Mustafa destichi: türkiyening b d t da ret qilish hoquqi bolghan bolsa xitay Uyghurlarni öltürelmeytti

Ixtiyariy muxbirimiz arslan
2013.08.22
Share on WhatsApp
Share on WhatsApp

Türkiyening siwas shehiride échilghan türkmenler yighinida söz qilghan büyük birlik partiyisi re'isi mustafa destichi, eger türkiyening b d t bixeterlik da'imiy komitétida élin'ghan qararlarni ret qilish hoquqi bolghan bolsa, xitay Uyghurlarni öltürelmeytti, dédi.

Yighinda söz qilghan türkiye dölet mudapi'e ministiri ismet yilmaz türkiyening peqet türklerning we islam dunyasining ümidi bolupla qalmastin, belki mezlum milletlerningmu ümidi bolghanliqini ipadilep mundaq dédi: türkiyening meqsiti insanperwerliktur. Shuning üchün türkiyening birlik-barawerlik ichide küchlük bolushi, peqet türk we islam dunyasi üchünla emes, belki dunyadiki pütün mezlum milletlerning ümidi boldi.

Türkiyening siwas shehiride échilghan 11-nöwetlik türkmenler yighinigha, türkiye dölet mudapi'e ministiri ismet yilmaz bilen birlikte qatnashqan büyük birlik partiyisining re'isi mustafa destichi ependi, türk dunyasining birliki üchün türkiyening bir qudretlik döletke aylinishi kéreklikini bildürdi.

Mustafa destichi ependi sözide, türkiye dunyadiki 10 chong döletning birige aylan'ghan teqdirde türk we islam dunyasining mesililiri hel bolidighanliqini, xitayning Uyghurlarni naheq öltürelmeydighanliqini ipadilep mundaq dédi: yer yüzining qaysi jughrapiyisige qaraydighan bolsaq, qeyerde zulum we qayghu-azab bolsa, u yer ya bir türk-islam jughrapiyisi, yaki bir islam jughrapiyisi bar. Sherqiy türkistanda yüz nechche yildin buyan Uyghur qérindashlirimiz xitay zulumi astida ingrawatidu, lékin biz buni küntertipke alalmaywatimiz.

Mustafa destichi ependi sözide yene, misirda yüz bériwatqan weqelerni tilgha élip mundaq dédi: herkim shuni untumisunki, her pir'ewnni gherq qilidighan bir déngiz, her nemrutni köydüridighan bir ot bolidu. Hem islam dunyasining, hem türk dunyasining kélechiki, birliki we barawerliki türkiyege baghliq. Shuning üchün türkiye birlik, küchlük we rayon xaraktérlik lider dölet bolushqa mejbur. Türkiye dunyadiki 10 chong iqtisadi döletlerning biri bolush we b d t xewpsizlik kéngishide qararlarni qollash yaki ret qilish hoquqigha ige bolghan bir dölet bolushi kérek. Eger bügünki künde türkiye b d t da ret qilish hoquqigha ige bolghan dölet bolsa idi, misirda, süriyede, iraqta, afghanistanda, sherqiy türkistanda qetli'amlar yüz bermeytti. Xitay Uyghurlarni qetli'am qilalmaytti. Rusiye kawkazlarda, balqanlarda qetli'am qilalmaytti. Shuning üchün birlik bolush, barawer bolushqa mejburmiz. Hemmidin muhim bolghini bizning mes'uliyetchanliqimiz türkiyediki 75 milyon türk bilenla cheklinip qalmaydu, bashta osmanli jughrapiyisini öz ichige alghan pütün türk-islam jughrapiyisidiki we pütün dunyadiki mezlum milletlerning mes'uliyetchanliqini özimizde hés qilishimiz kérek.

Pütün dunyadiki türklerni we türk jughrapiyisini birleshtürüp chong bir turan döliti qurushni asasiy meqset qilghan büyük birlik partiyisi türk dunyasi mesililirige alahide köngül bölidu. Büyük birlik partiyisi Uyghurlargha eng yéqindin köngül bölüp kéliwatqan bir partiye bolup, bu partiyining re'isi mustafa destichi ependi yéqindin buyan Uyghurlargha ige chiqish, xitayning zulumini toxtitish toghrisida arqa-arqidin bayanat élan qilip keldi we türkiye hökümitini Uyghurlargha yardem bérishke chaqiriq qildi.

Büyük birlik partiyisining re'isi, xitayning enqerediki diplomat emeldarliri bilen bir qanche qétim munaziriliship, Uyghurlargha kishilik hoquq we erkinlik bérishni telep qildi we 2009-yili yüz bergen 5-iyul ürümchi weqesige chétilip tutulghan Uyghurlarni qoyup bérishni telep qilghan idi.

Büyük birlik partiyisi déngizli shöbisi Uyghurlar toghrisida axbarat élan qilish yighini uyushturdi

18-Awghust shenbe küni türkiye büyük birlik partiyisining déngizli shöbisi teripidin axbarat élan qilish yighini uyushturuldi we misirdiki weqeler shundaqla Uyghurlarning weziyiti toghrisida bayanat élan qildi.

Büyük birlik partiyisi déngizli sheherlik shöbe teshkilati, misirda herbiy özgirish qilghan eskerlerning, rabi'etul edwiye we nehdi meydanlirida muhemmed mursi terepdarlirigha qarshi élip barghan qetli'amgha naraziliq bildürdi. Büyük birlik partiyisi déngizli shöbe re'isi sulayman uruch ependi, sözide Uyghurlarni tilgha élip, qizil xitayning zulumi astida ingrawatqan musulman Uyghurlar peqet türk bolghanliqi üchün, ulargha ige chiqmighanlar zalimning yénida orun alghan we zulumni qollighan bolidu dédi.

Déngizli xewer gézitining xewiride bildürüshiche, büyük birlik partiyisi déngizli shöbe re'isi sulayman uruch, islam döletlerning rehberlirige xitab qilip mundaq dédi: seltenitingiz ebediy dawam qilmaydu, zulumgha uchrighan mezlumlarning derd-peryadliri silerni halaketke élip baridu. Misir, iraq, süriye, pelestin, sherqiy türkistan, afghanistanda zulum boluwatidu, emma buningdin kéyin qarshiliq her yerde bolidu. Démokratchi körünüp misirda peqet musulman qérindashlar teshkilati hakimiyet tutqanliqi üchün herbiy özgirish qilghan zalimlarni qollighanlargha shuni xitab qilimizki, hésab soraydighan künmu kélidu, qizil xitayning zulumi astida azab chékiwatqan musulman türkler peqet türk bolghanliqi üchün ulargha ige chiqmighanlar zalimning yénida hésablinidu, zulumni qollighanliq bolidu. Eger bu meydanni özgertip mezlumning yénidin orun almaydighan bolsa, mushu dunyadila qehri-ghezepke uchraydu yaki axirette allaning dergahida chong bir azabqa duchar bolidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.