enilerning özgirishi-qazaqistan Uyghurlirining bedi'iy qol-hüniri asasida”, ablet kamalofning “Qazaqistan Uyghurlirining yerlik tarixi we qazaqistanliq barawerlik”, filologiye penlirining namzati (doktor namzati) x. Mesimowaning “Uyghurlarning ijtima'iy instituti-meshrep we uninggha a'it atalghular”, tarix penlirining namzati z. Kerimowaning “Qazaqistandiki milletler ara razimenlikni mustehkemleshte jem'iyetlik birleshmilerning roli”, iqtisad penlirining namzati g. Hajiyéwaning “Xelq'ara birlishish jeryanidiki türkiy tilliq milletler” namliq doklatliri köpchilikning diqqitini qozghidi.

Radi'omiz ziyaritini qobul qilghan sherqshunasliq instituti Uyghurshunasliq merkizining ilmiy xadimi, filologiye penlirining namzati xalminem mesimowa mezkur yighinning ehmiyiti heqqide toxtilip, mundaq dédi: köpchilikke yaxshi melumki, qazaqistan köp milletlik memliket. Uningda yüzdin oshuq millet yashaydu. Ularning tili, ötmüsh tarixi, dini, medeniyiti, örp-adetliri her xil bolsimu, amma meqsiti bir. Élimiz prézidénti nursultan ebish oghli nazarbayéf rehberlikide yürgüzülüwatqan milliy siyaset, iqtisadiy we ijtima'iy islahatlar we bashqimu chare-tedbirlerning barliqi asasiy jehettin élimizdiki turaqliqning, milletler ara razimenlikning yaxshi bolushigha qaritilghan. Bizning ötküzgen dügilek üstilimizning asasiy meqsiti we ehmiyitimu mana shuningda bolup, uning ene shu siyasetke az bolsimu ijabiy tesirini yetküzidu, dep ümid qilimen. Uyghurshunasliq merkizi xadimliri bügünki künde ene shundaq mesililerni öz ichige alghan ilmiy layihe boyiche ish élip bériwatidu. Biz bu yighin matériyallirini téz arida alahide kitabche qilip neshr qilishqa tirishimiz. Men oylaymenki, yighin matériyalliri qazaqistanning bügünki kündiki siyasiy, iqtisadiy, medeniy we bashqimu sahelerdiki hayatini öginishke muhim menbe bolup hésablinidu.